Эрзянь ды мокшонь национальной драмань театрасо панжовсь од сезонось. Ваныцятнень туртов анокстазель од путовкс – В. Мишанинань пьесанзо коряс «Эрьзя. Валдос ливтиця» спектаклясь. Сон алтави эрзянь ине скульпторонть С. Д. Эрьзянь чачома чистэнзэ саезь 145 иетненень.
МР-нь народной писателесь, мокшонь драматургось В. И. Мишанина ламо шкань перть важодсь пьесанть лангсо. Сон ловнось биографиянзо, вешнесь Эрьзянь эрямостонзо саезь тевть-валт. Пьесась лиссь покш, малав 60 лопат. Спектаклясо сон максови малав пелезэ киртязь. Спектаклянть путызе Россиянь ды Калмыкиянь искусствань заслуженной деятелесь Борис Манджиев. Сон аволь васенцеде важоди минек путовкстнэнь лангсо Нацтеатрасо.
Степан Эрьзянь одсто роленть налкси Евгений Благов, сырестэ – МР-нь заслуженной артистэсь Дмитрий Мишечкин. Путовкссонть невтевить скульпторонть зярыя вечкевикс аванзо: Дёля (одсто Евгения Акимова, сырестэ – МР-нь заслуженной артисткась Галина Самаркина), Марта француженкась (Елена Гудожникова), Аргентинасо Эрьзянь тонавтницязо Доротея (МР-нь заслуженной артисткась Марина Аверкина), Недда (МР-нь заслуженной артисткась Нина Абросимова). Весень сынст потсо гувны-палы вечкемань тол эрзянь цёрантень. Ансяк скульпторось эрямонзо перть васенце таркас аравтсь эсь тевензэ – искусстванть. Теевксэнзэ ловсь ды лемдсь эсензэ эйкакшокс.
Кода содатано, С. Д. Эрьзя ламо шка эрясь омбо масторсо, пек бажась велявтомс тиринь ёнксов. Ансяк аволь сеске те лиссь. Спектаклясонть парсте невтезь эрямосонзо те пельксэсь. Истя жо актёртнэ вадрясто налксизь советэнь шкань прявттнэнь ды чиновниктнень, конат эзть нолда Эрьзянь СССР-в. Мастерэсь ялатеке велявтсь эсь масторов.
Лембе валсо тешкставлинек Дмитрий Мишечкинэнь налксеманзо. С. Эрьзянь ролесь тензэ изнявсь. Ванат ды прок алкукс сцена лангсо минек гениесь: кепе коня, сельмукшсо, пухадемка марто, молевксэзэяк невтезь. Весе спектаклянть перть ризнат сонзэ кисэ, мелявтат ды кецнят: сон велявтсь ды тесэ муинзе творчестванзо вечкицятнень. Театрасто самодо мейле чачсь покш мель молемс С. Д. Эрьзя лемсэ музеев, ваномс ине теевксэнзэ, ловномс К. Г. Абрамовонь «Эрзянь цёра» романонть.
Татьяна Маторкина
Фототне Эдуард Ретунскиень