Аволь умок весе масторось тешкстызе Раськетнень вейсэндявомань чинть. Кода содатано, Россиясо ояксчисэ эрить ламодояк ламо эрьва кодат раськеть. Эрьвась сюпав эсь культурасонть, койтнесэ-кирдатнесэ. Эрьванть каштанчикс ашти мазыйдеяк мазый, лия ёнов а молиця келесь.

Кода сёрмадсь эрзянь сказительницась Серафима Люлякина эсь валморосонть: «Эрьва келесь эсь койсэнзэ мазый, эрявикс, питней. Илядо стувто эйсэнзэ, путодо тензэ седей…». Алкукс, кодамо гайгиця ды мазый минек эрзянь келесь! Сонзэ эряви ванстомс эрьвантень – кортамс эрзякс эйкакштнень марто, ванстомс культуранть ды койтнень, снартнемс вельмевтемс стувтозенть. Те ёнкссонть покш важодема ветить велень школатнесэ важодиця тиринь келень тонавтыцятне. Истятнэнь ютксо Дубёнкань райононь Кочкур велень средней общеобразовательной школань рузонь келень ды литературань ды эрзянь келень ды литературань тонавтыцясь, Российской Федерациянь образованиянь Почётной роботникесь Татьяна Васильевна Цыганова.

Тонавтыцянь тевесь

Т. В. Цыганова чачсь Дубёнкань райононь Орданьбуе велесэ. Школадо мейле тонавтнесь Н.П. Огарёв лемсэ МГУ-нь филологиянь факультетсэ. Вузонть прядозь, кучизь важодеме Кочкур велень средней школав. Ды вана уш колоньгеменце ие роботы тонавтыцякс. Эйкакштненень вети рузонь ды эрзянь кельтнень ды литературатнень.

Кода ледстни Татьяна Васильевна, важодемань васенце иестэнть сон ансяк варчнесь эсь маштомачитнень, тонавтнесь эйкакштнень марто важодемантень. А сёпи, ульнесь а шожда, эдь сонськак эштё овсе одоль, ансяк прядызе университетэнть, ды покш классонь тонавтницятне ульнесть малав эсензэ иесэ. Одчинть лангс апак вано, тевензэ содась: эйкакштнень марто важодсь парсте, макссь тенст эрявикс содамочитнень. Эзь аште ве ёно общественной тевтнень эйстэяк. Школань прявттнэ тень редясть ды уш важодемань омбоце иестэ Татьяна Васильевнанень максозель классонь ветямось. Истя, покш эрямос сон нолдась колмо класст, ней аноксты нилеце. Весе выпускникензэ муизь эрямосо кист, школадо мейле получасть эрявикс профессия. Ды течияк ёвтыть покш сюкпря эсь тонавтыцятненень.
Кочкур велень средней школась ловови национальной школакс. Эрзянь келентень эрьва классонть недлязонзо явови 1 час, истя жо тиринь литературантеньгак.

– Малав колоньгемень иеть уш эскельдясть, кода мон ветия эсь васенце уроком. Шкась ютась, эзь марявояк. Весе неть иетнень перть мон тонавтан эрзянь келенть ды литературанть. Минек Кочкур велесь – эрзянь кезэрень веле. Секскак школасо эрзянь келенть ды литературанть тонавтомантень мелесь явови. Минь, тонавтыцятне, уроктнень ютавтомсто бажатано тевс нолдамс неень шкань од ёнкстнэнь ды технологиятнень, мезесь лезды кастомс тонавтницятнень содамочитнень вадрячинть. Видьстэ тенк ёвтаса, эрзянь келенть мон пек вечкса, ды эйкакштненьгак тонавтан эсь тиринь раськень келенть, культуранть ды койтнень-кирдатнень вечкеме. Эдь бути минь ванстсынек эсь тиринь келенек ды культуранок, минь ванстсынек эсь раськентькак, – корты Татьяна Васильевна.

Теке марто Татьяна Цыганова эйкакштнень марто свал муи кель-вал, эрьванть чарькоди, эрьвантень лезды. Сон кемексты: тонавтыцянть васень тевезэ – эрьва эйкакшонть эйстэ кастомс алкуксонь ломань. Сон тонавты сынст эсь раськенть, сонзэ ине подвигтнень кувалма каштанчисэ аштемантень, тиринь эрзянь келенть ды чачома масторонть вечкемантень. Эдь весе неть ёнкстнэ невтить алкуксонь патриотонть.

Н. П. Огарёв лемсэ МГУ-нь филологиянь факультетэв тонавтнеме молемстэ Т. В. Цыганова содась, тонавтыцянь тевесь пек мелявксов. Ды те алкукс истя. Эрьванть пельде сон веши ответственнойстэ кандовома, свалшкань мелявтома ды апрядовиця вийть. Ансяк пек сюпав содамочи марто, панжадо ды лембе седей ломанентень те тевесь ули виень коряс. Татьяна Васильевнань весе неть ёнкстнэ улить ды сон эрьва эйкакшонть оймесэ машты кирвазтемс сяткине.
Эряви тешкстамс сеньгак, Татьяна Васильевна эсь тевентень кандови творческой ёнкс марто. Сон чарькоди эрьва тонавтницянть, реди эрьванть содамочинзэ ды ёрокчинзэ. Секскак уроктнень вети истя, штобу покш мельсэ кунсоловоль эрьвась. Тонавтома лувонтень совавты интеллектуальной пелькстамот, эрьва кодат просветительской ды культурной мероприятият. Ды домкасто ваны сень мельга, штобу неть пелькстамотнесэ ды мероприятиятнесэ эсь ёрокчинть невтевлизе эрьва тонавтницясь.

Эряви меремс, весе теньсэяк Татьяна Цыганова яви башка мель тиринь келентень, эрзянь раськень койтненень-кирдатненень. Вейсэ тонавтницятнень марто анокстыть-ютавтыть конференцият, конат алтазь эрзянь содавикс сёрмадейтнень творчестваст туртов.

– Зярдо эйкакштне киштить-морыть, ловныть стихть – сынь эсь прянть марить эрявиксэкс, теде башка, те касты дисциплинанть ды ответственностенть. Кода содатано, те весемесь покш тарка саи ломаненть эрямосо, – тешксты Татьяна Васильевна.
Кода ёвтнесь Кочкур велень средней школань прявтось Валентина Васильевна Шлабина, Татьяна Васильевнань тонавтницянзо аволь ансяк райононь ды республикань пелькстамотнень ды олимпиадатнень изницят, истя жо сонськак сеедьстэ лисни изницякс эрьва кодамо конкурссо.

– Сон алкуксонь тонавтыця. Важодеманть шождасто лади эрьва эйкакшонть марто. Парсте соды, кода кепедемс мелест тонавтнемантень, – кемекстызе Валентина Шлабина.

Семиядо

Кочкур велев Татьяна Васильевна сась уш малав 30 иеде икеле. Тесэ теевсь содавиксэкс вечкевиксэнзэ марто ды 27 иеть мирдензэ марто кавтов явить кода весе кеняркстнэнь, истя жо мелявкстнэньгак. Виктор Николаевич ламо иень перть роботась эсест велень колхозсо агрономокс, ней ардтни шабра районов, важоди велень хозяйствань покш предприятиясо. Цыгановтне трясть-кастсть кавто тейтерть. Покшось, Мария, тусь аванзо киява: прядызе эсенек университетэнь филологиянь факультетэнть, ней тонавтни аспирантурасо. Наталья истя жо пек вечксы филологиянть, сёрмады ёвтнемат эрзянь кельсэ, лиссь жо истя, кочкизе медицинанть – тонавтни Саранск ошонь медицинской колледжсэ. Теке марто филологокс тонавтнемась превсэнзэ эштё ули. Корты, прядсы колледженть ды моли тонавтнеме Н. П. Огарёв лемсэ МГУ-нь филологиянь факультетэв.

Юткошкасто

Татьяна Цыганова важодемасояк весементь теи вадрясто, юткошкастояк бажи ламолгавтомс эсь содамочитнень. Секскак аволь ансяк эрзянь ды рузонь кельтнень коряс олимпиадатненень ды пелькстамотненень яви покш мель, эсь содамочинзэ невти тиринь келенть марто сюлмавозь социальной сеттнесэ ютавтовиця конкурстнэсэяк.

Истя, маенть ушодовомсто тиринь «Эрзянь правда» газетань «ВКонтакте» ды «Одноклассники» социальной сеттнень куротнесэ яволявтозель «Монь Россиям» пелькстамось. Минек ловныцятне кучнесть фотографият, конатнесэ невтевсь эрзянь кельсэ вечкевикс газетась минек масторонь куш кодамо велесэ эли ошсо аштиця достопримечательностенть, кеврунгонть эли лия ёнов а молиця теевксэнть маласо. Лиятне арсесть, косо теезь фотографиясь ды мезе лангсонзо невтеви. Эрьва ковсто ёвтавильть пелькстамонь изницятне – кие кучсь седе ламо фотографият ды истя жо, кие содась седе ламо таркат.

Май ковсто пелькстамонтень кучозь фотографиятнесэ невтезь таркатнень содамонь коряс явовськак Татьяна Цыганова. Сон лиссь васенце изницякс. Мартонзо вастовомсто минь тень эзинек стувто ды казинек Татьяна Васильевнанень эсенек пельде а покшке казне.

Юлия Еремина