Неть читнестэ минек республикасо ютавтовсть кавто покш мероприятият. Равчирень федеральной округонь кавто фестивальть: «Вернуть детство» ды «Успешная семья Приволжья – 2019». Неть кавто кенярксчитнень проекттнэ вана уш кемень иеть ютавтовить РФ-нь Президентэнь полномочной представителенть И.А.Комаровонь вановтонзо ало.
Сентябрянь 20-21-це читнестэ Равчирень округсто сыця од ломантне ды сынст тетяст-аваст, кить трить-кастыть кавтодо ламо эйкакшт, невтсть эрьва ёндонь ёрокчить. Ледстясынек, мелят Саранск ошонь округсо истя жо ульнесть пелькстамот ламо эйкакшонь триця семиятнень ютксо. Сестэ Мордовиянть пельде ульнесь Александр ды Елена Висюлькинтнэнь семиясь, косо трявить-кастовить 18 эйкакшт. Тедеде те эстафетась максозель минек республикасо эриця Галочкинтнэнь семиянтень.
Сентябрянь 21-це чистэ Саранскойсэ теевсть итогт «Вернуть детство» ды «Успешная семья Приволжья – 2019» фестивальтнень-пелькстамотнень коряс. Те покш чинтень сакшность ПФО-со РФ-нь Президентэнь полномочной представителень полавтыцясь Олег Машковцев, РФ-нь Федеральной Собраниянь Федерациянь Советэнь членэсь, Федерациянь Советэнь Раськеютконь тевтнень коряс комитетэнь прявтонь васенце полавтыцясь Сергей Кисляк, МР-нь Правительствань Председателесь Владимир Сушков.
ПФО-со РФ-нь Президентэнь полномочной представителенть пельде фестивальтнесэ пелькстыцятненень лембе вал марто пшкадсь полпредэнь полавтыцясь Олег Машковцев: «Течи минь тейтяно итогт Равчирень федеральной округонь сехте валдо кенярксчинть коряс, конась эрьва иестэ пурны Приволжьясо ветесядто ламо ёроков эйкакшт ды ламо эйкакшонь парсте триця семият. Фестивалень программань кавто читне пештязельть ламо тевде, ютавтовсь покш ды мазый кенярксчи, конась пештязель эйкакшонь мизолксто ды мельспародо. Тынь ульниде те мельвановикс кенярксчинть пельксэкс. Минь неинек од спортсментнэнь седейс токиця пелькстамост, «Звезды детства» гала-концертэнть ды «Успешная семья Приволжья» конкурсонть, интеллектуальной пелькстамотнень ды эйкакшонь прикладной творчествань мазычитнень». Седе тов сон эйкакштненень арсесь эрямосо а пелемс стакачитнеде, ютамс икелев, каштанчинь кирдезь невтемс эсь регионтнэнь. Сехте эрявиксэсь – а лоткамс изнявкстнэнь лангс.
МР-нь Правительствань Председателесь В.Ф.Сушков ёвтась поздоровт ды паронь арсемат МР-нь Прявтонть В.Д.Волковонь пельде.
– Минек туртов покш мельспаро: мельга-мельцек кавто иень перть неть фестивальтнень финальной этаптне ютавтовить минек региононь площадкатнесэ, – мерсь В.Ф.Сушков.
Сон ёвтась сюкпрянь валт республикань прявттнэнь пельде Равчирень федеральной округсо РФ-нь Президентэнь полномочной представителентень И.А.Комаровнень.
В.Ф.Сушковонь валонзо коряс, неть фестивальтнень вельде тёжат эйкакшт невтизь ды икелепелевгак кармить невтеме ёрокчист.
– Минь покш мельспаросо вастынек ояксчисэ эриця 14 семиятнень, конат састь весе регионтнэстэ. Весе неть тетятнень-аватнень покш авторитетэст обществасо, паро примерэкс аштить эйкакшост туртов, – мерсь В.Ф.Сушков.
Сон истя жо ледстинзе Мордовиянь сеть семиятнень, конатне икеле иетнестэ невтизь ёрокчист неть пелькстамотнесэ. Истя, 2015 иестэ Атюрьевасто Шумкинтнэнь семиясь саизе омбоце тарканть те конкурссонть. Кода вере уш ледстинек, ютазь иестэ Темниковасто Висюлькинтнэнь семиясь лиссь изницякс «Родительская слава» номинациясонть ды саизе ваныцятнень пельде призэнть. Тедеде Мордовиянть пельде ульнесь Галочкинтнэнь семиясь, косо трявить-кастовить колмо эйкакшт, вейкесь юткстост саезь трямс. Семиясь эри покш ояксчисэ, теи ламо седеймарямонь тевть, сеедьстэ эрси интернат-кудотнесэ, лезды нужачисэ эриця семиятненень.
В.Ф.Сушков пурнавозтненень пачтясь, кодамо мель минек республикасо явови ламо эйкакшонь триця семиятненень. Васняяк, льготань ипотекань коряс эрямо таркань стявтомась, од эйдень кужотнень, школатнень строямось.
Ламо эйкакшонь триця семиятненень лембе валт ды паронь арсемат истя жо ёвтась РФ-нь Федеральной Собраниянь Федеральной Советэнь Раськеютконь тевтнень коряс комитетэнь прявтонь васенце полавтыцясь Сергей Кисляк. Сон макссь казнеть изницятненень. «Успешная семья Приволжья – 2019» пелькстамосонть васенце тарканть саизе Удмуртиясто Русских семиясь, омбоценть – Оренбург ёнкссто Дудниковтне, колмоценть – Пензань ёнкссто Бурцевтне. Мордовиянь Галочкинтнэнь семиясь лиссь изницякс «Доброе сердце» номинациясонть, истя жо сыненст максозь ваныцятнень пельде призэсь.
Теке жо чистэнть теевсть итогт «Вернуть детство» пелькстамонтень. Васенце таркась «Ума палата» ёнксонть коряс максозь Оренбург ёнксонь «Великие умы» командантень. Омбоценть саизь Саратова ёнксонь превейтнень ютксто превейтне, колмоцекс лиссть Кировонь ёнкссто сыцятне. Сыненст казнетнень максынзе МР-нь Общественной палатань прявтось Иван Капитонов.
Истя жо ёвтавсть «Спортивный Олимп Приволжья» Спартакиадань изницятнень лемест, конась ютавтовсь спортонь вете видэнь коряс. Изницякс лиссь Мордовия Республикань командась, омбоце тарканть саизе Кировонь ёнкссто сыця командась, колмоценть – Удмуртиянь командась.
Фестивальтне прядовсть, ледстнематне жо кувать эштё кармить эждеме эйкакштнень седеест, кенярдовтомо тетяст-аваст.
Валентина Юдина