Неень шкане аламот од ломантне эрямонть туртов кочкить веленть. Седе пек сенть, кона ашти покш оштнеде ды райононь куншкакуротнеде ве ёно, васоло. Орданьбуе ёнксонь Кеченьбие велесь истятнэстэ.
Эрицятнеде тесэ аламолгадыть иестэ иес, эдь седе ламотне эйстэст – пенсиясо ломанть. Од семиятне жо вейке кедень сурсо лововить. Истятнэнь ютксо Анюшинтнэнь ламо эйкакшонь триця семиясь.
Мирдесь-нись Евгений Николаевич ды Юлия Васильевна чачсть-кассть Кеченьбиесэ, тонавтнесть тескень школасо, вечкевсть вейке-вейкенень ды тонавтнемаст прядомадо мейле урьвакстсть. Вейке омбоце мельга чачсть колмо эйкакшост: кавто церынькат ды тейтерька.
Сестэ, зярдо велень од ломантне сралесть масторонь келес аштиця оштнева, Анюшинтнэ теде эзть арсеяк. Туемс велестэ зярдояк мелест арасель.
– Минь чачинек-касынек тесэ ды косояк лиясо эрямонть а нетяно, – корты Юлия Анюшина. – Нама, велесэ эрямось а шождатнестэ. Важодема таркат арасть, велесэнек школась уш зярыя иеть а роботы, паро, эйкакштнень автобуссо усксить шабра велев. Ансяк мезеяк лангс апак вано, велесэ эрямось миненек пек вечкеви.
Нама, истя ульнесь аволь свал. Ульнесь школа, эйкакшт, важодема таркат. Ансяк неть шкатне кадовсть ков-бути удалов, сынст ней ансяк ледстнить. Евгений Анюшин прядызе Н.П.Огарёв лемсэ МГУ-нь филологиянь факультетэнь эрзянь келень ды литературань отделениянть. Вузонть прядомадо мейле Кеченьбиесэ ансяк панжсть школа ды од специалистэсь ёроковсто кундась тонавтыцянь тевентень. Роботась покш мельсэ, тевесь тензэ вечкевсь. Ансяк улемс тонавтыцякс савсь а кувать. Зярыя иень ютазь школанть пекстызь. Эрявсь вешнемс робота, пурнась семия ды сонзэ эряви трямс. Тесэ чами тарка велень администрациясо, Евгений Николаевичень аравтсызь председателекс. Зярыя иеть роботась Кеченьбие веленть ды сонзэ эрицятнень лезэс Юлия Васильевна жо ветясь кудонь тевтнень ды ванось эйкакштнень мельга.
Семиясь кассь, Анюшинтнэнь чачсь колмоце эйкакшост ды мирдесь-нись арсизь, важодема тарканть эряви полавтом. Эрьвантень чарькодеви, велень администрациянь председателенть тевтнеде ламо, зарплатась жо овсе мезеяк арась. Секскак Евгений Николаевич, кода велень ламот цератне, роботамо кармась ардтнеме Московов. Эйкакштне эдь касыть, касыть сынст вешематнеяк.
Истямо лувсо семиянть эрямозо поладови иеть. Покш цераст Николай пряды кеменце классонть, тейтерькаст Карина тонавтни котоце классо, меельцесь, Александр – яки омбоце классос. Эйкакштне ёроковт, превейть. Карина ды Саша башка мель явить шашкасо налксемантень, ульнесть изницякс райононь первенстватнесэяк.
Анюшинтнэнь семиясь, кода минек республикань ламот лия семиятне, получакшнось федеральной ды республиканской авань капитал. Неть ярмактнень сынь ютавтызь кудонь тееманть-витнеманть лангс. Анюшинтнэ тешкстыть, неень шкане эйкакш марто семиятненень куш аламошка лезкс яла максови. Россиянь Президентэнть меельце Указтнэ жо седеяк вадрят.
– Россиянь Президентэнь од Указтнэнь тевс нолдамось аламодо лезды минек семиянтеньгак. Таштамковстонть саезь Саша церыньканок школасо ярсамо карми стякодо, пандомо тень кисэ а карматано, – тешксты Юлия Анюшина.
Зярдо меельцесь, Саша церынькаст, аламодо кассь, Юлия Васильевна истя жо лиссь роботамо. Васень шкастонть ульнесь микшницякс магазинасо, ней роботы велень почтальонокс. Нама, тонавтнекшнесь аволь неть профессиятнес. Прядызе Ицялонь педагогической училищанть. Ансяк велесэ важодема таркат кочксемс а савкшны, пек паро, бути ули кодамо тевс.
Сон явши газетатнень ды журналтнэнь, кандтни пенсиянть. Кеченьбие велесэ почта арась, секскак периодиканть мельга савкшны чийнемс шабра Орозбие велев. Ансяк тейтерь-авась теньсэ стакачить а мари, сон кенярды сенень – ули роботазо.
Анюшинтнэнь семиясь Кеченьбиенть туртов – велень кирди семия. Велесь эри семс, зярс тосо эрить сынь.
Юлия Еремина