Якшамковонь 25-це чинть каршо, масторсо кавто покш читнень – Татьянань ды Студентэнь кенярксчитнень тешкстамодо икеле, савсь улемс «С.В.Катков лемсэ Республиканской клинической больниця» Мордовия Республикань здравоохранениянь государственной бюджетной учреждениясонть.
Тосо прась уцяска теевемс содавиксэкс кавто Татьянатнень марто, кинь ялгаксчись ушодовсь студентэкс улемстэ ды сынст ояксчись поладовсь пек ламо иес. Неть: те учреждениянь главной медсестрась Татьяна Анатольевна Иванова ды операционной медсестрась Татьяна Васильевна Коткова. Кавонест сынь эрзяват, седейшкава ды парсте топавтыть вечкевикс тевест. Татьяна Анатольевна Покш Игнатбуестэ, Татьяна Васильевна Ицялонь райононь Селища велестэ. Течи минек ловныцятненень ёвтнетяно Т.В.Котковадо.
Эйкакшпингень арсемась топавтовсь
Ицялонь райононь Селища велень эрицятнень – Татьяна Васильевнань тетянзо-аванзо Василий Сергеевич ды Ольга Яковлевна Митякинтнэнь – ламот ледстнить кода трудонь вечкиця, ламо вадря тевс бажиця мирдекс ды никс. Сынь трясть-кастсть колмо эйкакшт. Теизь весементь, штобу кавонест цёраст – Николай, Александр ды Татьяна тейтерест касовольть-улевельть алкуксонь ломанекс. Эштё вишкинестэ тонавтсть стакачиде а пелеме ды, ков саты виест, лездамо аволь ансяк малавиксэст туртов, весенень, кие тенст пшкади. Сеть Советской шкатнестэ, ков савсь сынст эйкакшпингест, Василий Сергеевич (ней уш сон кулось) ды Ольга Яковлевна чинь-чоп ульнесть роботасо, сынь важодсть «Путь к коммунизму» колхозсонть, ков се шкане совасть колмо велеть: Береговые Сыресись, Селищась ды Папулевась. Кудоютконь тевтнесэ лездыцякс свал ульнесть эйкакштне.
Касозь, эрьва эйкакшось мусь эрямосонзо вечкевикс тев. Николай Митякин школань прядомадо мейле васня кадновсь тиринь велес, важодсь водителекс эсест колхозсо, шкань ютазь тусь Саранскоев, полады теке тевенть. Александр масторонть икеле долгонзо топавтомадо мейле кадовсь эрямо Московс, пинге трудясь метрополитэнсэ. Веженсесь Татьяна тусь Саранскоев.
Ледстясынек, сонзэ эштё школасо тонавтнемстэ ульнесь покш мелезэ алтамс эрямонзо медицинантень. Эрьва чистэ школав молемстэ ёлганя рунго мазыйка тейтерькась сельмень сявадозь вансь фельдшерэнь-акушерэнь пунктонть ёнов, кона аштесь натой школанть вакссо.
Истямо покш мелезэль, мик кавксо классонь прядомадо мейле туиксэль тонавтнеме Саранскоень медучилищав. Малавиксэнзэ марто кортамодо мейле кадовсь эсест велес школанть прядомо. Тонавтнесь парсте, ансяк «ветес», юткошкасто ветясь общественной покш робота, маштсь киштеме-морамо. Лиякс меремс, куш кодамо тевень топавтомо.
Ламо иес кадовсть ледстневицякс студентэнь иетне. Эрясть ялганзо марто сиведезь квартирасо, тонавтнемс савкшнось пек ламо, малав эрьва оймсема читнестэ бажась туемс тиринь велев. Сеть шкатнестэ Ицялонь райононь те васоло велентень чуросто автобуст якасть. Сеедьстэ савкшнось ютамс ламо вайгельбеть ялго. Сёксень-тундонь шкатнестэ китне ульнесть истят рудазовт, секень вант, трактороськак пезныль. А бути тракторонь эли лишмень нурдос савкшнось озамс, ловт, тон уцяскав ломань. Ансяк кодаткак стакачить эзть тандавто велень тейтерьканть, а ёвтавияк кодамо покш мель ульнесь седе домкасто тонавтнемс сы шкань профессиянть. Алкуксонь кенярксчикс теевсть больницятнесэ ютавтовиця практикатне.
Сехте покш казнесь – эрямонь ванстомась
Татьяна Васильевна Котковань важодемань пингезэ ушодовсь 1983 иестэ Республиканской клинической больницясо, косо сеске сонзэ ладизь операциянь теемань медицинской сестракс. Те тевенть сон тосо топавтсь малав кеветее иеть.
1999 иестэ сонзэ, кода тевензэ парсте содыця специалистэнть, операциянь старшей медсестранть, сайсызь важодеме анестезиологиянь-реанимациянь отделенияс, Саранск ошонь 3-це № больницяв. Шкань ютазь тагояк тердьсызь важодеме операциянь блокс. Кодат вийть, нардевчи ды кеме обуця эряви истямо стака тевенть, кода ломанень эрямонь идеманть, вандынь чинтень кемеманть максомсто.
– Операциянть теемстэ кодаткак башка кортамот а эрсить, свал чатьмонема, – ёвтни Татьяна Васильевна. – Тонь весе арсемат, вановтот, виеть максовить вейке тевентень – операциянь теицянтень-хирургонтень. Лиясто валонь апак ёвта чарькодят, кодамо шкасто мезе тензэ максома, кодамо лезкс теема. Ансяк операциянь теицянтень пек парсте неяви ды содави, кодамо ответственной тев сынст лангс путозь…
Малав колоньгемень иетнень перть зяро идезь ломанть, стакасто сэредицят одс шумбра эрямос велявтозь, течи сынь а лововитькак. Виде, аволь ансяк ламо сюкпрянь валт эрямонь ванстомань кисэ савсь марямс, ульнесть истят тевтькак, зярдо апак учонь авариядо эли стака ормадо мейле медицинанть а сатыть виензэ, куш свал тееви весемесь медицинасо важодицятнень ёндо. Истят тевтне седей вакска а ютыть. Сынь теке сардот кадовить лецицянть оймес.
Татьяна Васильевна те шкас ледстни ды сюкпрянь валт ёвты тонавтыцянзо туртов. Неть: Нина Алексеевна Велмискина ды Раиса Николаевна Тепайкина. Нама, ней уш сонськак весе таштазь опытэнть максы одтнэнень. Сон эштё важоди Мордовиянь Здавоохранениянь специалисттнэнь квалификацияст кастомань республиканской центрасо, максы содамочить тов тонавтнеме сыцятненень. Эсест больницянть юрсо вети практика республикань районтнэсэ важодиця средней медицинской персоналонть туртов. Валонзо коряс, Мордовиянь районтнэстэ ды велетнестэ сыцятне седейшкава бажить васня сынсь содамс весе одонть ды мейле эсест таркатнесэ нолдамс тевс те эли тона лезэв ёнксонть.
Уцяскав кудосо, уцяскав важодема таркасо
Татьяна Васильевна марто кортамсто карминек содамо, кодамо покш лезкс ды вийть тензэ максы семиязо: Александр Викторович мирдезэ ды Екатерина тейтерезэ. Эрий ялгазо А.В.Котков профессиянь коряс строитель, сонзэ киява тусь тейтересткак. Аванзо ладсо ансяк «ветес» школанзо прядомадо мейле якстере диплом марто прядызе Н.П.Огарёв лемсэ МГУ-нь архитектурно-строительной факультетэнть. Мейле сон кармась важодеме специальностень коряс. Мирдть-нить Котковтне юткошкаст покш мельспаросо алтыть Дашенька нуцькинест туртов, кинень топодсть сисем иеть. Текенень поладса, Митякинтнэнь покш семиясь сеедьстэ яки Селища тиринь велев, косо мазылгавтыть-одкстомтыть тетяст-аваст кудонть.
Кодамо мельспаросо сынст васты Ольга Яковлевна аваст, кие ютась кавксоньгемень иетнень трокс. Паряк, сеть паро тевтне, конатнень теить колмонест эйкакшонзо, поладыть те чевте седей аванть эрямонь пингенть. Нать, а стяко ломантне кортыть: эрьва паро тевесь свал паросо сы раськентень, семиянтень.
Валентина ЮДИНА