Даволковонь 19-це чистэ Покш Березникень райононь Дегилевка велень эрицянтень, Ине Отечественной войнань шкасто тылэнь труженикентень Антонина Михайловна Нуянзинанень топодсть 90 иеть.
Юбилеень тешкстамонь чистэнть эрямонь вечкиця, пингень перть ламо важодиця ды стакачиде а пелиця эрзянь авантень поздоровонь ёвтамо сакшность ламо инжеть, ютксост ульнесть «Эрзянь правда» газетань важодицятнеяк.
Ледстясынек, Антонина Михайловна чачсь-кассь ламо эйкакшонь триця семиясо. Тетязо-авазо – Михаил Макарович ды Агафья Акимовна – трясть-кастсть кавксо эйкакшт: колмо цёрат ды вете тейтерть.
Цёраст, Иван Михайлович, маштовсь Ине Отечественной войнанть шкасто ятонть каршо тюремстэ. Неень шкане эйстэст кадовсть кавто сазорт: Антонина Михайловна ды Елена Михайловна. Эрить сынь тиринь велесэ вейке-вейкенень лездазь ды покш ояксчисэ.
Чачома чинзэ кувалма Антонина Михайловнань лемс састь ламо поздоровт ды паронь арсемат. Кузым велень поселениянь (ков сови Дегилевкаськак) прявтось Т.Н.Седякина ёвтась эсензэ пельде поздоровт ды ловнызе паронь арсема марто телеграмманть, конань А.М.Нуянзинанень кучизе Российской Федерациянь Президентэсь В.В.Путин.
Антонина Михайловнанень эзть стувтово войнань стака иетне, сехте пек вачо пекесь ды стакасто важодемась.
– Кеветее иесэ тейтерькакс саинь мель ялгам марто туемс ве ёнов торфонь таргамо, – ледстни Антонина Михайловна. – Ялгатне ульнесть седе покшт, секс тетям эйсэнь пек эзь нолда, ялатеке кортыя сонзэ ды сыргинь васоло килангов. Виде, важодинек пек стакасто, икелепелев эзинь сода, мезе монь тосо учи. Видькстан, ялатеке эзинь янксе, эдь важодемань кисэ сестэ макссть тенек кеменде ламо метрат коцт. Кудов велявтомадо мейле пингень перть важодинь тиринь Суворов лемсэ колхозсо. Кодамо стака тев ансяк эзь саво топавтомс: ракша мельга якинь, паксявгак кенерилинь ды эштё кудоютконь тевтькак теилинь. Эдь тейтертнестэ ульнинь сехте покшось.
Теде башка, Антонина Михайловна сазортнэнь-ялакстнэнь вансь, ков виензэ сатотсть, лездась тетянстэнь-аванстэнь. Истя, весень кисэ мелявтозь, весенень лездазь, тунь эзь арсе эсензэ уцяскадо, мирденень эзь лисе, куш аволь вейке од цёрань ульнесь мелезэ сонзэ лангс урьвакстомс. Сень лангс апак вано, арасель эсензэ семиязо, ялатеке кирдсь кардазпотмо ракшат, саразт. Пирензэ нейгак а кадносы: касты модамарть, морковт, якстерькайть ды лия эмежть. Юткошкасто пек вечкиль вирев панго, ягода мельга якамо, телень перть носкань-цюлкань кодамо.
Паряк, кияк мери, мезекс истя важодемс, бути арасть эйкакшонзо, нуцьканзо. Толковасынек, сон покш кенярксчи мари, зярдо теи лиятненень паро, кази кеняркс. Вана минек самонтеньгак, вейсэ малавиксэнзэ марто, пансь тантей прякат ды седейшкава эйсэнек каванясь. Виде, сонензэ кенярксчинь каванямонть лездасть анокстамс сазоронзо ды лелянзо тейтертне: Раиса Буянкина ды Марина Видякина. Оймсема чистэнть Антонина Михайловнанень поздоровонь ёвтамо пурнавкшнось Нуянзинтнэнь покш раськесь, конась эри ояксчисэ.
Антонина Михайловна марто кортамсто, эрямонь вийсэ цивтёрдыця сонзэ сельмтнес ваномсто, редявсь, мастор лангсо кувака пингенть Пазонть пельде тензэ каземась максовсь сонзэ ламодояк ламо паро тевтнень топавтомаст кисэ. Нать, а стяко Покш Березникень кувака пингень эрицятнень ютксто кочкизь сонзэ ОНФ-нть пельде питней казненть максомга.
Мордовия Республикасо ОНФ-нь региононь отделениянь прявтось Н.А.Сайгачева казсь тензэ цецяпусмо. Активистэсь, Кузым велень поселениянь депутатось П.М.Краснопольский чачома чинтень пачтясь ды казсь тензэ газонь плита ды теке жо чистэнть сонзэ аравтовтызе.
Павел Михайлович поздоровтнень ёвтамодо мейле мерсь, кадык лиятнеяк сайсызь мельс ды поладсызь те паро тевенть. Сестэ Ине Изнямонь 75 иетнень тешкстамось карми улеме ков седе кенярксовокс ды кепедьсынзе мелест сетнень, кить малавгавтызь те Ине чинть ды казсть тенек уцяскав эрямо. Виде, сынст ютксо Антонина Михайловна Нуянзинаяк.
Валентина ЮДИНА
Антонина Михайловна! Ёвтатано тенк поздоровт чачома чинь юбилеенк кувалма, арсетяно кеме шумбрачи ды уцяска. Кадык Пазось кази тенк эрямс сядодо ламо иес ды эштё кувать кадовомс пильге лангсо, эсенк превсэ ды весементь теемс эсенк кедьсэ. Кадык топавтовить весе арсеманк ды меленк-бажамонк.
Ледстясынек, Антонина Михайловна чачсь-кассь ламо эйкакшонь триця семиясо. Тетязо-авазо – Михаил Макарович ды Агафья Акимовна – трясть-кастсть кавксо эйкакшт: колмо цёрат ды вете тейтерть.
Цёраст, Иван Михайлович, маштовсь Ине Отечественной войнанть шкасто ятонть каршо тюремстэ. Неень шкане эйстэст кадовсть кавто сазорт: Антонина Михайловна ды Елена Михайловна. Эрить сынь тиринь велесэ вейке-вейкенень лездазь ды покш ояксчисэ.
Чачома чинзэ кувалма Антонина Михайловнань лемс састь ламо поздоровт ды паронь арсемат. Кузым велень поселениянь (ков сови Дегилевкаськак) прявтось Т.Н.Седякина ёвтась эсензэ пельде поздоровт ды ловнызе паронь арсема марто телеграмманть, конань А.М.Нуянзинанень кучизе Российской Федерациянь Президентэсь В.В.Путин.
Антонина Михайловнанень эзть стувтово войнань стака иетне, сехте пек вачо пекесь ды стакасто важодемась.
– Кеветее иесэ тейтерькакс саинь мель ялгам марто туемс ве ёнов торфонь таргамо, – ледстни Антонина Михайловна. – Ялгатне ульнесть седе покшт, секс тетям эйсэнь пек эзь нолда, ялатеке кортыя сонзэ ды сыргинь васоло килангов. Виде, важодинек пек стакасто, икелепелев эзинь сода, мезе монь тосо учи. Видькстан, ялатеке эзинь янксе, эдь важодемань кисэ сестэ макссть тенек кеменде ламо метрат коцт. Кудов велявтомадо мейле пингень перть важодинь тиринь Суворов лемсэ колхозсо. Кодамо стака тев ансяк эзь саво топавтомс: ракша мельга якинь, паксявгак кенерилинь ды эштё кудоютконь тевтькак теилинь. Эдь тейтертнестэ ульнинь сехте покшось.
Теде башка, Антонина Михайловна сазортнэнь-ялакстнэнь вансь, ков виензэ сатотсть, лездась тетянстэнь-аванстэнь. Истя, весень кисэ мелявтозь, весенень лездазь, тунь эзь арсе эсензэ уцяскадо, мирденень эзь лисе, куш аволь вейке од цёрань ульнесь мелезэ сонзэ лангс урьвакстомс. Сень лангс апак вано, арасель эсензэ семиязо, ялатеке кирдсь кардазпотмо ракшат, саразт. Пирензэ нейгак а кадносы: касты модамарть, морковт, якстерькайть ды лия эмежть. Юткошкасто пек вечкиль вирев панго, ягода мельга якамо, телень перть носкань-цюлкань кодамо.
Паряк, кияк мери, мезекс истя важодемс, бути арасть эйкакшонзо, нуцьканзо. Толковасынек, сон покш кенярксчи мари, зярдо теи лиятненень паро, кази кеняркс. Вана минек самонтеньгак, вейсэ малавиксэнзэ марто, пансь тантей прякат ды седейшкава эйсэнек каванясь. Виде, сонензэ кенярксчинь каванямонть лездасть анокстамс сазоронзо ды лелянзо тейтертне: Раиса Буянкина ды Марина Видякина. Оймсема чистэнть Антонина Михайловнанень поздоровонь ёвтамо пурнавкшнось Нуянзинтнэнь покш раськесь, конась эри ояксчисэ.
Антонина Михайловна марто кортамсто, эрямонь вийсэ цивтёрдыця сонзэ сельмтнес ваномсто, редявсь, мастор лангсо кувака пингенть Пазонть пельде тензэ каземась максовсь сонзэ ламодояк ламо паро тевтнень топавтомаст кисэ. Нать, а стяко Покш Березникень кувака пингень эрицятнень ютксто кочкизь сонзэ ОНФ-нть пельде питней казненть максомга.
Мордовия Республикасо ОНФ-нь региононь отделениянь прявтось Н.А.Сайгачева казсь тензэ цецяпусмо. Активистэсь, Кузым велень поселениянь депутатось П.М.Краснопольский чачома чинтень пачтясь ды казсь тензэ газонь плита ды теке жо чистэнть сонзэ аравтовтызе.
Павел Михайлович поздоровтнень ёвтамодо мейле мерсь, кадык лиятнеяк сайсызь мельс ды поладсызь те паро тевенть. Сестэ Ине Изнямонь 75 иетнень тешкстамось карми улеме ков седе кенярксовокс ды кепедьсынзе мелест сетнень, кить малавгавтызь те Ине чинть ды казсть тенек уцяскав эрямо. Виде, сынст ютксо Антонина Михайловна Нуянзинаяк.
Валентина ЮДИНА
Антонина Михайловна! Ёвтатано тенк поздоровт чачома чинь юбилеенк кувалма, арсетяно кеме шумбрачи ды уцяска. Кадык Пазось кази тенк эрямс сядодо ламо иес ды эштё кувать кадовомс пильге лангсо, эсенк превсэ ды весементь теемс эсенк кедьсэ. Кадык топавтовить весе арсеманк ды меленк-бажамонк.