Августонь 23-це чистэ Саранскойсэ ютась «Минь вейсэ!» раськень культурань ды креативной индустриянь од ломанень весероссиянь 3-це фестивалесь. Мордовияв сакшность инжеть Россиянь ламо регионтнэстэ. Неть – киштицят-морыцят ды кедьчелькев ломанть. Тедеде фестивалень ютавтома таркась полавтозель. Сон мольсь «Старт» стадиононть, Эень дворецэнть, Раськетнень ояксчинь площаденть вакссо. Фонтанной валгома таркасонть ютась Сувенир.ФЕСТ, тесэ сувенирт микшнесть-невтнесть Россиянь эрьва кодамо регионтнэстэ сазь мастертнэ.
Чинь перть сценанть лангсо невтевсь концерт. Инжетнень кецявтызь Саранскоень «Витава» музыкальной проектэнь артисттнэ, Самарань «Эрзя» группась ды Александр Марухов, Йошкар-Олань «У ЕН» этно-рэп ансамблясь, Ненецкой автономной округсто «Хаерако Сей» этно-коллективесь, Санкт-Петербургонь «Сарафанное радио» фольклорной группась, Алтайской крайстэ Равиль Лиров, Челябинск ошсто «Певчая» морыцясь, минек «Мерема» фолк-группась, киштемань ды морамонь Чувашиянь государственной академической ансамблясь, чокшне – Алиса Мон ды Дмитрий Колдун.
Кодат ансяк мельстуиця площадкат тесэ арасельть! Важодсть «Дом Эрьзи», «Дом кино», «Дом артиста», «Шки-арт» таркатне. Артисттнэ ютавтсть мастер-класст, ловность пьесат, стихть, морасть ды седясть. «Активное и здоровое долголетие» палатканть перька чарасть «сиянь» волонтертнэ ды сыре ломантне, тесэ тейсть медицинань диагностика. Истя жо ломантне кодасть СВО-нь таркатнес кекшемань алтымат. Панжозельть бизнесэнь зярыя площадкат.
«Минь вейсэ!» фестивалень паро инжекс кармасть урьвакстыцятнень-мирденень лисицятнень 30 паратне. Кедте-кедьс кундазь, од мирдтне-нитне ютасть весень икельга мазый музыкань коряс киштезь. Ниле паратне те чистэнть сюлмизь эрямост – сцена лангсо ютась урьвакстомань регистрациясь.
– Течи фестиваленть лувсо минек учось пек талновтыця тев – од семиятнень чачомась. Арсетяно тенст вечкема, вейке-вейкень чарькодема ды седе ламо эйкакшт! Кадык мазый, мельстуиця ды творческой ломантнеде (истят, кода те фестивальсэнть) кармить седеяк ламо! – истят лембе валт тенст евтась МР-нь Прявтось Артем Здунов.
Сон явшесь урьвакстыцятненень регистрациянть ледстнемга казнеть. Свадьбань инжекс кармасть зярыя тежат ломанть Россиянь эрьва кодамо регионтнэстэ.
– Сюкпря весе творческой коллективтненень, конат содавтовсть минек сюпавдояк сюпав культуранок марто. Инжекс тенек састь Равчирень федеральной округонь весе регионтнэ, истя жо Московсто, Санкт-Петербургсто, Алтаень крайстэ, Ненецкой автономной округсто ды ламо лия енкссто. Сень лангс апак вано, кодамо минь раськень, кодамо пазнэнь кемтяно, минек весень вейсэнди вечкемась, культурась, спортось. Тей састь СВО-нь участниктне. Сюкпря тенк, церат! Сы иесь Мордовиянть туртов карми лия енов а молиця. Келейстэ тешкстасынек ине скульпторонть С.Д. Эрьзянь чачома чистэ саезь 150 иетнень. Кеместэ важодтяно РФ-нь Культурань министерстванть марто, секскак сы иестэ учотано кедьсэнек Третьяковской галереянть, Рузонь музеенть, – кортась МР-нь Прявтось Артем Здунов.
РФ-нь культурань министрань полавтыцясь – статс-секретаресь Жанна Алексеева кенярксчинь инжетненень РФ-нь Культурань министерстванть пельде евтась лембе валт ды тешкстызе: «Тедеде кенярксчись ютавтови кода семиянь фестиваль, Мордовиясь лия регионтнэнь ютксо кеместэ яволявты прянзо кода регион, косо семиятненень явови башка мель».
Раськень промыслатнень ды ремеслатнень ванстомаст ды вельмевтемаст кисэ МР-нь Почетной грамотасо казевсь сисем тюссо кодамонь коряс мастерэсь В.И. Муклецова.
«За личный вклад в развитие Республики Мордовия» МР-нь Прявтонь Почетной тешкссэ казевсь «Гильдия межэтнической журналистики» регионъютконь общественной вейсэндявксонь прявтось М.А. Лянге.
Келенть ды раськень культуранть ванстоманзо кисэ «За личный вклад в развитие Республики Мордовия» МР-нь Прявтонь Почетной тешкссэ казевсь «Мерема» фольклорно-этнографической студиянь артисткась-морсицясь Е.О. Модина.
«Минь вейсэ!» фестивальсэнть сехте мельстуиця ды кецявтыця тевекс кармась эйкакшонь коляскань фестивалесь-парадось. Од семиятне дивавтызь весень. Эйкакшонь коляскатне теевсть танкокс, самолетокс, покш цецякс, каштомокс, цеця потсо мекшекс… Кой-кить оршазельть раськень оршамопельсэ. Неяви, аволь вейке чи анокстасть парадонтень! Сынст вастомсто весе виевстэ цяпасть ды тейнесть фотографият.
«Тев»
выставкасонть – 126 мастерт!
«Тев» декоративно-прикладной искусствань ды художественной ремеслань выставкасо ульнесть ламо инжеть. Ванат ды дивсят: кодат дока ломанть улить вакссонок! Валентина Ивановна Муклецова (самай сонзэ казизь те кенярксчисэнть) эри Теньгушевань районсо. Эйкакш пингестэ саезь коды варьгат, носкат, шапкат-шарфикть. Тенень тонавтызе авазо.
– Весть, школасо тонавтнемстэ, кодынь монстень сур марто варьгат, артынь сынст валдо-сэнь тюссо. Сеть шкатнестэ киньгак истят арасельть, лавкасояк эзть микшневе, весень сельмест сявадсть, – мизолдозь ледстни Валентина Ивановна.
Мирденень лисемадо мейле кармась кодамо сисем тюссо, лиякс меремс, Теньгушевань семицветкасо. Ламо иень перть авась важодсь банксо контролерокс. Ней умок уш мирдензэ марто пенсиясот. Кардазост чамсь, мезеяк а кирдить. Ансяк шканть авась стяко а емавтни. Весе юткошканзо алты кодамонтень. Сонзэ варьганзо свал невтевить республикань покш выставкатнесэ. Мастерэнть колмоксть тердтнизь Московонь ВДНХ-в выставкав, истя жо «Ладья» раськень промыслань весероссиянь выставкав. Тосонь инжетне паро мельсэ рамсесть, токшесть сисем тюссо варьгатнень, дивсесть ды кевкстнесть, эрьвантень аволь кодавить истят.
– Сисем тюссо варьгатнень Теньгушевань районсо кодыть зярыя пингень перть. Кезэрень шкатнестэ сынст рамсеме васолдо сакшность натой купецть, – пачтясь тенек Валентина Ивановна. Кодамонь салавачитненень ней тонавты нуцькинензэ.
Светлана Геннадьевна Воронская эрзянь-мокшонь узор марто арты чувтонь матрешкат, пенчть-вакант, подност ды лия сувенирт. Сон чачсь Чаунзабуесэ, ней эри Краснослободскойсэ. Якась художественной школав, конань прядомадо мейле тонавтнесь Н.П. Огарев лемсэ МГУ-нь математической факультетсэ. Важодсь Гумны велесэ математикань тонавтыцякс. Школасонть артынзе-мазылгавтынзе весе класстнэнь. Тень неезь, сонензэ макссть ветямс изобразительной искусствань урокт. 25 иеть ветясь математика, черчения ды рисования. Ульнесь завучекс, школань прявтокс. 2008 иестэ ладизь Краснослободскоень художественной школань прявтокс. Тагояк мольсь тонавтнеме, ютась переквалификация. Кенерсь тонавтнеме, важодеме ды явомо мель творчествантень. Теде башка, тонавтницянзо марто ардтнесь творческой эрьва кодамо пелькстамов, косо сайнесть изнямонь таркат. Тедеде кото выпускникензэ мольсть тонавтнеме Н.П. Огарев лемсэ МГУ-нь ИНК-нь декоративно-прикладной искусствань отделенияв. Педагогось тень кувалма ашти покш мельспаросо.
С.Г. Воронская нейгак тонавты художественной школасо, вети «Слободская мастерская» сынст райононь мастертнэнь вейсэндявксонть. Чувтонь теевкстнэнь (конатнень мейле мазыйстэ арты) рамси Нижней енксонь мастертнэнь кедьстэ. Сувенирэнзэ марто сонгак ульнесь Московсо ВДНХ-нь выставкасо, «Ладьясо», косо ютавтсь артомань мастер-класст. Матрешканзо коллекциятнень рамизь Московонь ды Санкт-Петербургонь музейтне, валост коряс, вестькак эзть некшне эрзянь ды мокшонь истят мазый артовкст.
Татьяна Маторкина
Фототне Н.Карановонь