Редакциянь тевтнень коряс аволь весть савкшнось ардтнемс Орданьбуень районов. Ансяк вана Низовка велесэ вестькак араселинек. Те кезэрень эрзянь велесь дивавты мазычисэнзэ ды ломаньсэнзэ. Велесэнть якинек школав, теевинек содавиксэкс Михаил Архангел лемсэ церьковань настоятеленть, архимандритэнть Михаил (Калинкин) марто, ульнинек ФАП-со ды ванынек, кода аватне кодыть СВО-в кекшемань алтымат. Минек мельспаросо вастымизь Низовкань велень поселениянь прявтонь тевтнень топавтыцясь Светлана Ермолаева.
– Светлана Михайловна, евтнеде, инескеть, кода эри Низовкась течи?
– Сермадстомань коряс велесэ эрицятнеде 524. Минек ломантне важодемань вечкицят, тевтеме а аштить. Роботыть «МАПО «Ардатов» ООО-со, Отяжбуень сывелень комбинатсо, Чаунзань нармунень фабрикасо (мельгаст сакшны транспорт), цератне ардтнить Московов. Школасонок важодить аволь ансяк Низовкань ломанть, улить тонавтыцят Пиксяськасто, од специалисттнэ ардтнить Орданьбуестэ. Велесэнек ули школа, эйдень кужо, ФАП, Михаил Архангел лемсэ церькова. Кото ульцянок. Сехте покш мелявксонок – китне. Ниле куротнева ули асфальт, Луговая ды Молодежная ульцятнесэ арась. Лиятненьгак эрявить витнемс. Мезе парось, Орданьбуе станциянть видьс кись федеральной, сон витнезель «Качественные и безопасные дороги» национальной проектэнть вельде. Тельня ловдонть весе китнень уряды МАПО-сь. Покш сюкпря тенст тень кисэ! Тедеде васенцеде явтано мель самообложениянь программантень. Луговая ульцяванть теевттяно ялго якамонь ки – 2,8м келесэ. Эрицятнень пельде зярс пурнынек 750 тежат целковойть. Седе тов арсетяно паролгавтомс калмолангонть, пилямс сыре ды покш чувтотнень. Тунда покш мелявксось – веленть малава луганаронь пултамось. Арсян, те стакачись весе велетнень. Улкоть истямо тев пек тандавтымизь Чукало велень прявтонть Г. В. Литюшкинань марто – кирвазекшнесть латкотне. Штобу толось илязо туе веленть енов, граблясо мадстинек. Бути мезе – пожарнойтнеяк ардыть куроксто, ансяк эстетькак эряви улемс, кода мерить, «на страже».
Низовкасо улить фермерткак. Александр Валентинович Клементьев кирди сюракшов ракшат (КРС). Низэ, Татьяна Викторовна – Культурань кудонь прявт. Сынст колмо эйкакшост. Эште вейке фермерэсь, Павел Яковлевич Клементьев, видни сюрот.
Улить ламо эйкакшонь триця семияткак: Солодинтнэ, Волковтне, Чайниковтне, Ермолаевтне, Романовтне.
«Комплексное развитие сельских территорий» нацпроектэнть вельде Низовкасо теезь стадион, ветязь ки ловсонь фермантень.
Светлана Михайловна чачсь Низовкасо. Средней школанть прядызе Чукало велесэ. Тонавтнесь Н. П. Огарев лемсэ МГУ-нь филологиянь факультетсэ. Колмо иеть направлениянь коряс роботась Орданьбуень Луньгасо. Тосто велявтсь Низовкав. Васня ульнесь эсензэ школасо продленной группань воспитателекс. Шкань ютазь ушодсь ветямо рузонь ды эрзянь келень урокт. Роботась завучокс. 1996–2012 иетнестэ – школань прявтокс.
– Минек сестэ ульнесь основной общеобразовательной школа. Вейксэ класстнэнь прядомадо мейле эйкакштне тукшныльть техникумов, чуросто вузов. 10-11-це классо тонавтницятненень савкшнось якамс 5 вайгельбеть Чукалонь средней школав. 2002 иестэ велезэнек сакшность покш инжеть. Минь евтынек энялдоманок – эряви тенек средней школа. Сестэ райононь прявтокс роботась Б. И. Шаталин. Кунсолымизь. Лездасть. Школань стявтомась курок ушодовсь. Ташто школанть вальмава минь ванынек, кода стявтови мазый зданиясь, ды кодаяк эзь кемеве – карми од школанок! Сонзэ строясь Н.В. Бугуевень строительной организациясь, ней уш те ломанесь арась ютксонок, ансяк Низовкань эрицятне те шкас лембе валсо ледстнить сонзэ. 2003 иестэ велесэнек панжовсь од школа. Теде мейле кармасть сиянь ды сырнень медалистэнек, тонавтницянок тукшность тонавтнеме вузов. Кармась ардтнеме школань автобус, класстнэ покшолгадсть. Сестэ ульнесть 130–150 тонавтницят. Школась – те сехте эрявикс веленть туртов. Ули школа, веленть карми сы шказо, – евтни Светлана Михайловна.
2012 иес сон роботась школань прявтокс, седе тов семиянь тевтнень кувалма савсь туемс. Мирдензэ марто чачтсть-кастсть кавто эйкакшт, сынь важодить врачокс. 2023 иестэ Светлана Михайловнань ладизь велень прявтонь тевтнень топавтыцякс.
– Минек велень ломантне вадрят, тевде а пелицят, весень ули техникаст, машинаст. Тееви кодамояк кажо – ве ено а аштить, пурнавить вейс, пшкадят кодамояк энялдома марто – лездыть, – корты С. М. Ермолаева.
Башка валт эряви евтамс Валерий Федорович Ратниковдо. Те ломаненть Низовкасо содасы эрьвась. Сон важодсь школасо физкультурань тонавтыцякс. Пингензэ перть покш мель яви краеведениянтень. Парсте содасы велень историянть, улить археологической муевксэнзэ. Мартонзо эряви теемс башка материал.
Максыть лезкс СВО-нтень
Низовкань аватне а аштить ве ено, СВО-нть ушодовомадо мейле кодыть кекшемань алтымат. Те велестэнть зярыя церат кармасть специальной военной операциянь участникекс.
– Кекшемань алтыматнень кодамо карминек мелят, 2024 иестэ. Минь васня ардтнинек Орданьбуев кодамо, пурнавтано ниле ломанть, сиведтяно транспорт. Седе тов сынек мельс кодамс эсенек велесэ. Мирденек тейсть станок-основания. Васня ламот сакшность кодамо, ней – 12-13 ломанть. Сюкпря аватненень! Чизэнзэ кавто алтымат кодатано. Весемезэ кодынек малав 300. Теде башка, кудосо аватне тейнить нашлемникть, эйстэст малав 250 теезь. Усктано сынст Орданьбуев, а тосто уш кучить СВО-в. Ламо стынек алга оршамот госпиталев. Пурнатано гуманитарной лезкс. Кавто лавкава ладинек банкат, кие зяро максы. Алтыматнеде седеяк ламо кодавлинек, ансяк лиясто а сатны материалонок. Спонсоронок кияк арась. Весе минсь. Покш меленек лездамс цератненень, эрьва алтыманть кодамсто арсетяно, кадык Пазось идесынзе цератнень, кадык седе куроксто весемесь прядови, – евтни велень ветеранонь советэнь прявтось Галина Кочеваткина.
Самай сон Интернет вельде рамси материалонть, вети отчет. Галина Михайловна чачсь Орданьбуень Кеченьбиесэ, прядызе Н. П. Огарев лемсэ МГУ-нь экономической факультетэнть. Эрямонзо перть важодсь бухгалтерэкс.
Мария Николаевна Дугушкинань профессиязо стыцянь. Школадо мейле кавто иеть тонавтнесь Рузаевкасо портноекс. Седе тов важодсь Орданьбуень КБО-со стыцякс, стась эрьва кодат оршамопельть. 90-це иетнестэ важодсь фермасо, кондитерской цехсэ. 2012 иестэ саезь роботы Низовкань школасо пидицякс-паницякс. Эрьва чи валске марто анды 50 эйкакшт, чикуншкане школань столовоентень чиить 100. Кудосо жо Мария Николаевна топавты лия паро тев – сты СВО-в цератненень алгапонкст, алтыматнень кучомс кескавт. Ломантне веленек кандыть тензэ коцт. Стамонь машинказо электрической. Авась машты эрьва мезень стамо, натой эрзявань костюмткак. 90-це иетнестэ костояк мезеяк а рамавиль, сон стыль ламо оршамопельть, курткаткак. Од иень кенярксчис эйкакштненень мазый костюм мельга таго пшкадильть сонензэ.
Низовкантень ды сонзэ эрицятненень алтатано зярыя статьят, конат лисить газетань маласо номертнэсэ.
Кода а ледстямс Низовкань «Цековне» народной фольклорной ансамблянть? Тосо морсить тонавтыцятне, фельдшерэсь, библиотекаресь ды лият. Коллективенть вети баянистэсь В. В. Тюгашкин. Аватнень пек мазый ды виев вайгелест. Сынь сеедьстэ морсить райононь сцена лангсо, Саранскойсэ, республиканть томбале. Ваныцятне свал вастыть аватнень пси цяпамосо.
Татьяна Маторкина
Фототне Егор Горинэнь