Июлень 19-це чистэ Покш Игнатбуень Чукало велесэ ютавтовсь «Раськень озкс» республикань раськень фольклоронь кенярксчись. Коень коряс те кенярксчинтень сакшныть ломанть эрьва кодамо регионсто, натой минек покш масторонь сехте васоло таркатнестэ. Чачома ёнксось терди!
Покшчинть юрсо – эрзянь кезэрень коесь, весераськень озномась, конась туи эсензэ ундокстнэсэ язычествань шкатнес. Курганонть ваксс пурнавомсто, козонь путозь раськень штатолось, кезэрень эрзятне пшкалесть Инешкипазонтень, вешсть шумбрачи, норов, тевтнесэ лездамо.
Пингетнень пачк ютазь, кезэрень коесь полавтовсь ялгаксчисэ эрямонь ды вишка чачома енксонтень ды минек ине масторонтень вечкемань кенярксчикс.
«Раськень озксонтень» сакшность Мордовиянь Прявтось Артем Здунов, республикань Госсобраниянь Председателесь Владимир Чибиркин, МР-нь Правительствань Председателень васенце полавтыцясь Галина Лотванова, республикань районтнэстэ ды лия регионтнэстэ ламо инжеть.
Артем Здунов, пурнавозтненень пшкадемстэ, тешкстызе масторонь вейсэндявомань кемекстамонть туртов раськень культурань ванстомань эрявиксчинть.
«Те минек историянок, минек юронок! Кияк а ванстсы культуранок, минденек башка! Эряви ванстомс сонзэ ды пачтямс эсь эйкакштненень», – мерсь сон. Республикань Прявтось евтась сюкпря весенень, кить пурнавкшность кенярксчинтень, кить сакшность лия регионтнэстэ. «Ансяк эсенек невтевкссэ ванстсынек минек койтнень-кирдатнень ды раськенек!» – тешкстась Артем Здунов.
Кенярксчисэнть явшезельть государственной наградат. Мордовия Республикань Прявтонь Указонть коряс воинской долгонть топавтомсто невтезь мужестванть, отваганть ды апелемачинть кисэ «За смелость и отвагу» отличиянь тешкссэ казевсь СВО-нь участникесь Андрей Тимонин.
Кенярксчисэнть тешкстызь казнесэ тетятнень-аватнень, кить кастсть-трясть Отечествань вадря церат, масторонь ванстыцят.
Истя жо тешкстазельть мирдтне-нитне, конатненень казезельть «За любовь и верность» медальть.
Ды, нама, явшезельть казнеть эрзянь ды мокшонь раськетнень кельтнень, культуранть ды койтнень-кирдатнень ванстомаст ды сюпалгавтомаст кисэ.