Саранскойсэ июнень 30-це чистэ прядовсь «Морыця чувто» регионъютконь IV-це фестивалесь-пелькстамось. Сон мольсь вете чить. Эйсэнзэ кедьчелькест невтизь Россиянь кавксо регионтнэстэ чувтосто 8 керсицят.
Удмуртиясто сакшнось Сергей Назаров, конась тейсь перепечи прякинетнень марто удмурткань скульптура. Самара енкссто ульнесь Владимир Илюшин. Вейсэ Алексей церынензэ марто сынь анокстасть локсей марто «Вечкемань лався». Мордовиясто Петр Рябов ды Нижней Новгород енкссто Александр Туркичев вейсэ керсесть «Ояксчи-Дуслык-Дружба» композиция. Чувашиясто Евгений Акимов тейсь натой кавто скульптурат: «Мокшонь азорава» ды «Татаронь инжень вастома». Московсто Николай Аношкин тейсь «Чукоткань валске» композиция. Ульяновскойстэ Минибулат Абдрахимов керсизе башкирэнь эпосонь героенть Улан-батырэнть. Москов енкссто Николай Гетьман – амбаронь псаканть чеерне марто.
Тедеде фестивалесь ютась «Раськень ялгаксчи» тердеманть ало ды Весероссиянь велень Сабантуенть лувсо. Весе теезь скульптуратне седе тов стявтовить башка парксо, конась сравтови Эрзянь-мокшонь подворьянть ваксс. Цетьверькстэ, июнень 30-це чистэ, тосо жо ютась торжественной пекстамось, козонь сакшность МР-нь Культурань, раськень политикань ды архивень тевень министрань васенце полавтыцясь Александр Карьгин, Эрзянь ды мокшонь раськень регионъютконь вейсэндявксонь прявтось Юрий Мишанин ды спонсорось, «Спецмастер» кампаниянь региональной представителесь Алексей Салмин.
Кедьчелькев мастертнэ тейсть меельце тешкст ды пурнавсть эште вейке пелькстамонтень: бензопиласо 50 минутас эрявсь керсемс мелень коряс чувтонь скульптура. Ды дивань тевть: чувто мукортне теевсть миявокс (бобер), эрзянь ушмодеень чамакс, «колобококс», лембе кемекс, ловатякс… Национальной театрань актертнэ, ветицятне Андрей Анисимов ды Олеся Земскова таго весень тердизь сцена лангс, косо те пелькстамосонть изницянтень Сергей Назаровнень казезель од бензопила. Омбоце тарканть саизе Минибулат Абдрахимов.
Колмоценть – Александр Туркичев. Мейле ушодовсь дипломсо ды ярмаконь казнесэ участниктнень каземась. Изницят те фестивальсэнть арсезель а кочкамс, ды секскак сынь весе кадовсть мельспаросо.
Кезэрень морот морасть «Торама» фолк-группань тейтертне ды цёратне. Седе тов весе скульптуратне саезельть Весероссиянь велень Сабантуев Аксенова веленть малас, косо сынь мазылгавтызь кенярксчинь площадканть. Зяро инжеть снимсевтсть мартост, зяро лембе валт марясть мастертнэ эсест теевксэст кисэ! Ламот янксесть седе, мекс эзть сакшно пелькстамонь площадкантень ды эсест сельмсэ эзизь нее, кода чувтосто теевить алкуксонь произведеният. Арсетяно, сынст эште карми шкаст тень теемс сыця иестэ од фестивальсэнть.
Марина Девятова