Пятница, февраля 07, 2025
Важное
Кува ансяк эрямось эзинзе сравто эрзянь ломантнень. Сынь вастневить весе Россиянь келес. Ды сеедьстэ, Мордовиядо ве ёно эрямсто, сынь теить весементь тиринь келест, коест-кирдаст ванстомга. Сехте пек – культурасо важодицятне. Самай истятнэнь ютксо Татарстанонь Тетюшевской райононь эрзянь Бессоново велень эрицясь Виктор Филиппович Овчинников. Аволь умок цёраломанесь сакшнось Саранскоев Любовь Сергеевна нинзэ марто «Сиянь суркс» семиянь регионъютконь фестивалев. Сынст «Гармония» семиянь дуэтэст туртов – 15 иеть.
«Сиянь суркс» фестивальсэнть Виктор Филиппович налксесь баянсо ды нинзэ марто морызь «Пичечуля» мазый эрзянь моронть, конань сон ладсизе этнографонть ды поэтэнть Николай Мокшинэнь валморонзо лангс. Те моронть Виктор Филиппович сёрмадокшнызе Елена Воронинанень.– Виктор Филиппович, ёвтнеде Бессоново тиринь ёнкскеденк – кода эрзянь велесь понгсь Татарияв?
– Ульяновской областенть ёндо ардомсто сеске понгат Бессоновас – те Татарстанонь васенце веле. Н.Ф. Мокшин этнографось ульнесь монь покш ялгам, мартонзо а весть кортнинек, кода тей понгсь минек эрзянь велесь? Эдь тосо седе тов молить – Кадышево, Киртели, Кильдюшево, Урюм – весе велетне мокшонь. Сон мизолдозь ёвтниль: вейке эрзясь зярдо-бути тей сась, лиятнень туртов вешкезевсь… Истя аламонь-аламонь пурнавсь веле. Таркатне пек вадрят. Велесь нейгак яла рашты. Аволь умок мусть меценатт, конат лездасть стявтомс церькова. Велесэнек весемезэ 600 кудоюртт. Меельце кемень иетнень перть стявтсть 24 од кудот. Миненек маласо «Ундоры» курортось, косо нолдыть весенень содавикс «Волжанканть». А умок веленек эйстэ, 10 вайгельбень таркань ютазь, редясть лисьмапря, косо ведесь «Волжанкадояк» паро. Ней арсить тозонь стявтомс санаторий. Теде башка, маласо таркасто мусть валдо-сэнь сёвонь. Татарстанось арси, кода тень весе лезэвстэ нолдамс тевс…– Инескеть, ёвтнеде эсенк ланга, косто сась музыкантень вечкемась?– Тетям ульнесь гармонист, вишка пингестэ тонавтымим гармошкасо седямо. Школадо мейле тонавтнинь Ульяновскойсэ культурань училищасо, мейле Самарасо прядынь институт. Весе эрямом перть важодинь Димитровградонь Культурань кудосо: васня баянистэкс, мейле хоронь ветицякс. Советэнь шкатнестэ ульнесь покш ансамблям, косо лововсть 60 ломанть. Кемень иеть важодинь Культурань дворецэнь прявтокс, пенсияс лисемс – культурань отделэнь заведующеекс. Пенсияс лисезь, велявтынь тиринь кудов.Тетям-авам кулость, кудось чаволь. Ней тосо эрятано Любань марто, сон омбоце ним. Васенце ним марто кастынек кавто тейтерть, кавонест артисткат. Катя, васенце тейтерем, тонавтнесь Саранскойсэ, Ёроков эйкакштнень туртов лицейсэ, мейле Димитровградсо музучилищасо ды прядызе Гнессинканть. Важодсь Государственной Кремлёвской дворецсэ (Президентской театрасо) артисткакс. Кода коллективест каладсь, тусь эрямо Италияв. Ули тейтерезэ. Дуняшка нуцьканок туртов уш 18 иеть. Омбоце тейтерем Московсо, морси хорсо. Ней декретсэ – аволь умок чачтсь тень колмоце нуцька. Ды правнуцькамгак ули.2024 иень августсто важодема стажом сасась 55 иеть. Ней важодян Ульяновской областьсэ, весть недлязонзо 120 вайгельбень тарка ардтнян Димитровград ёнов, тосо ули рузонь коллективем, конань лемезэ «Лейся, песня!». Весе эрямонть перть ульнинь кемень коллективень прявтсо, колмотне эйстэст эрзянь: «Пичечуля», «Чиньжарамо», «Кальне». Монь коллективтнень башка ёнксост сеньсэ, сынь морасть лия ёнов а молиця морот. Кода композитор, ламо морот сёрмадынь Николай Мокшинэнь валморонзо лангс.
Виктор Филиппович нинзэ марто ардтнить весе Россиянь келес. Сынь ламо фестивалень инжеть. Невтемга, кизна ульнесть Краснодарской краень Темрюксо.Любовь Сергеевна низэ – рузава, теке марто эрзякс моры пек ваньксстэ. Сон чачсь Белоруссиясо, 9 иесэ уш лиссь сцена лангс. 1980-це иетнестэ морсесь Людмила Зыкина мартояк. Вайгелезэ мазый, алкине, музыкасо лемдеви альт.Сюкпря, келя, Виктор Филипповичнень, кона марто эрьва ие ардтнить аванть тиринь ёнксов. Тосо ютавтнить Иван Купалань покш чинть ды сынь свал те покш чинтень бажить понгомс. «Пек вечкан истят покш чить. Тесэ муят од ялгат, тееват содавиксэкс од ломань ды лия коллектив марто. Вечкеви тень ломань ютксо улемась. Неть покш читне вейсэндить ломантнень ды сюпалгавтыть ойменть. Саемга, мон, эрзякс морамодонть башка, покш мельсэ анокстан эрзянь ярсамопельтькак. Пек вечкеви тень ченявксось (лапшерник), конась тееви крахмалсто. Кенярдан, зярдо моньгак каванить эйстэнзэ», – паро мельсэ ёвтнесь тенек кудазоравась.Бессоново велесэ Овчинниковтнень кудораськест меельце 10 иетнень перть келейстэ тешкстыть Троицянть. Мордовиясто тиринь кельсэ моронь морамо тердтнить содавикс артисттнэнь. Ламоксть тенст сакшнось Александра Куликова (ней уш ютксонок арась), «Келу» ансамблясь. Троицянь тешкстамо коенть сынь ванстызь умонь шкатнестэ саезь – тетяст-аваст ды покштяст-бабаст пельде, конат истя жо мельспаросо тешкстасть те православной покш чинть.Марина Агафонова
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».