Понедельник, апреля 19, 2021
Важное

А.С. Пушкин лемсэ библиотекасо ютась Эрзянь ды мокшонь раськень регионъютконь общественной вейсэндявксонь исполкомонь промкс.

Истямо вастовома умок арасель масторонок ланга якиця орманть кувалма. Тей сакшность раськень культурной вейсэндявксонь прявттнэ Россиянь кевейкее ёнкссто, косо эрить эрзятне ды мокшотне. Васняяк чатьмонемань минутасо ледстязельть Исполкомов совицятнень ды минек раськень содавикс ломантнень лемест, конат мелят ды тедеде тусть тоначив. Сынст ютксо Исполкомонь прявтось Александр Степанович Лузгин. Сон ульнесь те вейсэндявксонть оймекс, икелев ветицякс, ламо мель явсь раськень тевтненень.

Паро инжекс промкссонть ульнесь МР-нь Прявтонь тевтнень топавтыцясь А.А. Здунов.
– РФ-нь Президентэсь В.В. Путин Государственной национальной политикань стратегиясонть чарькодевиксстэ тешкстынзе этнокультурань сюпавчинь ванстомань ды Россиянь раськень кемекстамонь коряс эскелькстнэнь. Весе вадрясто чарькодтяно, минек лангсо ашти эрзянь ды мокшонь культуранть, кельтнень, койтнень-кирдатнень ванстомась, – кортась Артём Алексеевич. – Минь уш кортынек теде аволь коммерческой организациятнень марто – раськенть, башка ёнкстнэнь ванстомга, васняяк, ванстомат тиринь кельтнень. Тезэ истя жо сови фольклорось, театрась, поэзиясь. Эряви ванстомс раськень оршамопельтнень, киштематнень, ярсамопельтнень. Зярс те карми улеме – сестэ апак пеле кортамс: раськесь эри, вансты эсензэ коензэ, виевгады.

Сон тешкстызе: эряви явовтомс од ломантнень мелест, тень туртов вешнемс важодемань од лувт, неень шкань технологиятнень тевс нолдазь. 2021 иень прявт тевтнестэ вейкесь – Весероссиянь эрицятнень сёрмадстомась.

– Арсян, миненек удалы ванстомс масторсонть финнэнь-угрань сехте покш раськень статусонть. Эряви содамс – зяро эйстэнек! – кортась Мордовиянь Прявтонь тевтнень топавтыцясь. – Келенть ванстомась – васенце тев весень туртов. Те токши моньгак. Тетям пек вадрясто содасы эрзянь келенть, монень вана эряви вельмевтемс келенть, эдь кувать важодинь эрьва кодамо ёнкссо. Ды карман тень тееме, те эряви! Мон шождасто тонавтнян лия кельть, секскак, арсян, весемесь удалы! Неень шкань интернет-платформатне лездыть вейсэндявомс сеть ломантнень марто, кить эрить васоло Мордовиянть эйстэ, ансяк а стувтнить ундокстост. Мельспаро неемс мелень явиця од ломантнень, конат сёрмадыть стихть, музыка, теить фильмат. Пурныть фактт ине ломантнень, минек ёнкссо чачозтнень эрямодост. Курок экрантнэс лиси минек земляконть Михаил Девятаевень ланга фильмась. Эряви ёвтнемс геройтнень ланга. Кияк илязо кадово мельтеме.

Республикань Прявтонь тевтнень топавтыцясь истя жо тешкстызе: весенень, кить ловить пряст сюлмазекс Мордовиянть марто, бути те сынст тетяст-аваст, покштяст-бабаст туртов тиринь мода, бути сынь мелявтыть чачома ёнксост кисэ, мереви явомс мель «Монь Мордовиям» кадрань проектэнтень.
Промкссонть кортазельть зярыя кевкстемат. Те: вейсэндявксонь важодемадо кортамось; Россиянь эрицятнень сёрмадстомадо; информационно-коммуникационной технологиятнеде; «Монь Мордовиям» пелькстамодонть ды лиядо.

Эрзянь ды мокшонь раськень регионъютконь общественной вейсэндявксонь прявтось Ю.А. Мишанин пачтясь, кодат раськень тевть ветявить республикань томбале, косо улить покш изнявкст ды косто эряви саемс невтевкс (пример), кода важодемс лиятненень. Мелят ютасть исполкомонь ансяк кавто промкст. Сынь ульнесть Пензань ёнксонь Белинской районсо ды Пенза ошсо. Поладыть ютавтомо патриотизмань урокт, «Гордость нации», «Мордовия мастеровая» проекттнэнь.

Теде башка, сынст вейсэндявксось яви мель грантонь тевтненень. Меельце колмо иетнень перть грант вельде республикав састь 18 млн. целковойть. Сынь ютавтозельть «Шумбрат», «Шумбрат, Мордовия!», чувтосто керсицянь фестивальтнес.

Весероссиянь сёрмадстоманть коряс пачтясь МР-ва государственной статистикань коряс Федеральной службань прявтось И.В. Парамонова. Те иень сёксня ютавтови Сёрмадстомась. Сон невтьсы, зяро минденек, кода эрятано, кодат улить стакачить. Республикасонок пурназь ютавтомань комиссия, сынь улить эрьва районсо. Нама, эряви содамс, зяро эрзятнеде ды мокшотнеде. Мордовиядо башка, минек раськетне эрить Самарань, Пензань, Оренбургонь, Ульяновскоень ёнкстнэсэ, Башкортостансо, Татарстансо, Нижегородской областьсэ, Москов ёнкссо (регионтнэ невтезь мельга-мельцек, косо седе ламо) ды лия таркатнесэ. Промкссонть яволявтозель, раськень культурань вейсэндявкстнэнень эряви кеместэ важодемс регионтнэсэ сёрмадстомадо икеле.

Тесэ ёвтазель мель ды кармавтома: национально-культурной автономиятненень эряви свалшкане кирдемс вейке-вейкень марто сюлмавома социальной сеттнесэ ды мессенджертнэсэ. Седе виевгавтомс те тевенть, исполкомонтеньгак ветямс Интернетсэ курот, панжомс группат. Тиринь культурань ванстомань ды сюпалгавтомань коряс кевкстематне иляст аште апак ванно.

Вастовомасонть кепедезельть ламо лия пшти кевкстемат. Саемга, тонавтомань коряс. Те шкас апак нолда тиринь келень учебникть, арасть тонавтомань пособият. РФ-нь Образованиянь министерстванть пельде эряви лицензия. Теде кортамось моли зярыя иень перть, ансяк тевесь кодаяк а сырги таркастонзо.

Саранскоень 13 № школань прявтось А.А. Учеваткин ёвтнесь: 2021 иесь алтави В.И. Ромашкинэнь лемензэ ледстнемга. Тень коряс ютавтовить эрьва кодат вастовомат. Пачтясь фильманть снимамодо ды лиядо.
Промкссонть кочказель Эрзянь ды мокшонь раськень регионъютконь общественной вейсэндявксонь Исполнительной комитетэнь прявт. Те – О.В. Дулкин.

Татьяна Маторкина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».