Пятница, марта 29, 2024
Важное

 

Ловови, Сабантуесь появась малав тёжа иеде икеле. Седе сеедьстэ сонзэ лемдить татартнэнь кенярксчикс. Ялатеке те покш чинть тешкстыть башкиртнэ, чуваштнэ, удмурттнэ ды кой-кона лия раськетне.


«Сабантуй» валось лиссь тюркской кельстэ. Ашти кавто пельксстэ: «сабан» – плуг ды «туй» – «свадьба», «кенярксчи». Лиякс меремс, «Сабанонь кенярксчи», эли «сокицянь-видицянь чи». Языческой шкатнестэ те чистэнть прявт бажамокс ульнесь чевтемгавтомс кежей вийтнень, штобу сынь сёксня максовольть вадря урожай. Сабантуесь ютавтневиль апреленть прядовомсто, зярдо эштё эзть ушодовкшно видематне. Койтнень видестэ ютавтоманть мельга вансть сыре атятне.
Зярдо татартнэ ютасть исламонь кемемантень, койтне аламонь-аламонь полавтовсть ды Сабантуесь теевсь кенярксчикс. Ютавтомань шкаськак полавтовсь – ней сонзэ тешкстыть аволь видематнень ушодовомадо икеле, мекевлангт, прядомадост мейле, зярдо тундонь тевтне ютыть ды ули оймсема шка урожаенть пурнамодо икеле.
Косо чачсь те кенярксчись, учёнойтне те шкас эзизь кемекста. Веенстнэ арсить, чачома тарказо – Равонь Булгариясь (Средней Поволжьясо X-XIII пингетнестэ мастор), лиятнень кемевтемаст коряс, коесь ушодовкшнось монголтнэнь пельде.

Кода ды косо тешкстыть Сабантуенть течи

Кенярксов Сабантуесь, нама, эри ды келейстэ тешкстави неень шкастояк. Полавтовсть кой-кона койтне, тень таркас – седе келейстэ кармасть сонзэ ютавтнеме, лиякс меремс, масторлангонть келес: Вашингтонсо, Монреальсэ, Прагасо, Лейпцигсэ, Парижсэ, Стамбулсо, нама, Московсояк. 2001 иестэ саезь Россиясо ютавтневи Весероссиянь Сабантуй, ды эрьва иестэ фестиваленть ютавтомс кочкави од ош. Тень лангс апак вано, сехте келейстэ сон эрси тиринь ёнкссонзо – Казаньсэ, тосо Сабантуесь ловови государственной кенярксчикс.
Тешкстамонть туртов свалшкас кемекстазь чи арась. Пек эрявиксэсь, штобу эрьгелематне илязт саво Рамадан иневанькс ковонь васенце читнес. Секс теевсь правилакс ютавтнемс сонзэ июньстэ – июленть ушодовомсто. Татарстансо сынь молить зярыя этапсо: васня велесэ, мейле райцентратнесэ, прядови региононь прявт ошсо.


Койтне-кирдатне, эли кода налксемс баранонть

Неень шкасто Сабантуень кезэрень шкань койтне седе пек ванстовсть велетнева. Ушодови сон казнень пурнамосто. Кенярксчиденть икеле чистэнть од цёратне ды цёрынетне алаша лангсо ласте ардтнесызь весе кудотнень. Эрьва косо эйсэст вастыть аволь чавонь кедть: азортнэ инжетненень максыть викшнезь нардамот, прякат, эсест кедьсэ теезь сувенирт ды кедьгеть. Кие пурны сехте ламо истят казнеть, се – молодец, паро цёрась. Ансяк пурназтнестэ тензэ мезеяк а кадови. Весе казнетне пурнавить вейс, ды мейле кенярксчистэнть, конась ютавтови велень куншкакуросонть, явшесызь казнекс.
Сынь казевить эрьва кодамо пелькстамотнесэ ды конкурстнэсэ, конатнесэ пурнавозтне невтить виест ды ёрокчист. Невтемакс, куреш раськень тюремасонть, зярдо каршо пелькстыцянть эряви сявордомс кутьмере лангс карксамос сюлмазь нардамо эли каркс вельде. Изницянть яволявтсызь сехте вадря батырэкс ды казить тензэ сехте паро казнетнень. Те эли баран, конанть путсызь виев изницянть лавтовонзо лангс, эли кодамояк лия сюпавчи, мик автомобиль. Тешкстама, неень шкасто курешесь совавтозь спортонь видтнэс, корязонзо ютавтневить масторлангонь чемпионатт.
Сетненьгак, кинь арась батырэнь виест, истя жо ули мелест невтемс эсь прянть. Тень туртов Сабантуйсэнть ютавтневить пейдевтиця ламодояк ламо пелькстамот – курся марто чийнемат, чочко лангсо кескавсо тюремат. Эли эштё вана кодамо: сюлмазь сельмсэ палкасо весть вачкодемстэ тапама мода лангсо аштиця сёвонень чакшонть. Нама, алаша лангсо ласте ардтнемат, сынтемест вейкеяк Сабантуй а эрсекшни. Ну те уш алкуксонь джигиттнэнь туртов!
Эрьгелематне молить чинь перть. Секс пурнавозтне каванявить раськень эрьва кодамо ярсамопельде. Истя жо эрсить ярмункат-микшнемат. Нама, кенярксчисэнть а кода моровтомо ды киштемавтомо…
Содамга…
Сабантуй кенярксчинть ули эмблемазо – коцтсто кодазь татаронь нардамо, конань лангсо артозь сэнь менель ды якстере орнамент. Те символось кочказель 2004 иестэ художниктнень пелькстамосонть.
Икеле Сабантуентень артсть алт – истя, кода православнойтне Инечинтень. Сынст тевс нолдасть эрьва кодамо кенярксов конкурстнэсэ. Эштё ярсамопельтнестэ, конатне пурназельть велень кудотнева кенярксчиденть икеле чистэнть, пидесть «варакань каша». Мекс «варакань», видестэ кияк а содасы, ансяк кой-кона исследовательтне ловить, истямо лемесь сюлмавозь нармунень языческой культонть марто.


Зярдо-бути бороцямонть коряс пелькстамотнесэ виест варчнесть тейтерь-аватнеяк. Нама, вийтемекс сынст кияк эзь ловояк. Невтемакс, XII пингестэ Равонь Булгариянь эмирэнть тейтерезэ Шамгун-Саина изнизе эсь мирдензэ – батырэнть ды мик синдекшнинзе ирдексэнзэ. А вана Башкириясо кенярксчисэнть сехте главноекс свал ульнесть ансяк цёратне, эдь сюронь видемась лововсь цёрань тевекс.

Сабантуйсэнть коень ламбамопелесь – чак-чакось, татаронь медень тортось. Васня сон лововсь ансяк свадьбань ярсамопелекс, мейле уш совавтовсь Сабантуень стольтнень лангс. 2016 иестэ Федеральной Сабантуйсэнть, конась ютась Нижней Новгородсо, анокстакшность 200 килограммань сталмосо чак-чак, конадонть каванязельть весе пурнавозтне.

«Сабанонь свадьбань» молема шкастонть од цёратне ды тейтертне кочксить эстест вечкевикст. Бути те чистэнть цёрась ды тейтересь васенцеде теевсть содавиксэкс ды вечкевсть вейкест-вейкест туртов, урьвакстозь-венчазь эрямо кармить вейсэ кувать ды парсте.

Лопанть анокстызе Татьяна ВОДЯСОВА.
Фототне Эдуард РЕТУНСКИЕНЬ

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».