Мартонь 14-це чистэ Равчирень финнэнь-угрань раськень культурань центрась вейсэ Н. П. Огарев лемсэ МГУ-нь Раськень культурань институтонть марто ютавтсть «Кодамо моро минь моратано» V-це Регионъютконь фестиваль-пелькстамо. Университетэнь Культурань ды искусствань дворецэнть сцена лангсо гайгсть эрзянь, мокшонь ды рузонь морот.
Фестивальсэнть примасть участия фольклоронь морыця коллективтне, группатне, дуэттнэ ды сольна морыця раськень моронь морыцятне, конат ванстыть фольклоронть ды эсь шкинемаст вельде сонзэ марто содавтыть лиятненьгак.
Пелькстамось ютась кавто пелькссэ. Васенцентень эрявсь кучомс кемекстазь вешематнень коряс кавто моро марто теезь видеороликть, вейкесь конатнеде морави a капельна. Омбоце пельксэсь – очной, козонь пурназельть васенце турсонть кочказетне. Морыцятнень иест ульнесь 10-стэ саезь.
«Кодамо моро минь моратано» фестивалень жюрисэ ульнесть творческой тевенть парсте содыця ломанть – те ИНК-нь раськень музыкань кафедрань доцентэсь, МР-нь культурань заслуженной важодицясь Т.В. Тюрина, ИНК-нь теке кафедрань профессорось, искусствоведениянь кандидатось, Г. И. Сураева-Королев лемсэ «Келу» фольклорной ансамблянь художественной руководителесь, МР-нь культурань заслуженной важодицясь С. В. Колесникова, ИНК-нь высшей квалификационной категориянь преподавателесь, «Разгуляй» казаконь моронь ды киштемань ансамблясо морыцясь, МР-нь Прявтонь премиянь лауреатось Т. И. Елистратова. Жюринь прявтсо аштесь «Мерема» этнографической фольклорной группань художественной руководителесь, Равчирень финнэнь-угрань раськетнень культурань куншкакуронь прявтось, МР-нь заслуженной важодицясь Е. О. Модина.
Мордовиядо башка фестивалентень сакшность морыцят Башкортостансто, Пензенской, Саратовской, Нижегородской областнестэ. Башкортостан Республикань Бижбулякской райононь Культурань кудосто Саранскоев васенцеде сакшнось «Олячи» этностудиясь, кона морынзе эсест республикань Белебеевской районсо сермадозь эрзянь моротнень – «Вай, иля пува, варма» ды «Косо Олдань кудозо». Коллективесь од, тензэ ансяк колмо иеть. Весемезэ эйсэнзэ 10 морыцят. Сынь тонавтнить минек раськень моротнень, койтнень-кирдатнень, налксематнень, конат улить эсест енксонь эрзянь велетнесэ. Башкортостансо, кода ламо лия республикатнесэ, эрить ламо раськеть. Эрзянь велекс жо ловови Каменкась, косо, натой, школасояк тонавтови эрзянь келесь. Теде тенек евтнесь «Олячи» этностудиянь ветицясь Елена Павловна Арефьева.
«Минь эсенек Бижбулякской районсо пек чуросто марятано эрзянь кель, секскак сась мель теемс истямо коллектив, конась карми ванстомо эрзянь культуранть ды койтнень-кирдатнень. Кадык лиятнеяк содыть, минек енкссояк улить эрзят! – паро мельсэ евтнесь Елена Павловна. – Коллективсэнть пурнавсть эрзянь ават, конатнестэ ламот уш пенсиясот. И. А. Данилова, Н. А. Воронцова, О. В. Данилова, А. В. Гордеева, Е. А. Волкова – те составсонть минь васенцеде лисинек сцена лангс колмо иеде икеле. Шкань ютазь коллективенек келейгадсь. Пек кенярдтано Саранскоев васенцеде самонть коряс».
Пелькстамосонть сехте покш казнесь – Гран-Прись – сатотсь Пензенской областень Башмаковской райононь Культурань кудонь «Артель» церань фолк-ансамблянтень. Сынь морызь эсест райононь «В островах охотник» балладанть ды «Во кузнице» пеедькшнемань моронть.
Морось веселгавты ды оймавты седей, лезды ломанентень печтямс стака шкатнень. Бути ванстовить кезэрень шкань моротне, те покш сюпавчи, конань ломантне кандыть пингеде пингес.
Марина Агафонова