Вишка пингестэ саезь сон эзь пеле сценадо, эзь визде ломанде. Эйдень кужосо эрьва кенярксчисэ свал ловнось стихть, конатнень тонавтнесь кудосо аванзо марто. Ваныцятне каршонзо мизолдыть ды виевстэ цяпить, тейтернентеньгак мельспаро. Паряк, самай сестэ вельмесь вечкемась сценантень. Стихень ловномась поладовсь школасо тонавтнемстэяк. Вейксэ иесэ тетязо-авазо ветизь Республикань эйкакшонь хореографической школав. Се шкастонть саезь эрямозо кеместэ сюлмавсь киштематнень марто. Ды ней Татьяна Дудникова важоди И. М. Яушев лемсэ оперань ды балетэнь театрасо балетэнь артисткакс.
Эйкакш поразо
Седе тов сон поладызе тонавтнеманзо Н. П. Огарёв лемсэ МГУ-нь Национальной культурань институтсо. Кочкизе народно-художественной творчестванть (национальной хореографиянь кафедранть). Теде икеле, 17 иесэ, кармась важодеме И. М. Яушев лемсэ оперань ды балетэнь театрасо.
– Коллективесь вастымим лембестэ, лездасть, путсть превс. Эштё хореографической школасо тонавтнемстэ минек тердтнесть театрав, зярдо тосо балетэнь путомсто эзть сатно тейтернеть. Секскак кодамояк пелема арасель. Аламодо талнынек, эдь минь школасо тонавтницят, ве сцена лангсо аштетяно содавикс артисттнэнь марто. Се шкане театранок ульнесь Рузонь драмань театрань зданиясо. Репертуарось аволь истямо покшоль, кодамо ней. Путовкстнэде аламольть, зяро-бути балетт, опереттат. 2011 иестэ ютынек эсенек зданияс. Ды тесэ ушодовсь оперань ды балетэнь театрань од историясь, – ледстни Татьяна.
Савкшны ансяк дивсемс, кона шкане сон кенерсь тонавтнемс вузсо, якамс репетицияв ды теемс партиятнень балетсэ. Национальной культурань институтось ульнесь Ленинэнь проспектсэ ташто зданиясо, тонавтнемань зярыя корпусонзо сравтовсть ошонь келес. Зярдо панжизь ИНК-нть эсензэ кудонзо – кенярксось а ёвтавишкаль. Весе ве таркасо ашти, теде башка, театрась – кинь трокс.
2012 иестэ Татьяна невтизе прянзо «Татьянин день» ошонь конкурссо, косо пелькстасть минек вузтнэнь студенткатне, кинь лемест Танят. Тосо сон саизе Гран-принть. Теде мейле кармась анокстамо «Мисс студентка Финно-Угрии 2012» Раськеютконь I-це конкурсонтень. Сон пелевес кирдевиль институтсо. Тонавтнесь кортамо, важодеме микрофон марто, мазыйстэ якамо сцена ланга ды седе тов. Пелькстамось зярыя чинь перть мольсь Марий Элсэ. Тосояк сон изнясь! Те конкурсось ютась васенцеде, сон поладови нейгак. Иень ютазь сонзэ кучизь Татарстанов «Татьяна Поволжья-2013» конкурсов, косо саизе васенце тарканть.
– Весе пелькстамотнес ды кочкамонь этаптнес монь анокстасть Н. П. Огарёв лемсэ МГУ-нь Культурань ды искусствань кудонь прявтось Н. В. Атитанова ды командазо. Покш сюкпря тенст! Теезель покш тев, минь парсте невтинек Мордовиянть, – ёвтни Татьяна Дудникова.
Шкинемазо
И. М. Яушев лемсэ оперань ды балетэнь театрасо Татьяна важоди весе репертуарсонть. Улить сольной партият зярыя балеттнэсэ. Театрасонть балетэнь артисттнэде малав 50. Ды те аламо. Покш путовкстнэс эрявить ламо артистт. Зярдо сынь а сатныть, савкшны налксемс эштё рольть. Нурька шкас оршамс лия костюмт ды лисемс одс сцена лангс. Эрьва путовксонть лангсо важодить ламо ломанть: оперань труппась, оркестрась, балетмейстертнэ-путыцятне. Балетсэ валт арасть, ёжомарямотне невтевить эскелькстнэнь, ютамотнень, жесттнэнь, мимиканть вельде. Ваныцясь весементь чарькодевлизе валтомо. Нама, тенень лездыть оршамопельтне, декорациятне ды музыкась.
Татьянань улить сольной партиянзо истят балеттнэсэ: П.И. Чайковскиень «Лебединое озеро» (покш локсейть, рузонь ды испанонь киштемат, одирьвань вальс); П.И. Чайковскиень «Щелкунчик» (рузонь някат); Л. Минкусонь «Дон Кихот» (ульцясо киштиця, Мерседес, «Болеро»); К. Караевень «Семь красавиц» (магрибской ды византийской мазыйкат); Ц. Пунинь «Эсмеральда» (цыганава, Эсмеральдань ялга); С. Прокофьевень «Ромео и Джульетта» (Джульеттань ялга); Н. Кошелевань «Мордовская легенда» (Нешке пере ава); А. Лядовонь «Гуси-лебеди» (Алёнушка); Р.Щедринэнь «Конёк-горбунок» (рузонь лирической киштема) ды ламо лият.
– Монень пек вечкеви «Кармен» балетэсь. Сон пек мазый, неень шкань. 2014 иестэ сонзэ невтинек Франциясо. Кавто ковонь перть ардтнинек малав весе те масторонть. Мелят ульнинек Китайсэ. Тосонь эрицятне пек вечксызь «Лебединое озеро» балетэнть. Кить бу тенст а савольть Россиясто, свал вешить те путовксонть. Истя жо ульнинь Румыниясо, Венгриясо, Таиландсо, Италиясо. Вечкевикс профессиям лездась неемс модамасторонть. Ваныцятне вастыть эйсэнек пек лембестэ. Келень апак сода, кедьсэ-сурсо невтнезь, ёвтыть сюкпрянь валт, кода тусь мелезэст. Нама, эрьва масторонть эсензэ менталитетэзэ. Лиясто ансяк лисят сцена лангс, мезеяк эштё эзить тее, ваныцятне жо ушодыть виевстэ цяпамо. Эрси мекевлангт, ашти истямо каштмолема, пелят лексемедеяк! Италиянь ломантне гайтевстэ невтить ёжомарямост. Минь тень коряс ков седе сэтьметь ды чатьмоницят, – корты артисткась.
Паряк, киненьгак маряви, актёронь тевесь шождыне ды стяконь. Те аволь истя. Эрьва чи ютыть репетицият, чокшне ланга – невтевить путовкстнэ. Оймсема чись недлязонзо ансяк вейке. Сеедьстэ тукшныть гастролев. Важодемань чись ушодови уроксто, косо рунгось анокстави репетицияв. Эряви видестэ ливчакавтомс мышцатнень, видемтемс сантнэнь, иляст уле кодаткак томбавомат ды лия апаро тевть.
Татьянань тетязо-авазо – эрзянь ломанть. Павел Петрович чачсь Покш Березникбуень Шугурвелесэ, Анна Фёдоровна – Дубёнкань райононь Кочкурвелесэ. Вастовсть сынь Саранскойсэ ды сюлмизь эрямост. Вейсэ эрить ламо иень перть. Денис цёраст (сон васенце эйкакшост) истя жо прядызе Республикань эйкакшонь хореографиянь школанть. Тонавтнесь Н. П. Огарёв лемсэ МГУ-нь ИНК-со. Важодсь Рузонь драматической театрасо. Прядызе Санкт-Петербургонь культурань ды искусствань государственной институтонть. Вуздо мейле кадовсь теке ошсонть. Яви мель народной киштематненень. Мелят сон сакшнось минек ошов. Нама, якась И. М. Яушев лемсэ оперань ды балетэнь театрав, косо важоди сазорказо. Пек дивазевсь ды кецязевсь, кода покшолгадсь театрась, кодат мельстуиця путовкст тесэ невтить. Эдь сонзэ шкасто мезеяк истямо арасель. Тесэ ули эсенек режиссёр, тердевить путомо лия ошстояк. Театрань репертуарсо модамасторонь классикась.
Татьянань мирдезэяк – балетэнь артист. Сон важоди Мордовиянь государственной филармониянь «Лейне» народной киштемань ансамблясо. Од ломантнень вейсэнди вейке тевесь, те лезды седеяк парсте чарькодемс вейкест-вейкест.
Татьяна Маторкина
Артовкстнэ Юлия Бакаевань