Минек масторсо пек ламо ёроков ды кедьчелькев ломанть. Сынь эрить Россиянь эрьва регионсо. Минек республикаськак сюпав ёроков ломаньсэ. Арсян, ловныцятне а весть яксесть «Шумбрат, Мордовия!» ды региононь ламо лия фестивальтнева-пелькстамотнева, ды эсь сельмесэст ваннызь Мордовиянь кедьчелькев ломантнень выставкатнень, конатне дивавтыть эсь мазычисэст.
Койсэнь, эрьва мастерэнть важодеманзо а молить лиятнень ёнов: кие-бути тейни понань кемть, лиясь арты-мазылгавты тарелкат ды кузонь налкшкеть, улить истяткак, кие керси чувто ланга, сты-викшни раськень оршамопельть, нардамот ды седе тов. Неть сырнень кедь ломантне – минек региононть каштанчизэ, эдь самай сынь ванстыть раськень койтнень-кирдатнень ды бажить содавтомс сынст марто эсь эйкакшост ды нуцькаст.
Истятнэнь ютксо Светлана Ямбикова. Ёроков аванть важодевксэнзэ свалшкань инжеть республикань кенярксчитнесэ ды пелькстамотнесэ. Вейке истямо мероприятиясо минь теевинекак мартонзо содавиксэкс. Светлана Владиславовна – ломанесь ёроков, кодамо тевс а кунды – кедь алдонзо лиси а ёвтавикс мазычи. Кода тешкстызе героинясь, творчествань сяткинесь сонензэ ютась аванзо пельде. Авазо, Валентина Кузьминична, пингень перть важодсь ательесэ стыцякс. Малавикс ломанензэ пельде Светлана вишка порасто тонавтнесь стамонь, викшнемань ды кодамонь салавачитнень.
Светлана Ямбиковань ундоксонзо – Белоруссиясто. Те таркась – аванзо тиринь ёнксозо. Теде башка, рунгованзо чуди чуважонь верьгак. Тетянзо, Владислав Алексеевичень, раськезэ Чувашия ёнксонь Вурнарской районсто. Сон весе эрямонзо алтызе военной службантень, конань коряс самай кучозельгак важодеме Белоруссияв, косо теевсь содавиксэкс нинзэ марто. Семиясь зярыя шкань перть эрясь тосо. Мейле тусть Оренбургов, косо Светлана тонавтнесь школасо. Школань прядомадо мейле тусь тонавтнеме тетянзо тиринь ёнксов. Кочкизе И. Я. Яковлев лемсэ ЧГПУ-нь художественно-графической факультетэнть, тонавтнесь «Учитель рисования, труда и черчения» специальностенть коряс. Университетэнть прядомадо мейле важодсь «Дом пионеров и школьников» эйкакшонь творчествань кудосо. Секе шкастонть лиссь мирденень ды мартонзо састь эрямо Мордовияв. Эрямонь таркакс кочкизь Ицялонь райононть. Самодо мейле, омбоце чистэнть жо, авась сыргась важодема таркань вешнеме. Недлянь ютазь кармась роботамо Ицялонь педучилищасо тонавтыцякс. Ды вана уш 30 иеде ламо важоди вейке таркасо. Эрьва ие тонавтыцянть кедьга ютыть сядо студентт. Кадык эйкакш марто важодемась саи ламо вийть ды цидярдома, ансяк Светлана Владиславовна ялатеке вечксы эсь тевензэ ды путы тенень седей.
Важодемань тевдензэ башка, авась а стувтни творчествадонзо. Вана аволь умок Светлана ушодсь викшнеме эрзянь раськень авань оршамопельть. Теде башка, авась тейни дивавтыця сюлгамот.
– Эряви меремс, неень шкасто од ломантне явить покш мель этностилентень. Истя превезэнь сась теемс лия ёнов а молиця мазылгавтомат, конатне кармить кецявтомо аволь ансяк сыретнень, истя жо одтнэньгак. Сюлгамотне вечкевить весенень. Кие рамси эстензэ, ламот жо – казнекс малавиксэст туртов, – ёвтни минек героинясь.
Алкукскак, Светланань сюлгамотнень мазычист токить седей. Сынь викшнезь раськень тешкссэ ды човалясо.
Истямо казнесь вечкеви эрьва мазыйканть туртов. Авась истя жо сты панксонь някат, понань сурестэ коды эрьва кодат налкшкеть, арты паннот ды картинат, тейни човалясто мазылгавтомат ды а весть варчакшнось оршамопелень стамояк. Теде башка, сонзэ улить кедень зярыя теевксэнзэяк – понгавтомат, сюлгамот ды мазылгавтомат.
– Мон а аштян ве таркасо. Шкинемань тевсэнть бажан касомс. Панжан эсь туртов од ёнкст ды кедьчелькев ломанть. Пек покш кеняркс, зярдо тееван содавиксэкс ёроков ломань марто. Секскак покш мель яван фестивальтнень ды ярмункатнень содавтомантень. Истят вастовоматне максыть свежа кошт монь ойментень, – корты Светлана Владиславовна.
Истя жо авась муи шка ветямс кудоютконь тевтнень – касты эмежть, эрьва кодамо сортонь цецят ды умаринат. Ямбиковтнень умарьпирест свал дивавты эсь сюпавчисэнзэ ды мазычисэнзэ. Ули минек героинянть эштё вейке вечкевикс тевезэ – сон яви мель йогантень. Эдь шумбрачись сехте питней, сонзэ эряви ванстомс.
Теке марто Светлана – уцяскав ава. Мирдензэ марто трясть-кастсть кавто эйкакшт. Ней уш цёратне сынськак пурнасть семият, улить эйкакшост. Сынь а стувтнить тетяст-аваст. Недлянь оймсема читнестэ сыть тиринь районов малавиксэст содавтомо. Эрьва самсто цёратне садпиресэ тол лангсо казансо пидить сывелень тантей ярсамопельть. Те коесь чачсь Ямбиковтнень семиясо а умок. Ансяк сон вечкеви эрьвантень.
Алена Артемьева