Вторник, декабря 01, 2020
Важное

Статистикань максоматнень ванозь, пек талновты истямо тевесь – меельце комсь иетнень перть Россиянь картанть лангсто ёмасть комсь тёжадо ламо велеть.

Течи тосонь эрямо лувдонть ёвтнить чаво, пельскаладозь кудынетне, лиятнесэ жо истятнэяк а муевить. А эштё зяро велинеть, косо эрицятнеде ансяк 2-8 ломанть?

Иестэ иес чамиця велетне ламолгадыть минек республикасонтькак. Ды, васенце тувталокс ламосо, паряк, ашти важодема таркатнень арасьчись. Тень коряс од ломантне кадыть тиринь кудост ды туить велетнестэ ошов. Ды токи те седе пек сеть велетнень, конат аштить пек васоло покш оштнень эйстэ.

Покш Березник ёнксонь Госагыр (Косогоры) эрзянь велесь ашти пек мазый таркасо. Ды теке шкасто, аволь пек васоло райононь куншкакуронть ды Саранск ошонть эйстэяк (13 вайгельбень тарка Березникенть видьс ды малав 40 вайгельбеть Саранскоенть видьс). Тень лангс апак вано, иестэ иес эрицятне тесэ аламолгадыть ды яла седе чуросто марявить эйкакшонь гайтев вайгельтне. Аламонь-аламонь велесь чами.

А эдь овсе лият тевтне ульнесть 20-30 иеде икеле. Сестэ эрямось тесэ алкукс лаказь лакась. Эйкакштнеде ды од ломантнеде ульнесть ламо, эрицятне роботасть колхозсо ды эрьва семиясо кемсть – веленть ули вандынь чизэ.


Аволь умок минь содавтынек те эрзянь веленть ды кортынек тесэнь администрациянь прявтонть Наталия Николаевна Бистяйкина марто. Наталия Николаевна ёвтнесь веленть течинь эрямодонзо, икеле шкатнеде ды сы шкантень мельтнеде-арсематнеде.
– Минек Госагырэнь администрациянть юрс совить кавто велеть – сонсь Госагырэсь ды шабра Софьинась, – ёвтни Наталия Бистяйкина. – Эрицятнеде неень шкантень лововить малав 400 ломанть. Велесэнть важодить эйдень кужо, Культурань кудо, ФАП, библиотека, почта, ули лавка. Ансяк вейкесь апаркстомты – арасть важодема таркат. Самай те тувталось панияк тесэнь эрицятнень вадря эрямо мельга покш оштнес. Эсь семиянть эряви трямс, ды од ломантне уш а бажить поладомс эсь эрямонть тиринь Госагырсэ.

Овсе лият тевтне ульнесть зярыя кементь иетнеде икеле. Эряви меремс, ютазь пингень 1931 иестэ велесэнть пурназельть кавксо колхозт. Важодема таркат ульнесть весенень, кадык эрицятнедеяк лововсть зярыяксть седе ламо. Мейле, 1950 иестэ, тесэ важодсь «Луч Правды» колхозось, 1997 иестэ – «Косогорский» СХПК-сь. Зярыя шкань ютазь сонзэ калавтызь, ды эрицятне кадовсть важодема таркавтомо. Вадря, маласот Атемарень ды Чаунзань нармунень тряма-кастома фабрикатне, ламот важодить тосо. Эрьва чистэ валске марто сынст мельга сакшны автобус ды уски важодема таркав, чокшне мекев пачти кудов.
Ульнесь велесэнть средней школаяк. Ансяк меельце иетнестэ эйкакштне аламолгадсть ды школанть пекстызь. Ней кавто этажсо кирьпецень зданиясонть важодить велень весе учреждениятне – тесэ администрацияськак, Культурань кудоськак, библиотекаськак, ФАП-ськак ды почтаськак. Весе вейке таркасот. Школав жо эйкакштне якить шабра Починка велев. Тосо важоди вейксэ иень школа. 10-це ды 11-це классос жо тонавтницятнень усксить Березникев.

– 2017 иестэ минек велесэ панжозель эйдень кужо, – тешксты Наталия Николаевна. – Зданиясь икелень шкатнестэ строязель тей сакшныця студенттнэнь-практиканттнэнь туртов, важодсь кода общежития. Мейле истят студенттнэ тей сакшномодо лоткасть ды зярыя иень перть зданиясь аштесь чаво. Зярдо, 2016 иестэ, монь аравтымизь велень администрациянь прявтонь таркантень, мон весементь парсте арсия, кортынь эрицятнень марто ды решинек панжомс тезэ эйдень кужо. Колмо иеде икеле бажамонок топавтовсь. Те иестэнть кужосонть эйкакштнеде ансяк кото (нилетне эсенек велень, кавтотнень усксить Починкасто), теке марто кемтяно, кармить велесэнек эйкакш марто од семият. Эдь эсь веленть ванстсынек ансяк минсь.

Веленть ды тесэнь эрямонть вадрялгавтомга Госагырсэ бажить теемс весементь. Истя, 2017 иестэ тевс нолдазель экономикань истямо ёнксось, кода самообложениясь. Пурназь целковоенть лангс государствась явсь эштё целковой. Ды неть ярмактнень лангс велень куротнень валдомгавтомга понгавтнезельть лампочкат. Истя жо самообложениянь ярмактнень лангс витнезель веленть песэ аштиця лисьмапрясь. Кода мерсь Наталия Николаевна, лисьмапрянь ведесь истямо тантей, натой тей ардыть эрьва ёндо.

Башка мель велесэнть явови культурань эрямонтеньгак. Тесэ бажить а менстямс вейкеяк кенярксчинь мероприятия ды свал анокстыть эрицятнень туртов концерт эли невтема. Покш мероприятият ютавтовить Авань чистэнть, Сыре ломантненень алтазь чистэнть, Од иенть вастомсто ды лия кенярксчитнестэ. Эрьва ие маень 9-це чистэ Госагырэнь эрицятне пурнавкшныть войнасо чавовозтненень кеврунгонть ваксс торжественной мероприятияс, кона алтавкшны Изнямонь чинтень. Пек ламо тень лангсо важоди велень библиотекаресь Светлана Андреевна Стольная. Сон сонсь моры, машты музыкальной инструментсэ седямо, вети куро социальной сетьсэ ды бажи весе эрицятнень совавтомс эсь важодемантень.

Госагыр велень эрьва эрицянть седеензэ течи пултазь пулты уроз эйкакшокс веленть куншкасо аштиця церьковась. Сон стявтозель эштё ютазь пингень 1915 иестэ. Якстере кирьпецень покш ды мазый церьковась минек шкатнес ванстовсь уш аламодо каладозь. Сон кемекстазь республиканской значениянь архитектурань памятникекс ды путозь государственной учётс. Зярыя иеде икеле сонзэ светизь кода Никольской церькова ды ушодокшность витнемензэ. Ансяк зярыя шкань ютазь тевтне лоткавтозельть ярмаконь аразде. Кода тешксты Наталия Бистяйкина, церькованть витнемасо-одкстомтомасо эряви спонсортнэнь лезкс, велень администрациянть вийсэ те а топавтови, сонзэ арасть ярмаконзо.

Аволь умок Госагыр велесь ды сонзэ перька аштиця модатне совасть туристэнь маршрутс. Тесэнь чачозесь Александр Иванович Зубков изнясь этнотуризмань коряс грант ды Госагыр веленть малас тейсь оймсемань ды туризмань туртов тарка. Те таркась ашти виренть потсо, мазычиденть ды сэтьмечиденть эрьва сыцянть ёжозо сеске вадрялгады. Тесэ ули ванькстэяк ванькс ведь марто эрьке, оймсемань туртов эзем марто парк, туристтнэнь туртов стявтозь кудынеть. Азоронть ули ракшань фермазо. Ули мелеть, ютак сынст вакска. Мереви натой андомскак сынст. Мекс аволь агротуризма?!
Кие соды, паряк, самай теньсэ ванстовияк велесь? Кармить само туристт, веленть бюджетс кармить ютамо налогт, ды тесэнь эрямось полавтови вадрянть ёнов. Карматано кемеме, Госагыр веленть ули вандынь чизэ!

Юлия Еремина
фототне: Э.Ретунский

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».