Четверг, марта 28, 2024
Важное

Эрзятнень ды мокшотнень культурасост ули инжень вастомань башка кой. Седе, кодат сынь инжень паро вастыцят – теде парсте пачтяви фольклорсо. Ули истямо валмеревкс: «Азорось эрьва инженть симдьсы, андсы ды кедьсэнзэ кандтнесы». «Инже» валсонть ули «ине» юрось, конань смустезэ «пек покш».

 

Ламо исследовательтне ды васоло таркасто сыця инжетне, конат понгонесть эрзятнень ды мокшотнень юткс, ёвтнесть ламо эрьва кодат койть. XVIII-це пингестэ Франциянь инязоронь посолось Г. де Рубрук пачтясь: «Бути мокшэрзятненень сы купець, се, кинь кедьс сон лотки, карми мельганзо якамо ды кисэнзэ мелявтомо се шкас, зярс тона карми улеме вакссост». «Эрзятне ды мокшотне, – тешкстась П.И. Мельников, – обуцяст коряс сэтьметь, паронь арсицят ды кенярдыцят».

Инжекс якамонь коенть ульнесть лувонзо. Эрявсь тердемс, вастомс, каванямс, ваномс мель. Инжетнень явшесть истямо пелькска: малавикс раськеть, васоло роднят, ялгат, инжеть, конат састь тевень коряс, а содавикс инжеть ды седе тов.

Малавикс роднятнень ды ялгатнень вастсть пек лембестэ. Тевень коряс сыця инжетнень вастсть парсте, каванясть, ансяк те вастомасонть ламо лембе арасель.

Коень коряс, покш читнес ды кудораськень кенярксчитнес инжеть сыльть ансяк тердемань коряс. Ломантнень ютксо кортасть: «Кодамо кенярксчи, зярдо инжеть арасть», «Кенярксчись сы – инжеть туи».

Шабратне ды содавикстнэ лиясто сялдылизь азортнэнь, бути сынь конаньгак малавикстнэнь, ялгатнень ютксто а тердилизь. Шнасть, зярдо азортнэ кирдсть ялгаксчи роднятнень ды шабратнень марто. Сеедьстэ кода эрсесь? Шабратне ульнесть аволь ансяк инжеть, сынь лездасть азортнэнень эрьва тевсэ.

Бути инжетнень самодо содасть шкадо икеле, сынст вастомо мольсть килангс эли веленть пес. Вастомо лиснесь весе семиясь, эйкакштнеяк. Вастомсто ульнесть башка пшкадемат, ламо кортамс эзь мереве.

Сазь инжетнень озавтылизь столь экшс, сехте паро ды неявикс таркантень. Васня озыльть цёратне, теде мейле – аватне. Од ломантне ды эйкакштне покштнень юткс столь экшс зярдояк эзть ойсе. Сыненст эзь мереве кунсоломс, мезде кортыть, ёвтамс кодамояк вал. Инжетнень свал бажасть каванямс сехте тантей ды паро ярсамопельде. «Меельцеть максык-кандык, ансяк инженть каваник» – ульнесь истямо валмеревкс. Сонсь инжесь сыль аволь чавонь кедть, свал туиль мартонзо эйкакштнень туртов казнеть-ламбамопельть.

Азортнэнь столь экшсэ кодат ансяк каванямопельть арасельть! XIX-це пингень мокшэрзянь культурань исследователесь В.Н. Майнов тешкстась: «Эрзятне ды мокшотне парсте ярснить покш читнестэ. Сынь пидить-панить прякат, пачалксеть, сывель ям, ямксонь каша, чапамо ловсо, кал эли сывель марто рестазь алт».

Эрзятнень ды мокшотнень койсэст улить каванямот, конатнень пидесть-пансть ансяк инжень самодо икеле. Неть: прякат, пачалксеть, ямксонь каша, рестазь сывель, лапшовник, рестазь алт, студень ды лия мезе.

Столь экшсэ аштемстэ ульнесть башка койть: весементь мельга вансь кудазорось. Ярсамопельтнень ды симемапельтнень кандтнесь азоравась. Азорось керсесь кши, явшесь сывеленть, каванясь, мерсь варчамс тень-тонань. Азортнэ ды инжетне апак капша кортасть.

Зярдояк эзть кевкстне инженть, мезень коряс сон сась ды зярдо туи. Каванямодо мейле инжесь ёвтнесь эсь прядонзо, тевдензэ, мекс сась. Эрзятне ды мокшотне аштесть мельспаросо инженть самонзо кувалма. Эрьвась ёвтнесь кодаткак кулят, пачтясь малавикстнэде, кода молить тевтне. Ярсамодо мейле инжетне стильть столь экшстэ ды ёвтыльть азортнэнень сюкпря. Инжентень эрявсь ветямс прянть парсте, а эцемс кудораськень тевтнес, куватьс а кирдевемс.

Седе тов азорось анокстась килангс инженть марто каванявкст, сынь алтавсть сетненень, кить эзть саво эли ормалгадсть. Ильтясть инжетнень орта лангс эли седе васов. Туемстэ инжесь свал ёвтыль азортнэнень сюкпря вастоманть, симеманть-андоманть кисэ. Инжетнень туемадо мейле азортнэ кувать эйстэдест кортнить, ледстнить. Те чистэнть (зярдо ильтявсть инжетне) эзь мереве кудосонть ютавтомс шлямот-урядамот.

Ней шкатне полавтовсть. Ломантне чуросто яксить вейкест-вейкест туртов инжекс. Чачома читнень, лия кенярксчитнень тешкстыть кафесэ эли ресторансо, ламо инжеть ды ялгат а тердтнить. Лембе кортамотнень полавтызь социальной сетень лопасо фотографиятне, конат ёвтнить-пачтить ломаненть весе эрямодонзо ды тевдензэ.

Арсетяно, курок ютыть мелявксов шкатне ды минь таго вастовтано вейсэ.

Лопанть анокстызе Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».