Пятница, марта 29, 2024
Важное

Светлана Андреевна Стольная семиянзо марто Покш Березникень райононь Госагыр велесэ эрить овсе аволь умок, кавтошка иеть. Теде икеле эрясть Саранскойсэ ды, кода весе, топавтсть эрьва чинь тевест. Ансяк вана ошсо эрямось од семиянтень ульнесь аволь мелень коряс, свал бажасть эрямс велесэ – седе васоло покш ошонь свалшкань шалтонть эйстэ. 
Госагырсэ од ломантнень эрясь бабаст, теде башка, велесь Саранскоенть эйстэяк аволь васоло, секскак эрямо таркакс кочкизь сонзэ. Кувать апак арсе, Стольнойтне рамасть тестэ кудо ды аламонь-аламонь кармасть ладямо эсь эрямост: витнизь-вадрялгавтызь кудонть, пурнасть хозяйства: рамасть кудоракшат ды нармунть. Светлана Андреевнанень муевсь важодема таркаяк: Сон кармась библиотекарекс велень ловнома кудосонть. Теке марто тейтерь-авась кармась лездамо велень эрицятнень туртов кенярксчинь культурной мероприятиятнень анокстамосояк, сон вадрясто моры ды налкси эрьва кодамо седямопельсэ.

– Шкинемантень меленть явинь вишкапингстэ саезь, свал вечкилинь морамонть ды школасо тонавтнемстэ явинь мель седямопельсэ налксеме тонавтнемантень, – ёвтни Светлана Андреевна. – Ошсо эрямсто морсинь ансамблясо. Эсь ёрокчим яла невтнинь эрьва кодамо пелькстамосо. Зярдо сынек эрямо Госагырэв, монь ёрокчинтень тесэяк муевсь тарка. Свал анокстатано мельстуиця мероприятият весе кенярксчитненень: Од иентень, Отечествань ванстыцянь ды Авань читненень, Эйкакштнень ванстомань чинтень ды седе тов.
Пек вадрясто Светлана Андреевна топавты библиотекарень тевентькак. Сон эрьва ладсо бажи ламолгавтомс ловнома кудов сакшныцятнень. Секскак тесэяк ютавтни эрьва кодат мероприятият, книгань выставкат, вастовомат. Истя, аволь умок Госагырэнь библиотекасонть ютась Музыкань раськеютконь чинтень алтазь мероприятия.

– Аволь умок минек ловнома кудосонть появась музыкальной инструмент – пианина, ды ней ютавтнемс вастовоматнень ды тешкстамс покш кенярксчитнень кармась ков седе вадря. Ды нейгак инжетне покш мельсэ кунсолость содавикс композитортнэде ёвтнематнень, варчасть эсь виест викторинатнесэ ды кенярдсть музыкальной композициятненень, – ёвтни Светлана Стольная.
Аволь умок С.А. Стольная эсь ёрокчинзэ невтизе «Российское музыкальное образование: история и современность» Весероссиянь музыкально-педагогической форумсонть, кона ютавтовсь «Культура» национальной проектэнть лувсо «Творческие люди» региононь проектсэнть. Форумось ютавтовсь дистанционна Саратовань Л.В. Собинов лемсэ государственной консерваториянть юрсо.

– Пек паро, ютавтневить истят форумт, конат а максыть аштемс ве таркасо ды лездыть тонь шкинеманть касомантень-виевгадомантень, ламолгавтыть тонь содамочитнень ды кепетить меленть.
Светлана Андреевна истя жо покш важодема вети «ВКонтакте» социальной сетьсэнть. Тесэ Госагырэнь библиотеканть ули эсензэ лопазо, косо ёвтневи од книгатнеде, максови мельстуиця информация содавикс сёрмадейтнень ланга, вишкине ловныцятненень невтевить мультфильмат, улить аудиокнигат, конат пек эрявикст лавшосто неицятнень туртов. Тейтерь-авась теи весементь книганть питнейчинзэ ванстомга.

– Нама, неень шкане библиотекав сакшныцятнеде аволь икелень ладсо ламо, – корты Светлана Андреевна. – Седе сеедьстэ книга мельга сакшныть школасо тонавтницятне, книгань ловноманть вечкиця пенсионертнэ, кизэнь шкане – велесэнть каникуласт ютавтыця эйкакштне. Ды, эряви меремс, фондоськак одкстомтови пек чуросто. Паряк, теяк ашти тувталокс ловныцятнень аламолгадомасо. Ансяк тешкстаса, ловноманть вечкицянтень алкуксонь книганть а полавтсы кодамояк Интернетэсь ды библиотекав якамонть сон а кадсы. Эдь сонзэ туртов прявтось – кирдемс эсь кедьсэ книганть, марямс сонзэ лопатнень чикордоманть ды эйстэнзэ качадыця библиотекань чиненть.

Юлия ЕРЕМИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».