Эрьва веленть туртов библиотекась – те лиятнень енов а молиця тарка. Ды тей сакшныть аволь ансяк книга мельга. Велень эрицятне тесэ лезэвстэ ютавтыть эсь юткошканть. Аволь умок минь ульнинек инжекс Орданьбуень райононь Пиксяська велень библиотекасо, конань прявтсо важоди превей авась Мария Николаевна Саушкина. Сон ветясь тенек мельстуиця экскурсия, евтнесь эсь важодемадонть ды эрямодонть.
Мария Саушкина чачсь-кассь Орданьбуень райононь Пиксяська эрзянь велесэ. Тонавтнесь эсь тиринь велень школасо, мейле прядсь педагогической училища ды М.Е. Евсевьев лемсэ МГПИ (ней – университет). Велявтсь тиринь велев ды 17-де ламо иеть важодсь вишка классонь тонавтыцякс. Мейле аравтызь школань прявтокс. Целанек жо тонавтыцянь тевентень макссь 45 иеть. Сон – Российской Федерациянь образованиянь Почетной роботник.
– Улемс тонавтыцякс – те эйкакш пингень бажамом. Ялган марто налксемстэяк свал тонавтыцякс ульнинь. Ды те профессиянтень тонавтнемань иетне пек стакасто максовсть: кить арасельть, транспорт эзь ардтне. Те шкас ледстнян, веленть эйстэ Орданьбуень станциянть видьс аштесть телефононь палманть ды вана неть палмантнень кувалт минь ялго ниле иеть яксинек поездс, штобу пачкодемс Ицялов, косо тонавтнинь педучилищасо. Тиринь кудов яла валске марто 9 чассто сылинек ды уш обедтэ мейле, 14 чассто, одов поездс туилинек. Нама, ней тевтне лиякс аштить. Тонавтнеманть туртов ули весемесь, – евтни Мария Николаевна.
Педучилищадо мейле, зярдо уш роботась эсь тиринь велень школасо, Мария Саушкина заочна прядызе М.Е. Евсевьев лемсэ педагогической институтонть.
– Зярдо ушодынь школасо важодеме, вишка классонь тонавтыцятнеде ульнинек ниленек. Мейле сась истямо шка, ниле класс марто роботынь ськамон. Учительть арасельть. Валскень 9 чассто 11 часос 1-це ды 3-це класстнэнь туртов урокт ветинь, 11 чассто саезь 13 часос весе ниле класстнэнь марто важодинь, 13 чассто саезь 15 часос 30 минутас – 2-це ды 4-це класстнэнь туртов урокт ветявсть. Эйкакшт весе класстнэсэ ульнесть, весемезэ 17 ломанть. А ней, бути саемс велень ламот школатнень, истянь зняро тонавтницят целанек весе школасонть а пурнавить, – тешксты Мария Николаевна.
Колмо иеть Мария Саушкина вишка классонь тонавтыцякс важодсь ськамонзо. Мейле састь од тонавтыцят, седе ламолгадсть эйкакштнеяк ды Пиксяськасо стявтсть кавто этажсо од школа. Те ульнесь 1994 иестэ.
Од школанть панжомадо мейле М.Н. Саушкинань ладизь школань прявтокс. Ды те таркасонть сон важодсь школанть пекстамозонзо, 2016 иенть самс.
– Школанть пекстамодо мейле тонавтыцятнень нолдызь, а монень эрявсь анокстамс весе документтнэнь ды прядомс тевтнень. Ансяк мейле олякстомтымизь, – корты Мария Николаевна. – Седе тов, вете иеть, важодинь Орданьбуень станциянь школасо. Ветинь рузонь кель ды продленной группань занятиятнень.
Вете иень ютазь М.Н. Саушкина тусь школасто, ковшка аштесь кудосо. Ды весть тензэ гайгстась Орданьбуень администрациянь прявтонь полавтыцясь Наталья Викторовна Еремина. Сон пшкадсь энялдома марто – саемс велень библиотекарень тевтнень. Икелень важодицясь, Нина Яковлевна, тусь библиотекарень таркастонть, ломань жо кияк эзь муеве. Истя Мария Николаевна кармась важодеме библиотекасо. Ды зярдо ютась тей, эзь маря кодаткак стакачить. Эдь сон, кода икелеяк, эйкакштнень, тетятнень-аватнень, покштятнень-бабатнень марто важоди. Сон нейгак максы содамочить, ансяк книгатнень вельде. Теке марто одонтень покш мельсэ тонавтни сонськак.
Школасо важодемантень Мария Саушкина макссь цела пинге. 45 иетнень перть покш эрямов нолдась сядот эйкакшт. Ламот эйстэст кармасть паро ломанекс, эсь тиринь масторонь алкуксонь патриотокс ды героекс. Те шкас сынь паро валсо ледстнить эсь тонавтыцяст, Мария Николаевна жо зярдояк а стувтни сынст.
– Минек масторонь историясь пек сюпав эрьва кодамо тевсэ. Нама, ульнесть покш кажоткак, зыянов тевтькак. Ине Отечественной войнась, Афганской ды Чеченской войнатне, лия локальной тюрематне. Те весемесь кадсь покш тешкс масторонть, ломантнень эрямос, – корты Мария Николаевна. – Афганской войнасо минек велень ульнесть кемень ломанть. Почтальонкакс Пиксяськасо важоди Нина Николаевна Костюк, сонгак неть боевой тевтнень участник. Саемс Чеченской войнанть. Велеськак аволь покшке, чавовсть жо те войнасонть кавто ломанть. Неть – Сергей Андреевич Косолапов ды Геннадий Николаевич Логинов. Сергей Косолапов школадо мейле прядсь Отяжелень СПТУ. Церась сэтьмель. Чавовсь 19 иесэ. Тедеде топодсть 30 иеть, кода сон арась ютксонок. Геннадий Логинов чавовсь 25 иеде икеле, ульнесть тензэ 27 иеть. Сон прядокшнызе Н.П. Огарев лемсэ МГУ-нь исторической факультетэнть, эсенек велень школасо роботась историянь ды географиянь тонавтыцякс. Колмо иеть важодсь. А мейле тусь армияв. Понгсь Чечняв. Эйстэдест минек библиотекасо пурназь «Сынь чавовсть Чечнясо» а покшке выставка. Эште бу евтавлинь специальной военной операциядонть. Минек ули «Горжусь тобой, солдат России!» лементь ало ужине. Тесэ пурназь эрьва кодамо материал СВО-нь тевтнеде. Те кевкстемась течи токи эрьванть. Минек велень эрицятне а аштить ве ено. Лездатано, мейсэ сатыть виенек – пурнатано гуманитарной лезкс, цератнень туртов кодатано лембе носкат.
Течи Пиксяськань библиотекань книгань фондсонть лововить 4400 экземплярт. Фондось одкстомтови, нама, эряволь бу седе сеедьстэ. Ламо литератураст тиринь эрзянь кельсэ. Истят книгатне пек вечкевить ловныцятненень. Истя жо, бути кодаткак книгат эрявить, Мария Николаевна уски райононь библиотекасто.
– Улить истят ловныцянок, конатненень эрявикс книгатнень кандтано кудов. Невтемга, Вера Ивановна Лаврентьева. Библиотекав сон уш а пачкоди, ловноманть жо пек вечксы. Мон сонензэ пурнан эрявикс книгатнень ды кандан тензэ видьстэ кудов, – евтни Мария Николаевна. – Свал ютавтнетяно эрьва кодат мероприятият, вастовомат, кортамот. Овсе неть читнестэ покш кортамо ульнесь В.С. Брыжинскиень книганзо коряс, конась алтазь сонзэ 90 иетненень. Эрьва покш чинтень анокстатано выставкат. Ине Изнямонь 80 иетненень алтазь выставкась важоди 2025 иенть перть. Эрьва ковс анокстави важодемань аравтлув ды сонзэ коряс ветяви покш робота. Ансяк вана ловныцятне аламолгадыть. Кода лия велетнесэяк, ловныцятне тесэ седе ламолгадыть кизэнь шкасто, зярдо каникулас покштяст-бабаст туртов ошсто усксызь нуцькатнень. Те шкастонть минек тевтне седе кенярксовсто молить.
Кода евтнесь Мария Николаевна, библиотекасо мероприятият ютавтневить аволь ансяк эйкакштнень туртов, покштнень туртовгак. Сюкпря сон евты велень эрицятненень Мария Ефимовна Дементьеванень ды Нина Григорьевна Козлованень (сон уш ютксонок арась). Сынь тензэ пек лездасть Ине Отечественной войнань участниктнень ланга ледстнемань книганть пурнамосо-анокстамосо.
– Мон зярдо ушодынь библиотекасо важодеме, мерсть тень пурнамс «Книга Памяти» эсенек велень войнань участниктнень ланга. Минь содылинек ансяк войнань 176 участниктнеде. Зярдо жо карминек книганть пурнамо, ломантнень марто вастневеме, кортнеме, лангс ливтевсть 298 участникть, – корты Мария Николаевна. – Мария Ефимовна жо – те содамочинь лисьмапря. Сон войнань шкань эйкакш. Велень весе эрицятнень содасынзе – кить тетятне-аватне, кить эйкакштне.
Эряви евтамс, Мария Николаевна Пиксяська велень администрациянь важодицятнень марто вейсэ сыре ломантненень поздоровонь евтамо якси весе покш кенярксчитнестэ ды юбилеень иетнень топодемстэ. Тесэ ули истямо паро кой. Течи Пиксяськасо кувака пингень эрицятнень ютксо Мария Ефимовна Дементьева, Тамара Яковлевна Тетина, Анна Николаевна Саушкина, Анна Пименовна Полькина.
Мария Николаевнань туртов неть сыре ломантнень марто вастовоматне – лия енов а молиця кенярксчи. Сон вечки кунсоломо веленть эрямодо, ютазь шкатнеде евтнемаст ды лови сынст покштояк покш сюпавчикс.
Юлия Еремина
Фототне Егор Горинэнь.