Тедедень июлень 10-це чистэ Вирь Тавла велесэ ютавтови раськень ёнкс марто «TAVLA TRAIL» спортонь фестиваль. Сонзэ арсицятне-пурныцятне – Андрей Викторович Соломкин прявтсо «SaranskRUN» чийнемань клубось.
Эряви ёвтамс, те проектэсь невтезель Россиянь трейлэнь IV-це форумсонть, конась ютавтовсь те иень январень 22-23-це читнестэ. «TAVLA TRAIL» чиемась ульнесь меляткак. Ансяк сестэ те теевсь варчамонь кисэ. Пурнавкшность 30 спортсмент Россиянь колмо регионтнэстэ.
Кодамо карми фестивалесь те иестэ ды мезе арсеви чиицятнень ды инжетнень туртов, теде кортнинек сонзэ арсицянть-анокстыцянть Андрей Соломкин марто.
– Андрей Викторович, васняяк ёвтадо, мекс фестивалень ютавтома таркакс кочказь Вирь Тавла велесь?
– Минек фестивалесь раськень ёнкс марто. А те велесэнть течинь чис эри эрзянь раськень ойме. Йовлань Олонь лемсэ Этно-кудось тееви минек мероприятиянь куншкакурокс. Тесэ вастсызь инжетнень, содавтсызь сынст эрзянь койтнень-кирдатнень марто, каванясызь раськень ярсамопельтнесэ, невтьсызь аватнень-цёратнень мазыйдеяк мазый оршамопельтнень. Бути кинь карми мелезэ, ютавтови экскурсия «Этно-кудо» музеень нупальтнева. А этнопарксонть инжетнень кенярдовтсызь аволь ансяк тесэнь керсицятнень кедьсэ анокстазь чувтонь теевкстнэ, истя жо – Тюштянь налксематне. Эрьвась варчасы налксемс чувтонь оскасо, ускомс пикс ды кирнявтнемс кескавсо. Тестэ ушодови чиемаськак. Тень туртов те веленть перька аштиця виртне-паксятне пек ладить. Ды тешкстама сеньгак, велесь ашти Саранск ошонть эйстэ овсе аволь васоло, автобустнэяк ардтнить сеедьстэ.
– Ёвтнеде фестивалень программадонть.
– Мерян сеске, программась пек сюпав. Чинзэ перть карми важодеме кедьчелькевень выставкась, весе сыцятнень эсь шкинемасо кенярдовтсызь раськень моронь творческой коллективтне. Весень туртов истя жо карми важодеме «Этно-кудо» музеесь, косо алкукс ули мезе ваномс. Чиемань старттнэ кемекстазь валскень 10 часос. Весемезэ теевить ниле дистанцият – 30 вайгельбес, 17 вайгельбес, 8 вайгельбес чиемат ды эйкакштнень чиемась. Истя жо ютавтови велосипедсэ ардома. Мейле арсеви изницятнень каземась. Весе участниктне андовить тантей ярсамопельде. Седе тов инжетнень туртов мелстуиця невтема анокстасть чувто ланга керсицятне. Кенярдовтыцякс карми творческой программась. Ды теньсэ фестивалесь прядови.
– Кинень мереви невтемс эсь ёрокчинть чиематнесэ?
– 8, 17 ды 30 вайгельбень дистанциятнесэ чиемс мереви 16 иестэ саезь. Эйкакшонь чиемасонть пелькстамо нолдавить 6 иестэ саезь 15 иес. Нама, васняяк мельс саема эсь шумбрачинь ёжонть. Тесэ эрьвась эсь прянзо кисэ ответственность канды сонсь. Тень стувтнемс а эряви.
– Бути чиицясь кочкась эстензэ дистанция, мезе теема седе тов?
– Ломанесь кемекстызе эсензэ туртов кармамс трейлэнь участникекс. Тень туртов эряви сёрмадстомс эсь прянть ПроБЕГ.орг. платформанть вельде, косо тешкстама, кодамо дистанция сон кочкась. Сонензэ максови участникень номер, чиемстэ сонзэ понгавтома мештьс, штобу сон вадрясто неяволь. Эсь номерэнть полавтомс а мереви. Эрьва чиицянтень мартонзо эряви саемс ведь, телефон, косо сёрмадозь мероприятиянь ютавтыцянть номерэзэ. Теке марто улест трейлэнь туртов кроссовкат, дистанциянь карта, дистанциянь трекесь, конась совавтозь спортивной частнэс эли телефонс. Эрьва дистанциянть ютамга кемекстазь шка. Невтемга, 30 вайгельбетнень ютамонть лангс явовить 5 част, 17 вайгельбетнень – малав колмо част, 8 вайгельбетнень – 1,5 част. Неть шкатне, паряк, полавтовитькак. Вансынек, кодамо карми пертьпельксэсь.
– Мезе чиицятнень туртов теезь дистанциянь трассаванть?
– Чиема таркась весе ваннозь педе-пес, сон вадрясто анокстазь. Эрьва 30-50 метрань тарка тееви тешкс, седе стака участкатнесэ аравтовить кинь невтемат. Истя жо эрьва чиицянтень максови карта, конадонть а эряви стувтнемс. Теке марто кармить важодеме волонтёрт, конатне лездыть куш кодамо тевсэ.
Теде башка, трассанть кувалт, кодаяк 5-8 вайгельбень ютазь, кармить важодеме ярсамонь туртов пунктт. Максови ведь, фруктат, кши ды лия ярсамопельть. Финишентень пачкодемстэ жо весе участниктне андовить седе вадрясто.
– Нама, весень туртов учовиксэкс карми изницятнень лемест ёвтамось. Мезе арсеви те пелькссэнть?
– Изницятне кочкавить финишс васенцекс сыцятнень ютксто. Весементь мельга карми домкасто ваномо прявт судьясь – Алексей Владимирович Бебенов. Эрьва дистанциясонть теевить колмо таркат. Цёратнень ды тейтерь-аватнень туртов сынь кемекставить башка. Эрьвась тешкстави грамотасо ды питней казнесэ. Теде башка изницят ёвтавить Masters категориясонть (45 иестэ саезь ды седе сыретне). Сынь истя жо ёвтавить эрьва дистанциясонть (цёрат ды тейтерь-ават). Эйкакшонь чиемасонть рейтинг а ютавтови. Весе участниктненень максови финишёронь медаль ды казне.
– Андрей Викторович, чиицятне ансяк эсенек республикань эрицятне, эли жо мероприятиянь участниктнень географиясь седе келей?
– Фестивалесь ютавтови келейстэ, секскак учотано весень. Неень шкане эсь пряст сёрмадстызь Мордовиянь, Пензань ды Нижегородской областтнень чиицятне. Шкась эштё аламошка ули, арсеви участниктне седе ламолгадыть ды эсь ёрокчинть невтеме сыть лия регионтнэстэяк.
– Чиемась яволявтозь раськень ёнкс марто. Васенцесь тесэ, сон карми эрзянь велесэ, косо ванстовсть раськень койтне-кирдатне. Мезе эштё учи инжетнень?
– Ёвтаса, те мероприятиясь целанек арсезь раськень ёнкс марто. Тесэ ули эрзятнень инжень вастомань коесь, раськень ярсамопельтне, эрзянь ды мокшонь кельтнесэ гайгиця моротне, мазыйдеяк мазый оршамопельтне. Ды прявтось – минек казнетне весе раськень колорит марто. Тесэ – финишёронь медальтне, участниктнень туртов футболкатне, пряс путомкатне, кескавнетне ды седе тов. Весе сынь раськень тешкс марто. Арсеви, туить весень мельс ды кепедьсызь ёжонть.
Фестивальсэнть карми ламо мезе мельстуиця. Секскак илинк менстя сонзэ, садо. Покш мельсэ учотано весень!
Юлия Еремина