Даволковонь 3-це чистэ Мордовиянь Прявтось Владимир Волков ульнесь МР-ва Россиянь Следственной комитетэнь Следственной управлениянь коллегиянь келейгавтозь промкссонть, кона алтавсь ведомствань 2019 иестэнть важодемань тевтненень ды икеле шкантень аравтлувонть кемекстамонтень.
Промкссонть тешкставсь, ютазь иестэнть управлениянь следовательтнень вийсэ ваннозь 5 тёжадо ламо пачтямот закононь коламотнеде. Производствасо ульнесть уголовной 930 ламо тевть. Покш мель явовсь сеть зыянтнэнень, конат теевсть кемгавксово иеде вишкине эйкакштнень коряс, коррупциянть марто бороцямонтень, эрицятнень трудонь праваст идемантень. МР-ва Россиянь СК-нь Следственной управлениянь прявтось Анатолий Ситников тешкстызе, важодемась ветявсь прокуратуранть, правоохранительной ды контролирующей органтнэнь марто кеме сюлмотнень кирдезь.
Мордовиянь Прявтось Владимир Волков, коллегиянь промкссонть кортамсто, эсь вановтонть каизе сеть кевкстематнень лангс, конат вешить домка ваннома. Сынст ютксо – закононь коламотнень панжоманть кастомась, экономикань ёнкссонть преступлениятнень лангс ливтеманть коряс важодеманть виевгавтомась.
«Мордовиясь эрязасто совась национальной проекттнэнь топавтомантень, конатне тевс нолдазь Россиянь Президентэнть В.В.Путинэнь кармавтоманзо коряс. Федеральной бюджетстэ явовить покш ярмакт киланготнень, соцкультбытэнь объекттнэнь, общественной таркатнень тееманть-вадрялгавтоманть лангс, – мерсь Мордовиянь Прявтось. – Теде башка, Россиянь Президентэсь Кучомасонть тешкстась социальной лезксэнь максомань эштё зярыя ёнкст. Секскак миненек вейсэ эряви ладямс домка ваноманть бюджетэнь ярмактнень тевс ютавтоманть мельга, шкастонзо лоткавтомс ярмаконь саламонть, конатне явовить социальной сферань, аватненень ды эйкакштненень лездамонь программатнень тевс нолдамонтень».
Истя жо республикань Прявтось тешкстызе коррупциянь преступлениятнень панжомань эрявиксчинть.
«Коррупциянть каршо бороцямосонть арасть ды иляст уле а токшевикс ломанть, – тешкстызе Владимир Волков. – А тев, зярдо мельде-валдо важодеманть коряс уголовной тевтне лоткавтовить судсо, нама, чумотне жо туить ответственностенть эйстэ».
Эштё вейке эрявикс ёнксось – эйкакштнень зыянтомочись, кона сюлмавозь од ломантнень ютксо криминализациянть марто.
«Миненек неть тевтнень свал кирдема вановт ало, эрязасто явома мель тонавтыцятнень, тетятнень-аватнень, социальной службатнень, волонтёртнэнь пельде пеняцямотненень», – мерсь Мордовиянь Прявтось.
Паро невтемакс Мордовиянь Прявтось ёвтызе аволь умок лисезь тевенть, зярдо Следственной комитетэнь важодицятне лездасть Ковылкина ёнксонь Курнино велень 70 иесэ авантень саемс реабилитационной центрасто кавто нуцьканзо.