Пятница, марта 29, 2024
Важное


Мастясь – ламонь туртов телень ильтямонь весёла ды вечкевикс кенярксчи. 2020 иестэ Мастянь недлясь карми молеме даволковонь 24-це чистэнть саезь эйзюрковонь 1-це чинть самс.
Те корты седе, ковкерьксэнь коряс тундось сы самай Мастянтень. Кода жо вастома учовикс тундонть, кодат кезэрень койть-кирдат миненек састь умонь шкатнестэ ды мезе а мереви теемс Мастянть перть, теде ловнодо минек материалсонть.

Мастянь тешкстамонь читне эрьва ие а пракшныть вейке шкас, сень коряс, што сынь сюлмавозь Инечинть марто. Ловомс жо Мастянь недлять а стака, бути содатадо, зярдо те иестэнть карми Инечись. Тедедень Инечись – чадыковонь 19-це чистэ. Тень коряс, Мастянь меельце чись – эйзюрковонь 1-це чистэ. Мастянь недлянть перть жо кеняркшномат, ярмункат, вастовомат ды, нама, пачалкседе каванямот.

Мастянь историясь

Мастянть тешкстасть эштё минек кезэрень покштятне-бабатне ды алтасть те кенярксчинть Чипазонтень (Ярилнэнь). Тестэ Мастянь прявт ярсамопелеськак – пачалксесь, кона моли чипаенть ёнов. Кезэрень эрицятне кемильть пертьпельксэнь вийтнес ды покш мель явильть менелень валдомтыцянтень сонзэ энергиянть кисэ, кона пешти весементь эсь валдодонть ды лембеденть. Чинть ды венть вейкендямо шкастонть сынь пурныльть теленть марто простямонь кенярксчи ды ушодыльть тердеме инжекс тундонть. Те шкас ванстовсь Мастясто телень нецяенть пултамонь коесь.
Русенть лемдемадо мейле Мастянть сюлмизь Инечинть ды Ине постонть марто. Ансяк весёлгалемась ды пачалксетне кадовсть кенярксчинь прявт пельксэкс. «Без блина не Маслена» – истямо ёвтамо ули течияк.

Кода тешкстама Мастянть: прявт койтне

Мастянть сеедьстэ лемдить сывельтеме недлякс, сывельде ярсамс те шкастонть а мереви. А вана ловсо ды эрьва кодат паневкст – зяро мелеть. Пачалксеть эрьва кодамо топо марто, прякинеть, сыра, ой, алт, велькс, икра, калт – те весемесь свалшкань каванямопель Мастянь туворонть лангс. Недлянь перть ломантне якить вейкест-вейкест туртов инжекс, содавтнить раськень кенярксчитнень, оршнить мазый оршамосо, морыть ды киштить. Икелень шкатнестэ од ломантне снартнесть кочкамс эстест вечкевикс, кучомс кудат эли жо Мастянть самс налксемс свадьба. Простямонь недлячиденть мейле ушодови Ине постось ды кеняркшномс, ярсамс куяв ярсамопельде уш а мереви.
Мастянь койтне-кирдатне пек шождынеть ды мельстуицят: кеняркшномс, ярсамс пачалкседе ды эрьгелемс – те весемесь аволь стяко. Штобу седе куроксто саволь тундось. Телень нецяень пултамосонть истя жо улить тешкст. Лововсь, вейсэ толонть марто туи весе таштось ды берянесь, панжови ки одонтень ды паронтень. Мейле куловтнень сравтылизь паксятнень велькска, штобу те иестэ чачоволь ламо сюро.

Кенярксов недля: кода лемдемс ды мезе теемс Мастянь читнестэ
Мастянь эрьва чинть ули эсензэ лемезэ ды эрявиксчизэ, эсь коензэ.
Пондельникесь, Мастянь васенце чись – «вастовома». Те чистэнть панилизь васенце пачалксенть, конань кадылизь вальмалангс эли максылизь кажовсто эрицятненень эсь кулозь раськетнень ледстнемга. Эйкакштне ды покштне тердилизь инжекс Мастянть, аватне жо эсь тейтерькатнень тонавтсть пачалксень панеме.
Овторникесь, Мастянь омбоце чись – «налксемат». Наряжазетнень ды кудатнень чи. Од цёратне ды тейтертне кочкасть эстест вечкевикст, штобу Инечиденть мейле налксемс свадьба.

Середась, Мастянь колмоце чись – «лакомка». Чи, зярдо эряви молемс инжекс низанянтень. Те чистэнть меревсь эрьгелемс, морамс ды киштемс, кирякстнемс саласкесэ, ярсамс ды симемс. «Пачалксесь аволь туло – пекенть а лазсы» – кортыльть ломань ютксо.

Цетьверькесь, Мастянь нилеце чись – «разгуляй», эли келей Мастя. Кенярксчинь тешкстамонь тёкшось, кода кортыть, «келей пильгес». Икелень шкатнестэ вейс сюлмильть зярыя нурдот, кильдильть лишметь ды ардтнильть велеванть истямо «поездсэ». Истя жо те чистэнть ветить хороводт, ютавтыть налксемат, тюремат. Рузонь койтнестэ вейкесь – ловсто теезь ошкенть саемазо.
Пецясь, Мастянь ветеце чись – «низанянь чокшнеть». Те чистэнть уш содамотне каванить эсь низанятнень пачалкседе. Коень коряс нинть аванзо эряви тердемс инжекс, лиясто сон сакшны аволь ськамонзо, ялганзо марто.
Субутась, Мастянь котоце чись – «парыянь аштемат». Те чистэнть од мирдентень-нинтень инжекс сыль мирденть ялаксозо эсь семиянзо марто (бути мирдень экшсэ). Бути парыясь аволь мирдень экшсэ, сыль эсь ялгатнень марто.

Недлячись, Мастянь меельце чись – «Простямонь недлячи». Те чистэнть эряви вешемс чумонь нолдамо эсь малавикстнэнь, раськетнень, ялгатнень, шабратнень кедьстэ, теде мейле паламс ды сюконямс. Сась шка простямс Мастянть, эрьгелеманть ды телень кеняркстнэнь марто. Те чистэнть эштё ули шка ветямс хороводт, киштемс, кирякстнемс саласкесэ. Теде мейле молема баняв, штобу вадрясто шлямс Ине посттонть икеле.

Кода тешкстыть Мастянть неень шкане

Неень шкане велетнесэ ды оштнесэ Мастясто ютавтовить ламо эрьгелемат. Наряжазь скоморохтне кенярдовтыть ломантнень, эйкакштне невтнить ёрокчист налксематнесэ ды пелькстамотнесэ, каванить пачалкседе. Кенярксчитне ютавтовить парксо, музейсэ ды ошонь площадтнесэ. Ломантне кенярдыть покш мельсэ.
Мастянь сехте содавикс пелькстамотне-налксематне: канатонь усксемат, ходуля лангсо чийнемат, ловнесэ налксемат, тюремат, лембе кемень ёртнемат, телень нецяень пултамот.

Мезе а мереви теемс Мастянть перть

Те шкастонть а мереви нусмакалемс, сёвномс ды кежиявтнемс малавиксэнк лангс. Лововсь, бути Мастянть перть а кармат весёлгалеме, тундось сы а курок. Сень жо, кие весе читнень перть нусмакалесь, учи берянь.

Мастянть шкасто а мереви скупойгалемс, мекевлангт, весе ялгатнень, содавикстнэнь ды вачотнень андомс пачалкседе. А мереви вастомс инжеть апак уряда кудосо. Мастясь – ваньксчинь теема шка. А мереви отказамс, бути тердидизь инжекс. Бути жо молиде, ламо илядо ярса ды симе. Мастянь меельце чистэнть илядо отказа, бути кияк седейшкава веши кедьстэнк чумонь нолдамо. «Пазось простятанзат» – истямокс улезэ каршо валонк.

Мастянь тешкстнэ

Мастянтень свал бажасть панемс седе ламо пачалксеть – сюпавчинтень ды сюронь чачомантень. Бути пачалксетне лисильть мазыйть, валанят, иесь карми шожда ды уцяскав. Бути палыльть – берянентень. Ёртомс а эрявиксэнть ды таштонть Мастянть перть – вадря тешкс.
Истя жо ульнесть ламо тешкст, конат сюлмавозь пертьпельксэнть ды сюронь чачоманть марто.

Анокстызе Юлия ЕРЕМИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».