Маень меельце читнестэ минь якинек инжекс Саранск ошонь округонь Луховка поселкань лицеев. Тонавтнемань те учреждениясь важоди 1955 иестэ саезь. Сонзэ прявтсо уш ламо иеть эсь тевензэ содыця ды эряза авась Светлана Александровна Леухина. Коллективесь, конась важоди те лицейсэнть, – покш ды кеме. Тонавтыцятне тешкстыть, педагогтнеде ламо, ансяк весе сынь важодить кода вейке покш команда, косо эрьвась – профессионал покш буквасто.
Ловныцятненень ули меленек евтнемс эрзянь келень тонавтыцядонть, ероков авадонть Елизавета Викторовна Кабановадо, кона важоди Луховкань лицейсэнть вана уш вете иеть.
Тонавтыцянь кись
Елизавета Кабанова (Федорова) чачсь-кассь Орданьбуень райононь Мадышка-2 велесэ. Авазо, Надежда Васильевна, важоди библиотекасо ды почтасо, тетязо, Виктор Иванович, пингень перть механизатор. Вана уш зярыя иеть Мадышкась сови Колазелень (Каласево) велень поселениянтень. Велесэнть улить Культурань кудо ды библиотека, важодить ФАП ды лавка. Зярдо-бути тесэ ульнесь школаяк. Ней жо эйкакштнень усксить шабра велев. Эрицятнедеяк седе ламот – сыре ломанть. Одтнэ тусть ошов. Кода кортыть сынсь эрицятне, велесь аламонь-аламонь чами.
– Оймсема читнестэ свал бажатано молемс тиринь велев, тосо оймесь оймси. Тетям-авам эште кирдить хозяйства, свал снартнетяно лездамс тенст кудоютконь тевтнесэ. Истя жо мартост эри сырькаем. Минек туртов сон ашти вадря невтемакс, сон эзь изняво эрямонь стакачитненень. Бабань эрямозо а шождаль, сон одсто кадовсь мирдевтеме ды ниле эйкакш марто. Евтнеманзо коряс, покш лезкс эйдензэ трямсто тензэ макссь эсензэ сырькаезэ. Ней бабанень 89 иеть. Эште эряза, бажи лездамс минек туртовгак. Лембе ледстнемакс кадовсть сонзэ паневть сюкоротне. Зярдо эште седе бойкаль, самозонок каштомсо свал паниль тантейкат. А сепан, мон чачинь творческой семиясо. Авам, сырькаем ды сазоркам морсицят, мон жо кочкия педагогонь кинть. Улемс тонавтыцякс – те вишка шкань бажамом. Вейксэце классонь прядомадо мейле туинь тонавтнеме Ицялонь педагогической колледжев вишка классонь тонавтыцякс. Седе тов прядыя М.Е. Евсевьев лемсэ МГПУ-нть, тонавтнинь ансяк колмо иеть киртязь программань коряс, – евтни тонавтыцясь.
Университетэнь меельце курссо тонавтнемстэ Елизавета кармась роботамо профессиянь коряс. Важодемань кинзэ ушодызе Саранскоень 23 № гимназиясо. Васняяк ветясь продленкань группанть, седе тов кармась тонавтомо эрзянь кель. 2014 иестэ тейтерьавась тусь декретэв. Теде мейле важодсь М.Е. Евсевьев лемсэ МГПУ-со специальной профессиональной образованиянь факультетсэ рузонь келень методикань тонавтыцякс. 2020 иестэ Елизавета Викторовна ютась важодеме Луховкань лицеев. Неень шкане сон начальной школань учебно-воспитательной роботань коряс прявтонь полавтыця ды вишка классо эрзянь келень тонавтыця.
– Минек лицейсэ ветявить эрзянь ды мокшонь кельтне. Классонть эйкакштне явовить кавто подгруппава, те явомась моли тетятнень-аватнень мелест коряс. Эрзянь келень ды литературань эрьва уроконть мон ушодса весенень содавикс валтнэстэ: «Шумбрачи, эйкакшт!». Эрзянь эрьва валонтень путан весе седейлембем, оймеежом. Монь уроктнесэ гайги мазый тиринь келесь, сонзэ вельде эйкакштнень туртов максовить эрявикс содамочить, невтевить ежомарямот. Эрьва урокс анокстамсто прясон кирдян арсема: чиде-чис кастомс тонавтницятнень ловномань ды сермадомань ерокчист, кепедемс мелест вечкемс ды ванстомс тетянь-авань келенть. Тонавтан вечкеме эрзянь келенть. Эйкакштнень содамочист сюпалгавтомга эрьва уроконтень арсян кроссвордт, ребуст, содамоевкст, филфордт ды куш кодат мельстуиця заданият. Эряви меремс, минек тонавтницятне – эрзянь келень ды литературань коряс пелькстамонь свалшкань изницят. Вана аволь умок эйкакштне невтизь эсь ерокчист «Мелодия родного языка» шкинемань пелькстамосонть, – евтни Елизавета Викторовна.
Тиринь келень тонавтыцясь ледстни, зярдо сон сась важодеме те таркантень, покш лезкс ды эрявикс превс путомат сонензэ макссть эрзянь келень тонавтыцясь Елена Александровна Великанова ды мокшонь келень тонавтыцясь Людмила Ивановна Макушкина. Кода тешксты Е.В. Кабанова, неть ломантне – алкуксонь профессионалт. Сынст тонавтомань опытэст пек сюпав, эйкакш марто важодить комсте ламо иеть.
Башка мель эсь кортамосонзо Елизавета Кабанова явсь СВО-нтень. Тонавтыцясь евтнесь лицейсэ тонавтницятнень марто патриотизмань енкссонть важодемадонть.
– Луховкань лицеесь специальной военной операциянь боецтнэнь туртов эрьва ие пурны гуманитарной лезкс марто посылкат, эйкакштне кодыть кекшемань алтымат. Весе эрявиксэнть минек цератнень туртов пачтятано «АНО «По зову сердца» волонтеронь вейсэндявкстнэнь вельде, – евтни Елизавета Викторовна.
Семиясь – кеме неже
Весе содатано, ломаненть эрямосо сехте питнеесь – те семиясь. Эрьванть туртов сон ашти кеме нежекс. Истя корты минек героиняськак. Вечкевикс важодемадонзо башка, аванть эрямосо покш тарка саи сонзэ кудораськезэ. Кода тешксты Елизавета Викторовна, сонзэ мирдезэ, Игорь Владимирович Кабанов, истя жо тонавтыця. Сон важоди теке жо лицейсэнть. Церась – воспитательной роботань коряс прявтонь полавтыця, теде башка, вети история ды обществознания.
– Мирдень марто теевинек содавиксэкс Ицялсо тонавтнемстэ. Сон, кода монгак, вишка порасто саезь бажась улемс тонавтыцякс. Седе тов вейсэ тонавтнинек Саранскойсэ, прядынек университет, важодинек школасо. Мейле вейсэ сынек роботамо Луховкань лицеев. Улить кавто церанок – Алексей ды Александр. Покшось тонавтни ветеце классо, яви мель футболонтень. Уш омбоце ие яки «Пек вадря» киношколав. Тов церам понгсь апак учне. Интернетстэ рединек яволявтома, молинек кастингс. Алексеень ульнесь покш мелезэ варчамс прянзо актерокс, секскак апак визде ды апак пеле лиссь сцена лангс, ловнось жюринть туртов рузонь кельсэ зярыя стихть, налксесь апокш сценкат. Сонзэ сеске редизь, ды уш колмо ковонь ютазь максызь тензэ «Лучший участник киношколы» лементь.
Александр зярс яки эйдень кужов, пек вечки налксеме легосо, пурны куш кодамо техника, уш нейке тонавтни килангонь правилатнень. Теде башка, сон минек вадря артыця, – евтни авась.
Кабановтнень семиясь – те вадря невтема, кодамо кудораськекс эряви улемс. Сынь свал вейсэ, эрить ояксчисэ ды кеме вечкемасо. Те семиянть лангс ванозь, чарькодеви «уцяска» валонть смустезэ.
Алена Артемьева
Фототне саезь Елизавета Кабановань архивстэ.