Аволь умок Московсо ютась Межэтнической журналистикань школань федеральной этапонь пельксэсь. Те проектэнть арсицянзо-теицянзо – Раськень тевтнень коряс федеральной агентствась ды Межэтнической журналистикань Гильдиясь, конань прявтсо ламо иеть ашти Маргарита Арвитовна Лянге. Масторонь прявт ошс пурнавкшнось 51 тонавтниця малав 22 регионсто: Кавказсто, Юграсто, Якутиясто, Комистэ, Калмыкиясто, Алтайстэ ды ламо лия таркасто. Эрьва сыцясь усксь мартонзо тиринь региононь пелькс.
Мордовиянть пельде Межэтнической журналистикань школань участникекс кармасть – минек газетань корреспондентэсь Алёна Артемьева, «Известия Мордовии» газетань информационной отделэнь корреспондентэсь Олеся Максимова ды Н. П. Огарёв лемсэ филологиянь факультетэнь журналистикань отделениянь васенце курсонь студенткась Дарья Локтева. Неть од ломантне пек вадрясто невтизь эсь пряст Межэтнической журналистикань школань региональной этапонть ютамсто. Секскак сыненст прась уцяска ноябрянь 25-це чистэ саезь декабрянь 1-це чис невтемс тиринь Мордовиянть масторонь прявт ошсо.
Московось вастымизь шалтсо ды чипайсэ. Эряза таксистэсь эрявикс таркантень пачтимизь часошкань ютазь. Тешкстама, тедеде Межэтнической журналистикань школань федеральной этапонь занятиятне ютавтовсть «Виноградово» отельсэ, конась ашти Подмосковьянь Долгопрудный ошсо. Самай те таркась сисем чис кармась лембе кудокс Школань ведьгеменде ламо участниктнень туртов.
Эряви меремс, од ломантнень туртов ульнесь анокстазь сюпав программа. Недлясь пешксель эрьва кодамо мероприятиядо. Школань тонавтницятнень туртов содавикс ломантне ветясть лекцият, семинарт, мастер-класст, психологонь пельде практикат, истя жо участниктне важодсть медиахакатононь теема лангсо ды ардтнесть этноэкспедицияв.
Истя жо Московсо ютавтовсь Этнической ды региональной СМИ-тнень VIII-це Медиафорумось, конась ульнесь Изнямонь музейсэ. Тедеде сон алтазель «Духовно-нравственные ценности народов России в медиапространстве» темантень. Форумось пурнынзе вейс Россиянь 26 регионтнэстэ сазь журналисттнэнь. Мероприятиянть талновтыця ды кенярдовтыця пельксэкс кармась «СМИротворец-2024» пелькстамонь изницятнень каземась, конась яволявтозель истямо номинациянь коряс, кода: «Печать», «Интернет», «Телевидение», «ЭТНОзвук», «Детские и молодежные СМИ», «Блоги», «Семейные традиции народов России» ды «Поколение мультимедиа». Мельспароль, зярдо изницятнень лемест ютксо маринек минек коллеганок, Мордовиянь «Вайгель» радиопрограммань эрзянь кельсэ эфиртнэнь ветицянть Ольга Шабановань лемензэ. Эрзянь тейтересь сайсь колмоце тарка «Семейные традиции народов России» номинациясонть. Теде башка, Мордовиясто сазь журналисттнэнь эштё кувать кармить ледстнеме мазый раськень оршамопелест кувалма. Эрзянь тейтерь-авань оршамопельтне ды мазылматне ламонь инжетнень салызь седеест… Истя ютась васенце чись.
Омбоце чистэнть жо тонавтницятне невтсть видеопрезентацият эсь региональной школаст ланга, мезесь пек лездась седе вадрясто содавтомс эсь прятнень лия регионсто сазетнень марто. Ульнесть ламо кевкстемат, пеедькшнемат ды шнамонь валт. Эрьва регионось – те лия ёнов а молиця история, вадря ды мазый таркат, конат тердить инжекс.
Теке жо чистэнть Маргарита Лянге ветясь «Как работать с этнической темой в игровых формах» лементь ало апокшке мастер-класс. Пек мельспаро ульнесь кунсоломс ды тонавтнемс истямо профессионал пельде. Седе тов тонавтницятненень ловнось «Законодательные основы национальной политики РФ» лекция Российской Федерациянь Общественной палатань Миграциянь, раськеютконь ды религиянь тевтнень коряс комиссиянь председателесь, политической наукань докторось Владимир Зорин. Тешкстама, Школань важодемань омбоце чинь программасонть ульнесь медиахакатононь, эли, лиякс меремс, медиалабораториянь теемась. Васняяк ёвтама, медиахакатонось – те зярдо зярыя медиасферань специалисттнэ пурнавить вейс ды важодить вейке медиапродуктанть тееманзо лангсо. Истямо лувсо вейксэ командас явозь сисем чинь перть важодсть Межэтнической журналистикань школань тонавтницятнеяк. Те проектэнть коряс цётамотне ёвтазельть Школань меельце чистэнть.
Колмоце чись сехте сюпаволь лекциятнень ды мастер-класстнэнь коряс. Тонавтницятнень марто вастовкшность Внутренней политикань коряс Российской Федерациянь Президентэнь управлениянь раськень политикань департаментэнь прявтось Татьяна Вагина, Государственной Думань депутатось, татаронь ФНКА-нь прявтось Ильдар Гульмутдинов ды «Алтайская правда» газетань прявт редакторось Олег Купчинский. Содавикс политиктне ды деятельтне келейстэ кортасть раськень политикадонть ды сонзэ невтемадонзо раськень СМИ-тнесэ.
Нилеце чись алтазель этноэкспедициянтень. Васенце лотксема таркакс кармась Жостовань декоративной артомань фабрикась. Тесэ тонавтницятнень туртов ветясть экскурсия ды артомань коряс мастер-класс. Якстере, ожо, ашо цецясо артозь подностнэнь мазычист а стувтовить зярдояк.
Омбоце лотксема таркакс кармась «Софрино» – масторонь церьковань ули-паронь нолдыця сехте покш заводось. Тешкстама, тей нолдыть а весень, Межэтнической журналистикань школань тонавтницятнень жо вастызь паро мельсэ. Лембе мизолкс марто учось эйсэнек Серафим Саровскиень храмонь настоятелесь, протоиереесь Вадим Поликопа. Сон ёвтнесь эсензэ ланга ды ветясь мельстуиця экскурсия храмганть ды предприятияванть. Эсь сельмесэ неинек, кода чачить пазавань ликтне, штатолтнэ ды ламо лия мезесь. Истямо сюпавчиденть мейле кудов ардынек шожда седей марто. Эдь истямо таркадо мейле ломанесь свал олякстоми эрямонь стакачитнеде ды ризнэматнеде, кувакасто таргасы оймензэ ды ванськавтсынзе превензэ берянь арсематнеде.
Ветеце чись сюпаволь вастовоматнень коряс. Тонавтницятнень туртов инжекс сакшность РФ-нь Общественной палатань членэсь, Буддистэнь центральной духовной управлениянь прявтось, буддийской монахось Сергей Киришов, кона келейстэ ёвтнесь буддизм вероисповеданиядонть. Седе тов психологось, Оренбургонь ШМЖ-нь кураторось Ирина Томилина ветясь апокшке мастер-класс, конань прявт темакс ульнесь «Нарратив с Гильдией». Нарративень (психологонь пельде практика) перть эрьва участникентень эрявсь артомс «эрямонь чувто» ды ёвтнемс ланганзо. Обедтэ мейле эштё вейке мельстуиця мастер-класс ветясь «Российской газетань» ведущей редакторось Елена Домчева. Сон ёвтнесь, кода газетасо арсевить ды сёрмадовить заголовкатне. Вастовомань инжекс истя жо ульнесь «Национальный акцент» журналонь шеф-редакторось Юлия Бобкова, кона ветясь «Язык вражды и этика журналиста» лекциянть. Ветеце чинть сехте учовикс ды талновтыця мероприятиякс кармась медиахакатононь невтемась. Эдь недлянь перть Школань тонавтницятне важодсть командасо. Ды эрьва командась анокстась эсензэ проект. Тонавтницятне арсесть-тейсть раськень вейксэ СМИ-ть ды блогт. Веенст арсесть интернет-изданият, лиятне мультиформатной проектт, кие-бути анокстась газетат ды журналт, ульнесть истяткак, кие тейсь телеканал. Командасо важодемась эрьва тонавтницянть туртов панжизе сень, весе минь вейкеть, кадык эрятано эрьвась эсензэ регионсо, ансяк вейсэнди эйсэнек келентень, культурантень ды раськентень вечкемась.
Меельцекс ёвтаса, Межэтнической журналистикань школась – те тонавтнемань вадря платформа сыця шкань журналисттнэнь ды СМИ-тнесэ течинь важодицятнень туртов. Те Школасонть ютавтозь вастовоматне максыть ламо лезэ. Школанть важодема шкастонть карминек содамо, зяро паро тевть теить минек сёрмадыця ды снимиця ялганок. Сынь покш мельсэ пачтить ды ёвтнить, кода теемс раськень журналистиканть седе виевекс, вадрякс, эрявиксэкс.
Алёна Артемьева