Дарья Пирогова марто теевинь содавиксэкс аволь умок. Тейтересь вети «ВКонтакте» социальной сетьсэ «Пек вадреныш» этноблог. Мекс жо сон макссь истямо лем? Дарья тешкстась, неень шкань од ломантне бажить молемс од технологиятнень марто ве лувсо. Истя, чокшне ланга, а мезе теемадо. сон варчась озямс искусственной интеллектэнть марто, кона арсеськак сонзэ туртов этноблогонь лем.
Равчирень превейка
Дарья эри Ульяновск ошсо. Тосо сон чачсь-кассь, тосо эрить весе сонзэ малавикс ломанензэ. Тейтересь ансяк аволь умок кармась тонавтнеме эрзянь келенть. Тиринсекс тензэ ашти рузонсесь, вадрясто содасы немецень келенть. Школань иетнень шкасто Дарья а весть ульнесь немецень келень тонавтнемань лагерьсэ. Тосо ламо мезе кармась содамо Россиясо эриця немецтнень ланга. Паряк, те кармавтызеяк тейтеренть седе домкасто тонавтнемс тиринь масторонть историянзо. Ды сон ушодсь ловномо историянь коряс книгат, кармась явомо мель тиринь енксонь культуранть тонавтнемантень. Шкань ютазь Дарья кармась содамо, Ульяновской областьсэ эрить ламо эрзят ды мокшот. Эрзянь раськень сонзэ ульнесть покштянзо-бабанзояк, секскак сон кармась тонавтнеме эсь раськень келенть. Эрзякс кортамось тейтерентень пек вечкеви.
– Кудораськесэ кияк а корты эрзянь кельсэ. Тетям-авам рузонь ломанть, важодить Ульяновскоень государственной технической университетсэ (УлГТУ-со). Сынст пельде карминь содамо, минек раськесэ ульнесть эрзянь ломанть – те монь покштям Петр Павлович ды бабам Нина Михайловна Инюшинтнэ. Ансяк сынь умок уш кулость. Сави тень эсень вийсэ тонавтнемс те мазый ды гайгиця келенть, – евтни Дарья.
Те тевсэнть тейтерентень тагояк лездыть неень шкань технологиятне – Интернетэсь ды Мордовиянь НТМ телеканалось, косо лиснить эрзянь кельсэ передачат, конатнесэ тейтересь ваны покш мельсэ. Теде башка, Дарья сермадстызе прянзо Александр Учеваткинэнь «Вконтакте» социальной сетьсэ «Кортамо кудо» эрзянь келень тонавтнемань клубонтень. Сюкпря евты эрзянь церантень Александр Данильчевнень, конась истя жо лезды тензэ келенть тонавтнемасо. Истя жо Дарья сермадсты «Эрзянь правда» газетанть, ды пек пштистэ ваны-ловны социальной сетьсэ эрзянь кельсэ ветявиця лопатнень.
Эряви меремс, тейтересь а менсти эрзянь-мокшонь раськень вейкеяк кенярксчи. А весть ульнесь Ульяновской областень «Шумбрат!» покшчисэнть, косо теевсь содавиксэкс Андрей Бочканов марто. Те вастовомадонть мейле Дарья кармась седеяк домкасто тонавтнеме эрзянь раськень койтнень-кирдатнень. Ламо мезе эрзянь культурадонть тейтересь евтни эсензэ этноблогсо. Сермадовксто башка, Дарья тов путни мазый фотот, конатнень вельде истя жо бажи евтнемс ловныцятнень эрзянь келенть вечкемадонзо. Сонзэ покш мелезэ раштамс ды кастомс эрзянь раськеденть ды кельденть эсь содамочитнень.
Аволь умок Дарья невтинзе эсь содамочинзэ «Эрьгине» эрзянь-мокшонь творчествань пелькстамосонть. Сон ловнось стих ды морась моро, мероприятиядонь тейтересь кадовсь покш мельспаросо. Икелепелев Дарья бажи эште а весть примамс участия раськень кенярксчитнесэ аволь ансяк кода инже, кода участниккак.
Ёроков ломанесь ёроков эрьва мейсэ
Дарья Пироговань эрямосо покш тарка саи шкинемась. Эште школасо тонавтнемстэ сон кармась якамо Ульяновскоень Од ломанень киношколав ды Од ломанень кинематографиянь центрав. Неть кавто таркатнесэ тейтересь кастызе театрасо налксемань ерокчинзэ: лоткась пелеме сценадонть, стувтызе виздеманть. Дарьянь васенце спектаклязо, косо сон налксесь прявт роль – «Любовь с ответом» рузонь драмась. Эряви евтамс, 2021 иестэ саезь тейтересь якси эсь университетэнь студентэнь театрав, косо налкси эрьва кодат рольть. Сехте вечкевикс спектаклязо – «Любовь. Чехов» путовксось. Самай те спектаклясонть налксемадо мейле сонензэ кармасть максомо покш рольть лия спектаклятнесэ. Актеронь шкинемась сонензэ пек вечкеви. Те тевсэнть сон мари прянзо уцяскавокс.
Неень шкасто Дарья тонавтни университетсэ. Кочкизе Ульяновскоень государственной технической университетэнь «конструирование и технология электронных средств» тонавтнемань енксонть. Седе тов арси улемс инженерэкс-конструкторокс. Чарькодеви, те важодемань енксось аволь шождатнестэ. Ансяк Дарьянь стакачитне а тандавтнить, сон соды, бути сындест а пелемс ды ютамс тешкстазентень, весемесь лиси. Тонавтнемадонть башка сон уш омбоце ие вети университетсэ профориентационной важодемань коряс секторонть. Ардтни областень школатнева ды евтни университетэнть ланга. Тейтересь важоди те енкссонть а ськамонзо, сонзэ ули вадря ды виев командазо.
Дарья Пирогова сермады стихтькак. Седе сеедьстэ эйсэст невти тиринь енксонзо, малавикс ломанензэ ды вечкевикс тевензэ.
Яви мель
спортонтень
Кода кортыть, шумбра рунгосо шумбра ойме. Те валмеревксэсь лади минек героинянтень, эдь Дарья уш ламо иеть яви мель спортонтень. Тейтересь вечки бассейнасо укшномо, кизна мельспаросо яки Рав леенть чирев. Истя жо вечксы футболонть. Вечкевикс налксицянзо – эсест енксонь «Волга» футбольной командась. Иень перть бажи а менстямс те команданть вейкеяк налксеманзо. Семиясонть футболонь вечкицясь а ськамонзо, тенень мель явить тетязо ды вишка ялаксозо.
Эште Пироговтне пек вечкить пурнавомо вейсэ. Эрьва оймсема читнестэ сынь яксить экскурсияв, Од иень эли кизэнь каникулатнестэ бажить содавтомс лия оштнень. Ульнесть Калининградсо, Казаньсэ, Балтийск ды лия оштнесэ. Те коенть сынь арсить поладомс седе товгак.
– Ардтнемс лия оштнева – те сюпалгавтомс эсь содамочитнень ды каземс эстеть вадря ежомарямот. Тиринь масторсо эрьва таркась дивавты эсь историясонзо, мазычисэнзэ ды ломаньсэнзэ, – корты Дарья.
Видеть тейтеренть валонзо. Покштояк покш минек масторось, эрьва ошось эсь койсэ мазый ды лиятнень енов а молиця.
Алена Артемьева
Фототне саезь
Дарья Пироговань архивстэ.