Пятница, марта 29, 2024
Важное

Неть читнестэ МР-ва МВД-сэ пурназель пресс-конференция, конанть юрсо региононь ведомствань од прявтось Борис Маркович Шейнкин теевсь содавиксэкс журналисттнэнь марто. Вастовомась ютась Уголовной розыскень важодицятнень кенярксчинть каршо. Тень лангс апак вано, кортамось мольсь аволь ансяк те подразделениянть тевтнеде. СМИ-нь важодицятнень ульнесь покш мелест седе ламо содамс ведомствань од прявттонть, конась те таркантень аравтозель ковдо икеле.

Тешкстасынек, внутренней тевень органтнэс Борис Шейнкин сась 1996 иестэ оперуполномоченноень таркантень, служась уголовной розысксэ, ульнесь Московонь полициянь отделтнэнь прявтокс. 2017 иень аштемковстонть саезь важодсь Московонь Россиянь ГУ-нь МВД-нь Северо-Западной административной округонь УВД-нь прявтонь полавтыцякс, полициянь прявтокс. Важодсь наркотиктнень каршо бороцямонь подразделениятнесэ. Ёвтызе, Саранскойсэ ульнесь колоньгеменьшка иеде икеле, ансяк сестэ эзь арсекшнеяк тей министракс велявтомадо. «Сестэнь Саранскоесь пек явови неенсенть эйстэ. Ошось сэтьме, ванькс, неяви Футболонь коряс масторлангонь чемпионатонтень вадря анокстамось», – мерсь Борис Шейнкин.

Теде мейле министрась пачтясь МР-ва Россиянь МВД-нь территориальной органтнэнь важодемань тевтнеде. Сон ёвтась, закононь коламонь тевтнень панжомась регионсонть тешкстави 75 %, мезесь 17,9 % седе ламо весероссиянь невтевкстнэде ды 15,8 % – ПФО-нь невтевкстнэде. Истя жо сон тешкстызе Уголовной розыскень подразделениятнень важодемаст, конат ламо тейсть стака зыянтнэнь панжомга. «Коллективенть важодемазо ды профессионализмазо, конатнень мон рединь сеске министрань таркантень аравтомадо мейле, лездыть республикасонть киртямс закононь коламотнень. Ансяк улить кевкстемат, конатненень явома седе покш мель», – мерсь ведомствань прявтось.

Седе тов вастовоманть лувсо максовсть каршо валт журналисттнэнь кевкстематнень лангс. Кортавсь закононь коламонь сеть тевтнеде, конат талновтызь республиканть, ёвтневсь важодемань од ёнкстнэде ды тевс нолдавиця технологиятнеде, сеть зыянов тевтнеде, конатнень панжоманть лангсо ветяви робота неень шкане.

Васняяк жо министрантень максовсь кевкстема сень коряс, кодат полавтомат важодемасо ды кадратнень коряс учить ведомстванть маласо шкастонть. «Россиянь МВД-нь прявттнэ республикань министерстванть важодеманзо ёвтыть а берянекс, ды бути ваномс ПФО-нь регионтнэнь коряс, Мордовиясь ловови сэтьмекс, секскак кодаткак покш полавтомат учомс а эряви, – корты Борис Шейнкин. – Нама, улить башка ёнкст, конатненень явома седе покш мель, ансяк тесэ арсеви аволь руководительтнень полавтомась – важодемасо одонть тевс нолдамось. Вадря прявтонтень эряви маштомс важодеме куш кодамо коллективсэ».

Борис Шейнкин тешкстызе, ведомствась седе товгак карми домкасто важодеме наркопреступлениятнень ды электронной мошенничестватнень каршо. Ледстинзе зыянов стака тевтненьгак, конат зярс апак панжо. Роботась ветяви покш, важодить ведомствань весе подразделениятне.

Ёвтнесь министрась седеяк, кода ютавты юткошканзо, зярдо истямось пракшны. Семиянек вечкить ардтнеме дачав, косо ули апокшке пиринест. Вечки котьмамо кудоютконь тевтнесэ. Ды, кода корты, те шкастонть прясь оймси важодемадонть, пурны од вийть.
Пресс-конференциянть важодемасо истя жо ульнесть МР-ва Россиянь МВД-нь министрань полавтыцясь – полициянь прявтось Олег Шилов ды Уголовной розыскень управлениянь прявтось Игорь Филичкин. Сынь ёвтнесть Управлениянть тедедень вейксэ ковтнень перть важодемадонть ды зыянов сеть тевтнеде, конатнеде ламо кортавсь.

Юлия ЕРЕМИНА.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».