Течи минек газетань инжесь – Н. П. Огарёв лемсэ МГУ-нь филологиянь факультетэнь васенце курсонь студенткась Елизавета Удельнова. Ёроков тейтеренть чачома-касома тарказо – Орданьбуень райононь Низовка велесь. Мейсэ жо эрзянь мазыйканть ёрокчизэ? Сеньсэ: сон кавксоце классто саезь сёрмады тиринь кельсэ ёвтнемат, мизолкст ды стихть. Кадык ушодыця сёрмадеенть сындест а пек ламо, ялатеке сонзэ произведениятне казить ловныцятнень туртов кемема: эрзянь раськесь эри, сонзэ улить поладыцянзо.
Васняяк эсь маштоматнень невтнинь райононь пелькстамотнесэ, шкань ютазь, зярдо седе таштавсть содамочитне ды сёрмадовксон, школасто кучнимизь республикань олимпиадав, – тешксты тейтересь.
Лиза седе сеедьстэ сёрмады мизолкст, конатнесэ панжи истят темат, кода, саемга, эрзянь велень эрямось, пертьпельксэнь полавтовоматне, истя жо вельмевти кезэрень шкань ёвкст, легендат ды сёрмады сынст эсензэ койсэ. Тейтеренть произведениянзо токить ламонь седеест, эдь сёрмадыцясь ловныцянтень панжи эрьва чинь эрямонть марто сюлмавозь тематнень. Содатано, сынь малавикст эрьвантень. Секскак Лизань сёрмадовксонзо ловновить шождасто.
Аволь умок тейтеренть тердтнизь од сёрмадыцянь семинарс, конась ютавтовсь МР-нь Писателень союзсо.
– А сёпан, пек кенярдынь те вастовомантень. Зярдо явновинек секциява ды теевинек содавиксэкс эсенек юткова, чарькодинь – неть ломантнень ютксо мон марян прям пек уцяскавокс, сёрмадомань сяткинесь кирвазсь седеяк пек, эдь сёрмадейтнень пельде ульнесть пек эрявикс превс путомат ды мольсь лембе, – ёвтни Лиза.
Сёрмадыця ломантнень марто кортамсто сеедьстэ чачи кевкстема: косто жо саеви мелень кепедемась? Лиза те кевкстеманть каршо мерсь истя:
– Монь туртов вдохновениясь сакшны тиринь велесэ улемстэ, ошонь кувака ульцява ютамсто ды пертьпельксэнь ванкшномсто. Тон а содат, кодамо шкане те ёжось сы, ансяк свал эряви а ёмавтомс сонзэ стяко, сёрмадомс. Монь ламо черновикень, конатнесэ сёрмадозь зярыя ёвтнемат ды мизолкст. Ансяк сынст лангсо эштё сави вадрясто важодемс. Тешкстаса, университетсэ тонавтнемась саи ламо шка ды вийть, секскак неень шкасто сёрмадомань тевентень пек чуросто кундсян. Бути оймсема читнестэ молян тиринь велев, тосо уш сёрмадан байтяк, – ёвтни Лиза.
Од тейтеренть марто кортамсто карминек содамо, малавиксэнзэ ютксо арасть сёрмадыцят, теке марто улить ёроков ломанть. Лизань бабазо – Зоя Степановна Клементьева – пингензэ перть морси «Цёковне» велень ансамблясо. Сонзэ гайтев ды пек мазый вайгелезэ. Бабазо неень шкастояк а соды оймамо, свал котьми кудоютконь тевсэ. Истя жо сонзэ пейдицянь обуцязо. Ансяк те пейдемась аволь згилиця, мекевлангт, нусманя ёжонь витиця. Обуцянь истямо ёнксось ули тейтерентькак. Бабанзо марто эрьва вастовомадонть мейле Лизань чачить од сёрмадовкст. Сон уш а весть невтнесь эсь ёрокчинзэ университетэнь пелькстамотнесэ. Ды, эряви меремс, ламоксть изнясь васенце таркат.
Од тейтерентень арсетяно а кадомс сёрмадомань тевенть, сонзэ ули теньс ёрокчизэ. Эдь неень шкань эрзянь литературасонть кадовсть малав кеменьшка ломанть, кить сёрмадыть сэметь.
Тедеде Россиянь Печатень чистэ Елизавета Удельнова кармась МР-нь Прявтонь литературной премиянь лауреатокс. Ёроков тейтеренть туртов те тевесь кармась покш кенярксокс ды казнекс, од сёрмадыцянть эштёяк кепететсь мелезэ а кадомс эрзянь кельсэ сёрмадомань тевенть седе товгак.
Алёна Артемьева