Неть читнестэ Мордовия Республикась вастынзе Россиянь зярыя регионтнэстэ сисемзядто ламо инжетнень.
Инекужонь промкссонть минек тиринь газетась теевсь содавиксэкс Надежда Ивановна Гладкова марто, конась сакшнось Саранскоев Самарань областень Васильевка велестэ. Сон эрямонзо перть важоди тиринь велень Культурань кудосо. Тедеде топодсть 24 иеть, кода аванть эрямо кизэ сюлмавсь эрзя-мокшонь раськень культурань ванстоманть ды кастоманть марто. Надежда Ивановнань пек гайтев ды мазый вайгелезэ, сон морси тиринь велень ансамблясо, теде башка, ютавтни куш кодат кенярксчить, мастер-класст ды аноксты оймень салыця выставкат. Велесэнть сонзэ важодеманзо шныть ды ловить пек эрявиксэкс.
Промксонтень авась сакшнось покш мельсэ, нама, лангсонзо оршазель эрзянь раськень оршамопель. Сельметь кадовить костюмонзо ванкшнозь. Весемесь якстерди, цитни, пулаесь гайги… Те эрзянь авась ютамонзо кувалма содави васолдо. Кевкстеманок лангс, мезе жо Надежда Ивановна учи те Инекужонть пельде, сон апак тално ёвтась: «Васняяк вадря ёжо, седе тов жо кадык эрзянь ды мокшонь ломантнень топавтовить весе паро мелест ды арсемаст. Свал гайгезэ тиринь келесь весе масторонть келес!»
Седе тов кортамонть поладынек эрзянь мазый оршамопельсэ эштё вейке аванть Нина Васильевна Мелешина марто. Сон сась Мордовияв Ульяновск ошсто, сови тосонь эрзянь-мокшонь автономияс. Кода карминек содамо, те авась весе эрямонзо алты школасо тиринь келень тонавтомантень. Сон эзизе сёпо сеньгак, кодамо мельсэ эрьва чи яки важодеме.
– Уцяскав ломанесь се – кие эрямосонть топавты вечкевикс тевензэ. Мон лован прям истямокс. Секскак эрьва валске вадря ёжосо ды седейсэ кеняркс марто эрязасто ютан тиринь школав важодеме. Содан, эйкакштне учить пельдень од содамочить. Тиринь кельсэ уроконь ветямось кази мель – эрзянь раськесь эштё эзь ёма, секс мекс улить те кельсэнть кортыцят, сонзэ ванстыцят, – мельспаросо тешкстызе инжесь.
Инекужось Нина Васильевнань туртов – те покш кенярксчи. Авантень сон казсь важодемасонзо седе товгак мелень кепедема ды истя жо кандсь вастовомат ламо содавикс ломань марто.
Алена Артемьева