Ангелина Волкова марто минь вастовинек Саранскоень куншка курова ютамсто. Тейтересь се шкастонть топавтсь вечкевикс тевензэ – артсь. Сонзэ артовкстнэнь мазычись кепедьсы эрьванть ежонзо. Ероков тейтересь эри ды важоди Саранскойсэ. Тетязо роботы инженерэкс, авазо – экономистэкс. Артомань ерокчист арась. А вана Ангелинань покштязо – Игорь Михайлович Верещагин, пингензэ перть артсь. Самай сонзэ пельде тейтерентень ютаськак те маштомачись. Игорь Михайлович седе сеедьстэ важодсь живописьсэ. Ангелинань туртов сонзэ пельде кадовсть кавто колонковой кисточкат. Неень шкас тейтересь вансты эйсэст, кода эсь кудораськень реликвия.
– Зяро масторонть лангсо эрян, зярс ледстнян прям кисточка марто. Мон свал артан: важодема таркасо, кудосо, машинасо ардомсто. Те тевденть лекстян ансяк удомсто. Ды сестэяк свал неян мазый онт, конатнень мейле сеске бажан кандомс конев лангс, – евтни Ангелина.
Тейтеренть васенце покш изнявксозо ульнесь Саранскоень 2-це № Художественной школасо тонавтнемстэ. Сонензэ ульнесь ансяк 11 ие, зярдо парсей ланга артовксозо изнясь васня весероссиянь эйкакшонь артомань пелькстамосо, седе тов жо ульнесь кучозь мик лия масторов – Францияв. Шкань ютазь тейтеренть туртов тосто кучсть шнамонь конев ды апокшке казне. Ангелина течинь чис вансты эйсэст.
Школань прядомадо мейле тейтересь кочкизе Н. П. Огарев лемсэ МГУ-нь Архитектурань ды строительствань институтонть. Тонавтнесь кото иеть, специальностень коряс жо ве чияк эзь робота. Эрямосонзо артомась саизе васенце тарканть. Неень шкане Ангелина сермадызе прянзо самозанятоекс. Кирди сюлмот ламо социальной кампаниятнень марто, конатне тевс нолдыть вадря, мельстуиця проектт. Теде башка, пек ламо важоди эсензэ арсематнень топавтомга. Сон а весть лиснесь изницякс республикань ды весероссиянь пелькстамотнесэ.
Ангелинань артовксонзо мазылгавтыть Саранск ошонь куротнень. Истя, Юго-Западонь Юрий Гагарин лемсэ куросонть ули кирьпецень ламо этажсо кудо, конанть фасадсо артозь Россиянь содавикс космонавтонть муралось. Те важодевксэнть лангсо тейтересь роботась а ськамонзо. Проектэнть Ангелина топавтсь вейсэ Денис Гришенков ды Максим Ащепков артыцятнень марто. Шкань ютазь, 2023 иестэ, Ангелина Денис марто артызь Советской Союзонь Героенть Павел Цаплинэнь муралонзо. Улить тейтеренть эсензэ проектэнзэяк. Саемга, Степан Эрьзя лемсэ бульварсо аштиця кудотнестэ вейкенть истя жо мазылгавты Ангелинань артовксозо. Ероков тейтересь артызе ине скульпторонть портретэнзэ. Мейле теезель эште вейке покш важодема – «Ютак содамочитнень мельга» муралось, конась артозель Саранскоень 4-це № лицеенть фасадонть лангсо.
– Евтаса, неть артовкстнэнь лангсо роботамс а шожда. Эдь эряви содамс геройтнень историяст. Васняяк эряви ламо ловномс неть ине ломантнень ланга. Ды ансяк мейле кундамс тевс. Истямо роботась саи ламо вийть ды шка. Ансяк, зярдо тевесь педе-пес топавтови, ежось тееви а евтавикс кодамо вадря. Мерят, топавтыть кодамо-бути покш, паро ды эрявикс тев, – корты тейтересь.
Истя жо Ангелина роботы арт-форматтнэнь мартояк. Тейтеренть улить зярыя важодевксэнзэ, конатне мазылгавтыть Саранскоень ульцятнень.
Евтасынек, Ангелинань важодеманзо мазылгавтыть ошонть, евтнить раськень историядонть, кемекстыть эрицятнень патриотизмаст. Маласо шкастонть сон бажи теемс эште зярыя муралт. Кемтяно, Ангелинань бажамонзо топавтовить.
Тейтересь эзь нузялдо ды аламодо евтнесь эсь артомань салавачидензэ. Васняяк, штобу артомась ютаволь седейстэ, эряви стувтомс весе аэрявикс арсематнень ды эрямосо стакачитнень. Превень ванськавтомасонть Ангелинань ули эсензэ методиказо. Сон саи кисточкат, конев, озы столь экшс, пилезэнзэ путы наушникть ды ушоды кунсоломо аудиокнигат. Истямо лувонть тейтересь лови медитациякс. Сонзэ вельде ежозо шождалгавтови апаро мельтнеде-арсематнеде. Истя тейтеренть чачить киньгак енов а молиця од проектт ды артовкст.
Кода тешкстынек вере, Ангелинань марто минь вастовинек ошкуншкасо, зярдо тейтересь важодсь артовкс лангсо. Ероков артыцясь прими участия маень 9-це чинтень ошонть мазылгавтомасо – арты Ине Отечественной войнань теманть лангс картинат. Те тевенть тейтересь топавты покш каштанчисэ, эдь сонзэ важодеманзо тагояк сюлмавить минек масторонть историянзо марто. Ды аволь ансяк тень кувалма. Ангелина евтнесь, сонзэ кавто покштянзо – Борис Сидорович Борисов ды Иван Самуилович Карпов – Ине Отечественной войнань участникть ды ветерант. Секскак важодемс истямо проектсэ тейтеренть туртов пек вечкеви.
– Борис Сидоровичень, тетянь ендо покштянть, содылия. Монень ульнесть ниле иеть, зярдо сон тусь эрямосто. Церась сон ульнесь кеме, сэрей, алкуксонь мараля. Эрямонзо перть важодсь ветеринарной врачокс. Ине Отечественной войнань шкатнеде кортамо овсе а вечкиль. Мик кежиявтыль ды туиль кудостонтькак, зярдо кияк эйкакштнеде кармиль кевкстнеме эйсэнзэ неть читнеде. Сонзэ туртов неть ледстнематне свал ульнесть седей ланга пшти пеелекс. Тетянь валонзо коряс, покштям ансяк весть евтнекшнесь эйкакшонзо туртов, кодат стака шкат савсь печтямс Курской дуганть кисэ тюремстэ. Войнадо мейле сон зярыя важодсь НКВД-сэ. Мейле велявтсь тиринь Мордовияв, косо ушодсь важодеме ветеринариясо. Эсь тевензэ пек вечкилизе, путсь тензэ весе седейлембензэ. Монь превс кадовсть истят ледстнемат, кода покштям чевтестэ кортыль ракшатнень марто. Маштыль оймавтомо натой азарсь кискатненьгак. Неть, кода ансяк неилизь, покштям моли малазост, сеске рожодомильть ды максылизь пряст лецямс. Арсян, покштянь ульнесь Пазонь пельде ерокчизэ, – евтни Ангелина.
Омбоце покштядонть, конась моли аванзо ендо, – Иван Самуиловичте, тейтересь соды аламо. Тешксты, тонась ульнесь красноармеецэкс, служась стрелковой полксо, 1943 иестэ сон емась кулявтомо. Ды те шкас кодамояк информация ланганзо эзь муеве. Малавиксэнзэ ледстнить, эрямосо церась ульнесь эрязакс, важодемань вечкицякс.
Ангелина, кода алкуксонь патриот, вансты покштянзо ланга неть аволь сюпав евтнематнень. Лови эйсэст питней казнекс. Секскак, зярдо сонензэ макссть кармавтома артомс Ине Отечественной войнанть марто сюлмавозь артовкстнэнь, тейтересь пельминутаяк эзь кавтолдо. Сонензэ те темась маряви пек домкакс.
Ловныцятнень туртов яволявттано, бути кинь ули мелезэ седе ламо содамс Ангелинань важодевкстнэнь ланга, совадо «ВКонтакте» социальной сетьсэ тейтеренть лопазонзо. Тов ероков артыцясь путни эсь роботанзо, конатнень ютксо тынь мутадо кода портретт, истя интерьерной важодемань эскизт ды ламо лия мезе. Паряк, лиси истяяк, тынь пратадо Ангелина марто ве мельс ды шкань ютазь несынк эсь портретэнк артыцянть важодевксэнзэ ютксто.
Алена Артемьева
Фототне саезь Волковань архивстэ.