Дубёнкань райононь Кочкур велев пачколинек сёксень маней чистэ. Сеске сельмес каявсь ваньксчись. Весе кудотнень икельга тикшесь ледезь, вальмалкстнэсэ касыть цецят. Сынсь кудотнеяк вадрят, теезь парсте. Ульцятнева улить паро кить. Сась мельс: тесэ эрить аволь нузякст, тесэ эрить алкуксонь ломанть, роботадо апелицят. Истя улияк, Кочкур велесэ зярыя крестьянско-фермерской хозяйстват, кой-кить эсест кардазсояк кирдить ламо ракшат. Велесэнть улить од ломантькак. Ды те кецявты. Школасонть тонавтни 51 эйкакш. Веленть ули вандынь чизэ. Минь мельспаросо кортнинек тесэнь эрицятнень марто.
Эрямонзо перть – руль экшсэ
Октябрянь 4-це чистэ Кочкур велень эрицянтень Иван Степанович Кочетковнень топодсть 83 иеть. Чачома чидензэ икеле минь вастневинек атянть марто кудонзо вальмало. Сон эри Миша цёранзо семиянть марто.
– Мон чачинь 1941 иестэ, войнань шкане. Ульнесть колмо ялаксон ды кавто сазорон. Тетям чачсь 1902 иестэ, покш лелям – 1923 иестэ, сынст саизь войнав. Натой малацек тюрсть ятонть каршо. Лелям казезь зярыя орденсэ. Пазось ванстынзе, велявтсть кудов. Эйкакш пингенек ютась нужачисэ ды вачочисэ. Ярсамс а мездель, кшиськак ульнесь марчонь. Пек стакаль. Войнадо мейлеяк масторонок стакасто стясь пильге лангс. Мон вишка эйкакшокс уш роботынь. Тракторт арасельть, весементь теинек кедьвийсэ. Школасо прядынь сисем класст. Армиясо служинь 1,5 иеть Польшасо, седе тов ютавтымизь Ленинградонь областев. Тосто самсто иень ютазь урьвакстынь, – ледстни Иван Степанович.
Низэ ульнесь теке райононь Красные Луга посёлкасто. Нина Леонтьевна важодсь Кочкур велесэ эрзянь, рузонь келень ды литературань тонавтыцякс. Сон тусь эрямосто 2017 иестэ. Чачтсть-кастсть ниле эйкакшт: кавто цёрат ды кавто тейтерть. Весе сынь эрить тиринь велесэ ды натой вейке ульцясо. Цёратне, Александр ды Михаил, роботыть стройбригадасо, тейтертне, Светлана ды Галина – школасо тонавтыцят. Мишат-Галят – кавтаськеть. Кияк а кады мельтеме тетяст, свал сакшныть варштамонзо, мартонзо кортнеме. Эйкакшост тризь вечкемасо, ульнесть тенст алкуксонь примерэкс. Иван Степановичень кавксо нуцьканзо, колмо правнуконзо. Нуцьканзо, Маша ды Наташа, прядызь Н. П. Огарёв лемсэ МГУ-нь филологиянь факультетэнть, Софья – М. Е. Евсевьев лемсэ МГПУ-нть, важоди психологокс, Ирина прядызе Мордовиянь гуманитарной институтонть, важоди МФЦ-сэ. Вейке нуцькась служи армиясо, седе вишкинетне тонавтнить школасо. Явить покш мель спортонтень, пелькстыть эрьва кодамо олимпиадасо ды сайнить изнямонь таркат.
И. С. Кочетков эрямонзо перть важодсь «Дубёнский» совхозсо шоферэкс. Ардтнесь эрьва кодамо машинань руль экшсэ. Седе сеедьстэ ГАЗ-51, ГАЗ-52 машинатнесэ. Пачколесь Грузияв, Абхазияв, кучнизь эсенек масторонь васоло оштнес. Пенсияв лисемстэ мартонзо максызь машинанзояк. Сазортнэнь-ялакстнэнь ютксто ней кадовсь ськамонзо.
– Иван Степанович, мезе ёвтавлиде неень шкань од ломантненень?
– Васняяк, эряви тонавтнемс. Зярдояк а пелемс роботадо ды покш тевде. Важодезь, ломаненть а ули шказо стяконь тевс.
«Тетянь пельде зярдояк эзинек марсе берянь валт. Апак сёвно, апак кроя машты кортамо. Сон чевте седей ды паронь арсиця. А пели кодамояк тевде. Истямоль тетязо Степан, минек покштянок, кона вайгелензэ эзь кепсе. Вечксь эрьва косо ваньксчи. Истят ломанть неень шкане чуросто вастат. Покштянь ды тетянь ёнов тусть Саша ды Миша ялаксонок. Чачома чинзэ кувалма арсетяно тетянень кеме шумбрачи, кувака ды сэтьме эрямо, паро ёжо! Сюконятано тензэ трямонок-кастоманок кисэ! – кортась Светлана Ивановна тейтерезэ.
Велень эрицятненень – медицинань лезкс
2020 иестэ «Здравоохранение» национальной проектэнть вельде Кочкур велесэ панжсть модульной од ФАП. Сон ашти пек паро таркасо – велень администрациянть ды школанть вакссо. ФАП-сь ней од, валдо, лембе, эйсэнзэ ули неень шкань оборудования. Ветеце ие ФАП-нь прявтокс важоди Любовь Валентиновна Ермошкина.
– Мон чачинь теке велесэнть. Тетям-авам пингест перть роботасть паксясо-фермасо. Семиясонок ульнинек вете эйкакшт. Весе теске эрятано. Школанть прядомадо мейле тонавтнинь Орданьбуень медучилищасо медсестрань тевентень. Тукшнось мелезэнь те профессиясь, секскак кочкия медицинанть, – ёвтни минек героинясь.
Медучилищадо мейле сон 23 иеть роботась Дубёнкань райононь больницясо, ульнесь терапевтической отделениясо ды чинь стационарсо медсестракс. Покш коллектив, ламо тевть. Ней вана эсензэ велень ФАП-со лезды эрицятненень. Ломантне пек кецнить од ФАП-нтень. Таштось аштесь чувтонь кудосо, тозонь эрявсь теемс покш витнема-петнема.
– Эрьва чи сакшныть 10–12 ломанть. Кинь давлениязо покш, кинь, мекевлангт, валги. Бути врачось кармавтсь путомс сэредицянтень уколт, кемень чить путнян. Яксян кудоваяк, кинь арасть виест пачкодемс тей. Кучнян лецямо Дубёнкань врачтненень. Ней юты гриппте вакцинация. Путнян прививкат. Истя жо вановтон ало 43 эйкакшт. Сыненст яксян прививкань путнеме школав, – пачтясь Л. В. Ермошкина.
Од ФАП-сонть эрьва кодамо оборудования: ЭКГ-нь аппарат, электрической сталмонь онкстамкат, эйкакшонь онкстамкат, сухожаровой шкаф ды седе тов. Улить озамонь ды мадемань таркат.
Любовь Валентиновна кенери эрьва ков. Якси велень аватнень марто СВО-в кекшемань алтымань кодамо. Яви мель велень эрямонтень, лезды эрьва мейсэ. Кавто тейтерензэ эйстэ вейкесь прядызе Н. П. Огарёв лемсэ МГУ-нть, важоди фармацевтэкс. Тусь аванзо киява.
Кочкур веледенть ды сонзэ лия эрицятнеде седе домкасто пачтятано газетань сы номертнэсэ.
Татьяна Маторкина