Сентябрянь 9-це чистэ саезь 12-це чис Марий Эл республикань Йошкар-Ола ошсо ютась Россиянь Финнэнь-угрань раськетнень III Форумось. Тедедень темась – «Финно-угорская молодежь в меняющемся мире: реалии и вызовы». Тестэ чарькодеви, мероприятиясь алтазель од ломантненень. Форумсонть важодсть Россиянь 32 субъекттнэстэ сазь инжетне. Участниктнеде весемезэ ульнесть малав 250 ломанть, конатнень ютксольть Мордовия Республиканьгак.
Эряви евтамс, Марий Эл Республикасо те мероприятиясь ютавтовсь васенцеде. Ледстясынек, кавто иеде икеле, 2023 иестэ, Форумось мольсь Саранскойсэ, 2021 иестэ – Ижевскойсэ. Тедеде уцяскась прась маринь раськентень. Форумось ютась колмо чинь перть. Инжетненень анокстазель сюпав культурной программа.
Форумонь торжественной пельксэсь панжозель сентябрянь 10-це чистэ Йошкар-Олань Эрик Сапаев лемсэ Маринь государственной академической оперань ды балетэнь театрасо. Программась уставакшнось пленарной промкссто, конань инжекс кармасть кельсодыйтне, раськеютконь тевтнесэ эксперттнэ, общественной вейсэндявксонь прявттнэ ды эйзэст совицятне, Россиянь федеральной ды региональной органтнэсэ, культурань, наукань, образованиянь енкстнэсэ важодицятне, СМИ-тне ды од ломанень вейсэндявкстнэ, истя жо финнэнь-угрань раськетнень студенттнэ.
Промкссонть ульнесть РФ-нь Президентэнь Администрациянь руководителень полавтыцясь Магомедсалам Магомедов, Национальностень тевтнень коряс РФ-нь Федеральной Собраниянь Государственной Думань комитетэнь Председателесь Владимир Иванов, ФАНД-нь прявтось Игорь Баринов, Марий Эл Республикань прявтось Юрий Зайцев, РФ-нь Федеральной Собраниянь Федерациянь Советэнь Председателень полавтыцясь Константин Косачев, ПФО-со РФ-нь Президентэнь полномочной представителесь Игорь Комаров ды РФ-нь сенаторось, АФУН-нь председателесь Петр Тултаев.
Тешкстама, Россиянь Президентэсь Владимир Путин пачтясь поздоровт Форумонь участниктненень. Инжетненень сынст ловнынзе РФ-нь Президентэнь Администрациянь руководителень полавтыцясь Магомедсалам Магомедов.
«Ламо пингень перть финнэнь-угрань раськетне сюпалгавтыть ды виевгавтыть Россиянть историянзо, культуранзо ды образованиянзо. Эрьва кодамо важодемань енкссо сынст изнявксост кандыть покш лезкс ды панжить икелев молема ки минек масторонть эрямосо!» – тешкстави РФ-нь Президентэнть пачтямосонзо.
ПФО-со РФ-нь Президентэнь полномочной представителесь Игорь Комаров мерсь, те Форумось кармась вадря площадкакс, ков Россиянь эрьва кодамо регионтнэстэ састь эсь тиринь масторост ды келест вечкиця ломанть, конатнень седейсэ палы финнэнь-угрань раськетнень культурань ванстомань толнэсь.
Эсь кортамосонзо ФАНД-нь прявтось Игорь Баринов тешкстась, 2023 иестэ Мордовия Республикасо ютавтозь II Форумонь кармавтоматне эзть кадово вановттомо. Финнэнь-угрань раськетнестэ ламонь тиринь келест ютасть оцифровизация. Истя, неень шкасто Яндекс. Переводчик платформантень совавтозь эрзянь, мокшонь, коминь, маринь ды финнэнь-угрань лия кельтне.
Истя жо Форумонь участниктнень туртов пачтясь шумбракстнемань валт Мордовия Республикань Прявтось Артем Здунов: «Тедедень Форумонь темась алтазь финнэнь-угрань раськетнень од ломантненень. Кода минь содатано, од ломантне – икелепелень эрямонок! Кеман, те вастовомадонть мейле чачить мельстуиця од проектт ды тевть, конатне седе тов вадрялгавтсызь минек масторонть эрямонзо!»
АФУН-нь председателесь Петр Тултаев кортась, неть читнестэ Марий Элэсь кармась финнэнь-угрань раськетнень ине масторокс, косо ломантненень пек паро ды лембе, косо сы мель теемс покш ды лезэв тевть.
Марий Эл Республикань прявтось Юрий Зайцев тешкстась, финнэнь-угрань культурань ванстомась саи прявт тарка минек эрямосонть. Секскак раськетненень свал улема вейсэ ды лездама вейке-вейкенень.
Истя жо пленарной промксонть лувсо ютась Од ломанень проектэнь весероссиянь III пелькстамонь изницятненень казнень явшемась. Эряви меремс, изницятнень ютксоль Мордовиянь студентэсь Константин Суслов, кона казевсь омбоце степенень дипломсо. Церась анокстась образованиянь, келень лы литературань коряс вадря проект.
Торжественной пельксэсь прядовсь мельстуиця концертсэ, конань анокстызь Марий Элэнь театрань артисттнэ.
Теде башка, Форумонть лувсо зярыя чинь перть важодсть панельной дискуссиянь площадкат: васенцесь – «Национальная школа лидерства: от идеи до реализации»; омбоцесь – «Традиционные духовно-нравственные ценности как фактор сохранения единого кода России», конасонть важодсь минек газетань корреспондентэськак; колмоцесь – «Современное информационное пространство: борьба за умы и единство».
Весе неть площадкатнесэ колмо чинь перть ютась пси важодема. Форумонь инжетне, сынст ютксо, нама, седе ламотне ульнесть од ломанть, евтнесть ды невтсть мелень витиця проектт ды презентацият, эрьвась пачтясь эсь региононь историядо, тиринь кельде ды раськень эрямодо.
Неть площадкатнень важодемань цетавкстнэ Форумонь меельце чистэ кемекстазельть Резолюцияс, конань коряс карми ветявомо финнэнь-угрань раськетнень марто важодемась.
Эряви меремс, Форумсонть, важодемадо башка, инжетненень анокстазель пек сюпав культурной программа. Пурнавозтнень содавтызь Марий Эл Республикасо эриця раськетнень историяст ды коест-кирдаст марто. Ютавтсть мельстуиця экскурсият ды мастер-класст, истя жо каванизь маринь раськень ярсамопельтнеде. Теде башка, Форумонь мельстуиця пельксэкс кармась Марий Элэнь Од ломанень кудосо «Мисс Студенчества Финно-угрии – 2025» раськеютконь пелькстамонь ваномась. Эсь мазычист ды ерокчист те пелькстамосонть невтизь Мордовия Республикасто Екатерина Зинова ды Влада Ганькова тейтертнеяк. Тешкстама, те конкурсось васенцеде ютавтозель 2012 иестэ Марий Элэнь государственной университетсэ. Тедеде сон мольсь комсецеде. Тедеденсесэнть ерокчист невтизь финнэнь-угрань раськетнень кемень мазыйкатне. Весе сынь студенткат, конатне, тонавтнемадо башка, покш мель явить эсь раськест культуранть ды кельтнень ванстомантень-виевгавтомантень.
Евтама, те пелькстамосонть минек республикань мазыйкась Екатерина Зинова сайсь 3-це тарка, Влада Ганькова казевсь «Мисс стиль» номинациясонть.
Меельцекс тешкстама, Форумонь колмо читне участниктненень казсть ежо, конась максы кемема – финнэнь-угрань эрьва раськесэнть улить поладыцят – од ломанть, конатне эрьва чи мелявтыть эсь раськест ды келест кисэ ды теить весементь, ансяк бу покштятнень-бабатнень мельга кадозь сюпавчись ванстоволь седе товгак.
Алена Артемьева
Фототне авторонть.