Сынст семиясо весе морсицят. Пазось казинзе виев ды мазый вайгельсэ. Кортамось моли Подмарёвтнень семиядонть. Николай Михайлович Подмарёв чачсь Отяжелень Тазалесэ, низэ, Нина Михайловна – Сабанцелень. Весе сынь чачсть ламо эйкакшонь триця семиясо. Морсесть ды седясть сазоросткак-ялаксосткак. Подмарёвтнень тейтерест Елена Зайцева ламо иень перть важоди «Умарина» моронь ды киштемань государственной ансамблясо. Сон ёвтнесь тенек музыкальной семиядост ды седе, кода роботась теевсь эрямонь вечкевикс тевекс.
– Эйкакш пингень весе ледстнеман сюлмавозь покш семиянок марто. Сеедьстэ сакшныльть тенек малавиксэнек ды вейсэ морсилинек. Тетям маштсь седямо баянсо, гармошкасо, сонзэ ялаксонзо весе баянистт. Авань сазоронзояк пек мазыйть вайгелест! Кенярксчистэ гармошкась чинь перть гайгсь кудосонок. Минь, эйкакштне, кунсолынек покштнень, тонавтнинек пельдест, салавине морынек-ускинек мельгаст, – ледстни Елена Николаевна.
Елена чачсь Киржемансо, мейле кармасть эрямо Отяжеле посёлкасо. Сондензэ башка, семиясост эштё колмо ялаксонзо. Эйкакш пингест ютась пиресэ ды паксясо роботазь, весе маштсть скалонь потявтомо. Эрьвась варчизе якстерькаень колмо гектартнэнь мотыжамонть. Савкшнось стямс валске марто ниле чассто. Ды ушовгак эрявсь кенеремс молемс ялга юткс, од шкане оймесь терди.
Школасо тонавтнемстэяк Елена свал морсесь весе кенярксчитнесэ. Яксесь музыкальной школавгак, ансяк эзизе прядо. Музыкадонть башка, покш мель явсь спортонтень. Спортивной ориентированиянь коряс весероссиянь пелькстамосо сайнесь омбоце тарка.
Прядовсь школась, од тейтересь мольсь тонавтнеме М. Е. Евсевьев лемсэ МГПИ-нь (ней – МГПУ) дошкольной факультетэв. Тесэяк сон эзь менстя вейкеяк кенярксчи, эйсэнзэ свал тердтнесть морсеме. Бажась важодемс школасо, ансяк лиссь овсе лиякс. Васня арасельть роботамо таркат. Весть сёксня мольсь морамо Отяжеле посёлканть пельде «Шумбрат, Мордовия!» республикань раськень творчествань фестивалев. Тосо жюрисэ ульнесь «Умарина» ансамблянь прявтось В. И. Четыркин. Сон сеске редизе мазый вайгель марто эрзянь тейтеренть. Кортнесь мартонзо ды тердизе морамо «Умаринав».
– Те шкас ашти мельсэнь важодемань васенце чим. Те ульнесь 1999 иень мартонь 22-це чись. Пек талнынь. Понгинь пек содавикс ды покш коллективс. Хорсо морамсто аравтымизь Любовь Петровна Числяк ваксс. Те пек интеллигентной, паро ава, сон нейгак эри, шумбрачи тензэ! Сон весень марто кортнесь чевтестэ, монь мартояк ветясь прянзо, теке тиринь тейтерензэ марто. Ламо лездась, тонавтсь эйсэнь эрьва мезень коряс. Аламонь-аламонь талномам ютась ды прям маринь теке вейке покш семиясо. Коллективенть ветясь В. И. Четыркин, эсь тевензэ содась парсте, маштсь важодеме эрьва артистэнть марто башка. Ледстявлинь МР-нь заслуженной артисттнэнь Василий Алексеевич ды Мария Фёдоровна Грачёвтнень, баянистэнть Николай Трофимович Одушкинэнь, Мирон Миронович Сычень. Сестэ ютксонок ламо морсесть лия ошсто сазь артистт, – ледстни Елена Зайцева.
«Умарина» киштемань ды морамонь государственной ансамблясь сеедьстэ ардтнесь гастрольга. Сеть шкатнестэ сынь зярыя недляс ды ковс кадылизь семияст, морсесть лия ёнкссо.
– Санкт-Петербургсо натой кавто ковт ульнинек гастрольсэ. Истя кувать морсинек. Пек мельстуезь ютась шкась, неинек ламо мазычи. Ульнинек омбо масторсояк: Франциясо, Испаниясо. Тёжа иень вейсэндявомань кенярксчиденть икеле ардтнинек Россиянь ламо регионга: Калининградсто саезь Дальней Востокс. Ульнинек Кавказонь Грозный, Каспийск, Майкоп оштнесэ. Военной самолётсо ливтнинек морамо Сирияв. Сехте талновтыця командировкась – Кремлясо морамось. 2006 иестэ тердтнимизь морамо Кремляв Велень хозяйствань чинтень. Мон уш учинь эйде. Пек бажинь молемс. Врачось нолдымим ды монь саимизь. Те шкас кадовсть лембе ледстнемат. Мейле аволь весть морсинек Кремлясо, ансяк васенце тов ардомась нейгак мельсэнь. Сюкпря ёвтавлинь аванень ды мирдень туртов, сынь ваныльть вишка цёрынем, – корты артисткась.
Ветеце ие «Умарина» ансамблянть вети Наталья Ивановна Касаткина. Сон – эсь тевензэ содыця профессионал, ответственной ломань. Свал одкстомты репертуаронть, артисттнэ тонавтнить од морот ды киштемат. Бажи муемс кель-вал эрьва артистэнть марто, кунсолы мелест, бути эряви – лезды.
Артисттнэ репетицият ютавтнить малав эрьва чистэ, васняяк явить мель хореографиянтень, седе тов важодить морамонть коряс. Мейле вейсэнь репетиция ды концертэв анокстамо.
– «Умаринасо» ансяк творческой составсонть малав 40 ломанть. Неть – хорсо морсицят, балетсэ киштицят, оркестрасо седицят. Теде башка, улить лия важодицяткак. Кецявтыть юткозонок сыця од ломантне. Весе сынь прядсть вузт, превейть, талантливойть. Кода мукшнотано кель-вал эсь юткованок? Эряви свал арсемс паро лиятненень, эрямс ояксчисэ. Сценадо башка, минь чинек-венек ковгак ардтано ве автобуссо, эрятано ве гостиницасо. Кода тесэ а теевемс малавиксэкс?
Ансамблянь репертуарсонть рузонь, эрзянь, мокшонь морот. Зярыя произведеният алтазь СВО-нь участниктненень. Сынь свал важодить эрьва покш кенярксчитнесэ. Явить мель эрьва кодамо проекттнэс. Якасть морамо Московов «Россия» выставкав.
– Ваныцятне эрьва косо вадрят. Туи мелезэст – свал цяпить. Натой зярдо моратано эрзякс эли мокшокс, куш а чарькодить мезде, ялатеке весе седейсэ цяпить. Музыкась, вайгельтне токшить седеест. Минек прявт тевенек – весе ойместэ каземс тенст кенярксонь ёжо. Кодамо виев балетэнек! «Умаринась» – алкукс республиканть визитной карточказо. Сонзэ аволь визькс невтемс куш косо. Мелят стасть тенек пек мазыйть од костюмт. Аштян мельспаросо, зняро иеть тосо важодян. Башка валт ёвтавлинь од ломантнеде. Саемга, Ирина Учаевадо. Сон уш МР-нь заслуженной артистка. Мазый, превей, сэтьме, аволь покшкавтниця. Морси хорсо ды ськамонзо. Самай сон ушоды морамо минек прявт моронть – «Умаринанть», эрьва косо те васенце моро, конастонть ушодтано концертэнек.
– Елена Николаевна, сеедьстэ савкшны кувать ковгак ардомс. Апак оймсе эряви лисемс сцена лангс морамо. Косто саемс вийть?
– Мон меревлинь истя: артисттнэ явовить лия ломантнеде. Лисят сцена лангс – несыть ваныцятнень, сынст учиця сельмест, кемемаст, мизолксост, ды стувтовить мелявксот, сиземат. Косо-бути потсо сыргози вечкема весе ломантненень. Васенце номерсэнек листяно – сюконятано, стятано кедте-кедьс кундазь, ве кирькссэ, вейке-вейкенек лангс ванозь, мизолдтано. Ков-бути ёми сиземаськак! Мелеть кепети. Зярдо лисян сцена лангс, ёжом паролгады. Арсян, минек тосо весень истя. Ней ули вадря автобусонок. А зярдо сынь тов роботамо, ульнесь ПАЗик. Аволь весенень сатыльть таркат ды, тень лангс апак вано, кияк эзь музгорде. Минь эрьва чи косояк морсетяно. Пек вечкан якамо школав. Натой школань шалтось кецявты эйсэнь. Эйкакштнень сельмест палыть, моли эйстэст вадря энергетика. Школав кочкатано башка репертуар. Эряви тенек невтемс сюпавдояк сюпав культуранок. Бути концертэнь ваномадо мейле киньгак чачи мелезэ улемс артистэкс – лисни, аволь стяко важодтяно, аволь стяко сынек тей.
Ламо иень перть парсте важодеманть кисэ Елена Зайцева те иень тунда казевсь МР-нь заслуженной артисткань лемсэ. «Умаринасо» морси 25 иеть. Кой-кона моротнень ушоды морамо сон. Важодемась канды тензэ кеняркс. Ды сонгак кази лембензэ ваныцятненень.
Елена Николаевна ёвты сюкпря семиянзо туртов. Мирдезэ, Денис Алексеевич, свал васты ды ильти гастролев, зярдояк эзь моле каршо, чарькоди, кода низэ вечксы эсь тевензэ. Юрий цёраст туртов 17 иеть. Сон а морси. Морсеме кармась ялаксонзо тейтерезэ София (племянницазо), кона ней тонавтни Н.П. Огарёв лемсэ МГУ-нь Раськень культурань институтсо. Зайцевтне юткошкаст ды оймсема чист ютавтыть Отяжеле посёлкасо, тосо эйсэст учи аваст ды бабаст Нина Михайловна. Сон трясь-кастсь алкуксонь ломанть.
Елена Николаевна марто содавиксэкс теевемстэ сеске редия, кодамо мазый минек эрзянь тейтерь-авась, кодамо валдо ёжо моли эйстэнзэ. Сон мизолдыця, паронь арсиця. Истят аватнень кувалма аштетяно каштанчисэ!
Татьяна Маторкина