Вторник, сентября 29, 2020
Важное

Краснослободской райононь сюронь паксятнесэ васенце читнестэ саезь важодить те райононь Аграрной техникумонь студенттнэ. Сынст «Механик» студентэнь отрядонтень совить кемгавтово ломанть, конатне аволь ансяк паксятнестэ пурныть сюронть, эштё озимой культуратнень алов анокстыть моданть. 
Студенттнэнь лездамо самост районсонть свал учить. Эдь сынст важодемаст те шкастонть пек эрявикс. Сынь чинь-чоп паксясот, важодить сиземань апак сода. Роботаст апак редя а кадовкшны.

Эрьва сёксня, зярдо Мордовиясо тешкстыть Велень хозяйствань ды перерабатывающей промышленностень важодицянь чинть, студенттнэ весе вейсэ кузнить Республикань Культурань дворецэнь сценанть лангс. Сыненст, покш сюкпрянь ёвтазь, Мордовиянь Прявтонть Владимир Волковонь пельде казевить Шнамонь конёвт ды питней казнеть.
Нама, отрядонтень совицятне эрьва иестэ полавтневить, ансяк койтне кадовить некеть: важодемс виень апак вансто ды вадрясто. Студенттнэнь командирэст – Андрей Тришин. Сон тонавтни «Эксплуатация и ремонт сельскохозяйственной техники и оборудования» специальностенть коряс. Те иень сюронь урядамосонть важоди комбайнёронь лездыцякс ды эштё вети «Механик» студенческой отрядонь тевтнень. Важодемаст кисэ ансяк вадря валт ёвтавить студенттнэнень: Иван Мелькаевнень, Роман Байковнень, Алексей Кряжевнень, Иван Полениннэнь, Сергей Симаковнень, Дмитрий Егиннэнь, Роман Кривошеевнень, Александр Морозовнень, Иван Крашенельниковнень, Евгений Солдатовнень, Максим Горшковнень, конатне урядыть сюронть ды анокстыть моданть озимойтнень алов «Свободный Труд», «Хорошее дело Слобода», «Мокша», «Новокарьгинский» вельхозпредприятиятнесэ.

«Нама, весе минь, цёратне, велесэ чачозь, вишка шкасто саезь уш тонавтозтяно велень тевтненень, секскак, а пельтяно паксясо важодемань стака тевтнеде, конанть кис эштё тенек пандыть вадря ярмакт, а сехте эрявиксэсь эйстэнек эрьвантень – минь седе вадрясто тонадтано эсенек кочказь тевентень, пурнатано седе ламо содамочить ды ёрокчи. Тонавтнемадо мейле карматано улеме аволь ансяк механизаторокс, а инженерэкс-механикекс, конатненень весе техниканть содама парсте. Эсенек комбайнатнень ды трактортнэнь, конань лангсо ней важодтяно, анокстынек весе минсь. Бути яжавить, минсь витнетяно эйсэст. Студентэнь отрядсонть важодемась тонавты эйсэнек аштемс вейкень-вейкень кисэ, лездамс вейке-вейкенень, улемс седе ответственноекс эрьва тевенть кисэ», – истя корты «Механик» студентэнь отрядонь командирэсь Андрей Тришин.

Мила БОГАТОВА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».