Октябрянь 17-це чистэ Отяжбуень Ламбаське велень Культурань кудосо ютась кенярксчинь вастовома. Сон алтавсь эрзянь поэтэнть Яков Кулдыркаевень чачома чистэнзэ саезь 130 иетненень. Эряви меремс, велесэнть а стувтнить сонзэ лемензэ. Эрьва вете иетнестэ ютавтыть ледстнемань чокшнеть. Велень вейке ульцясь кандтни сонзэ лемензэ. Калмонзо кирдить ваньксчисэ.
Вана нейгак Отяжбуень Ламбаськень средней школась (сон ней Козловкань средней школань филиал), велень библиотекась ды А. С. Пушкин лемсэ Национальной библиотекань раськень ды краеведениянь отделэсь ютавтсть «Сон эри эрзятнень оймесэ» Кулдыркаевень ловномат.
Яков Яковлевичень уцясказо а шождаль. Сон чачсь 1894 иестэ. Тонавтнесь Ламбаськень начальной училищасо. Седе тов кавксо иень перть тонавтнесь Саранскоень реальной училищасо. Важодсь Транссибирской чугункань килангсо табельщикекс. 1915 иестэ служась инязоронь армиясо Дагестанонь полксо. Стакасто ранявомадо мейле велявтсь кудов. Гражданской войнань шкане тюрсь Якстере Армиясо Симбирск ды Оренбург ало. Демобилизациядо мейле важодсь тетянзо хозяйствасо. Седе тов тусь Московов. 1923 иестэ прядсь Сретенской счетоводческой ды бухгалтерэнь курсат. Важодсь счетоводокс, бухгалтерэкс, ревизорокс. Сон уш вишка шкасто саезь вечксь кунсоломо эрзянь морот, ёвкст, легендат ды преданият. Пурнась ды сёрмалесь сынст. Неть сюпав фольклорной материалтнэнь вельде сёрмадызе «Эрьмезь» эпической поэманть. Мордовиянь книгань издательствась нолдызе сонзэ 1935 иестэ башка книгасо. Ловныцятне мельспаросо вастызь произведениянть. Тосо чарькодевиксстэ ды мельстуезь пачтяви эрзятнень кезэрень шкань эрямодост. Ансяк масторсонок ушодовсть зыянов шкат. 1938 иестэ НКВД-нь важодицятне арестовизь Кулдыркаевень «Эрьмезь» сёрмадовксонть кисэ. Чумондызь «антисоветской агитациясо ды буржуазной национализмасо». Книганть кармасть нельгенеме весе библиотекатнестэ. Яков Кулдыркаев комсь иеть пиштевтсь Коми АССР-нь, Новгородонь, Казахстанонь Джамбульской областень лагертнесэ. Ды ансяк 1958 иестэ реабилитировизь.
Ссылкасто самодо мейле авторось витнизе поэманть, тейсь од вариант. Нолдамонзо эзь кенере. Сон тусь эрямосто 1966 иень июлень 28-це чистэ. Шумбрачизэ пек берянель. Рукописесь муевсь писателенть архивстэ 80-це иетнестэ. 1988 иестэ «Сятко» журналось нолдызе поэманть одс. Сон ловови минек литературасо виев, вадря ды алкуксонь произведениякс.
Ламбаськесэ инжетне васняяк якасть Кулдыркаевень калмолангс, ледстизь лемензэ, путсть цецят. Седе тов вастовомась ушодовсь Культурань кудосо. Тей сакшность районсто эрзянь келень тонавтыцятне, велень эрицятне. Кулдыркаевень ловноматнень ветясь эрзянь келень тонавтыцясь Ольга Ивановна Антипова. Сон ютась залга, ловновтсь инжетнень кедьстэ поэтэнть стихензэ.
Алкуксонь казнекс кармась школань тонавтницятнень ловномась. Сынь кармасть анокстамо ковдо икеле. Эйкакштне тонавтнесть «Эрьмезь» поэмасто пелькст ды ловность сцена лангсто. Кода а ледстямс сынст лемест? Те: Надя Аитова, Ваня Артюшкин, Максим Девяткин, Кристина Исламова, Дима Пугачев ды ламо лиятне. Сынь казевсть шнамонь конёвсо.
– Сакшнынь тей кемень иеде икеле Кулдыркаевнень кеврунгонь панжомо. Арсян, Яков Яковлевич неи эйсэнек верде, кецни ды ашти мельспаросо. Кадык школань тонавтницятне седе сеедьстэ ютавтыть тесэ истят лембе вастовомат, – кортась МР-нь Госсобраниянь депутатось Евгений Ледяйкин.
Сонзэ валонзо поладынзе А. С. Пушкин лемсэ библиотекань раськень ды краеведениянь отделэнь ветицясь Надежда Бочканова:
– Содан ламо паро ломанть, кить чачсть те велесэнть. Ней вана савсь тей понгомс. Покш мельспаро марямс эрзянь келенть гайгеманзо.
Эрзянь ды мокшонь раськень регионъютконь общественной вейсэндявксонь исполкомонть пельде сон казинзе школань тонавтницятнень, тонавтыцятнень ды культурасо важодицятнень казнесэ.
Прявт библиотекаресь Валентина Бояркина ёвтнесь седе, зярдо 1938 иестэ весе библиотекатнестэ кармасть нельгенеме-ёртомо «Эрьмезь» книганть, сынст библиотекань важодицятне кекшизь ды ванстызь 1935 иень васенце изданиянть. Истя жо сон пачтясь, кода критиктне ды литературоведтнэ кортасть «Эрьмезь» поэманть сюпавчидензэ. Литературасо улить ламо примерт, зярдо авторось кодамояк вейке произведениянь коряс тееви содавикс писателекс, лемезэ гайги. Паро валт истя жо ёвтась МР-нь Писателень союзонь правлениянь прявтось Татьяна Швецова.
– Минек моданок лангсо кирвазсь валдо теште. Те – Кулдыркаев. Эрямонь кизэ стакаль. Мон помняса сонзэ. Сон эрясь эйстэнек кавто-колмо кудо трокс. Эрьва чи ютыль велень кувалт, верев-алов. Кинь вастыль, свал кевкстиль, кодамо течи чись. Кие пейдсь, кие жо жалясь сонзэ. Содасть, шумбрачизэ пек колавсь тюрьмасо стяконь кисэ аштемстэ. Превей ломантне чарькодсть, те – ине ломань. Артур Моро лемдекшнизе эрзянь сехте паро поэтэкс, конань поэмань валонзо чудезь чудить. Иван Прончатов поэтэсь ловсь сонзэ эрзянь поэзиясо покш тештекс. Арсян, лемезэ а стувтови, свал карми гайгеме минек литературасо, – кортась Ламбаськень школань икелень тонавтыцясь Раиса Александровна Леушкина.
– Минек школась пек умонь, малав 200 иеть тензэ. Сон панжовсь 1835–40-це иетнестэ, ульнесь земской школакс, аштесь частной кудосо. 1915-1916 иетнестэ австрийской пленнойтне стявтсть якстере кирьпецень школань покш здания. 1990-це иетнестэ латозо палсь, кирьпецтне тусть ломань кедьга. Школань неень зданиясь стявтозель 1985 иестэ. Чарькодеви, зярдо-бути эйсэнзэ тонавтнесть тёжадо ламо эйкакшт.
Кемтяно, эштё зярскак карматано роботамо. Тонавтницянок аволь весть изнякшность эрзянь келень ды литературань олимпиадасо. Шнавлинь сынст. Тонавтыцянок истя жо пряст невтизь пелькстамосо, – ёвтнесь Ламбаськень школань прявтось Сергей Васильевич Русяев.
Сон прядызе Н. П. Огарёв лемсэ МГУ-нь исторической факультетэнть. Колмо иеть направлениянь коряс роботась Зубова-Полянань Од Потьма велесэ. Теде мейле сась тиринь велев. 2011 иестэ саезь важоди школань прявтокс, вети история. Валентина Васильевна низэ истя жо тонавтыця, сон ветясь англань кель, ней лиссь пенсияв.
Кодамо кенярксчи моровтомо? Инжетне паро мельсэ вастызь Марина Алексеевна Атласовань. Сон чачсь Ламбаськесэ, важоди Таразбуень школань прявтокс. Сонзэ пек мазый, виев вайгелезэ. Сцена лангсо ульнесь «Горнипов» велень ансамбляськак. Вадря се, велесэнть а стувтнить эрзянь писателенть валдо лемензэ.
Татьяна Маторкина
Фототне Эдуард Ретунскиень