Главной инспекторось Михаил Сезганов ютавтсь вастовома Мордовия Республиканть пельде «iВолга 2.0» Равчирень федеральной округонь Од ломанень форумсонть изницятнень Екатерина Тощевань, Ксения Канаевань ды Юлия Демяшкинань марто. Предпринимателень, наукань, социальной ды культурной сфератнесэ сынст проекттнэ ловозь сехте вадрякс ды тешкстазь грантсо.

Истя, «Стратегическая сессия: перспективы развития студенческих отрядов ПФО» проектэнть тевс совавтомс Ксения Канаеванень явозь 200 тёжань покшолмасо ярмаконь лезкс. «Школа-студия дизайна и компьютерной графики «ART Fоx 13» проектэнть кис зняро жо получи Екатерина Тощева. «Наука и образование» ёнкссонть покш питне путозь «Teach Case Challenge» Юлия Демяшкинань проектэнтень. Сонзэ тевс совавтомс явозь 150 тёжат целковойть. «iВолга 2.0» форумонть призэнь фондозо 17 миллиондо ламо целковойть.

Михаил Сезганов грантонь получицятненень ёвтась поздоровт Равчирень федеральной округсо Россиянь Президентэнь полномочной представителенть Игорь Комаровонь пельде ды тешкстызе, истямо паро ушодксонть ды ярмаконь лезксэнть марто икелеть путозь задачатненьгак топавтомс седе шождыне.

Вастовомасонть «iВолга 2.0» изницятне ёвтнесть Главной федеральной инспекторонтень эсь проекттнэнь тевс совавтомадо ды лезэвчидест, региононь исполнительной властень органтнэнь ёндо лезкстэнть.
Проекттнэнь покш социальной питнейчист кувалма Михаил Сезганов макссь грантонь получицятненень Равчирень федеральной округсо РФ-нь Президентэнь полномочной представителень аппаратонть пельде гранттнэнь тевс совавтомга рекомендательной сёрмат.
Ледстясынек, «iВолга 2.0» Од ломанень форумось ютавтови эрьва иестэ РФ-нь Президентэнть В.В.Путинэнь мереманзо коряс Равчирень федеральной округсо РФ-нь Президентэнь полномочной представителенть вановтонзо ало. Тедеде «iВолгантень» конкурсось ульнесь вейке таркас кото тёжадо ламо ломанть. 13 тёжат од ломантнестэ, конат макснесть заявкат, Форумсонть важодсть кавто тёжат од ломанть Равчирень федеральной округонь весе регионтнэстэ, ютксост 80 од ломантне – Мордовиясто.