Пятница, февраля 07, 2025
Важное

2024 иенть РФ-нь Президентэсь масторонь келес яволявтызе Семиянь иекс. Неень шкасто Россиянь келес ды минек республикасояк ютавтовить эрьва кодат акцият, максови лезкс ламо эйкакшонь трицятненень, а кадовить мельтеме СВО-нь участниктнень семиятне. Нурькинестэ, сонензэ алтавить ламо эрьва кодат мероприятият, вастовомат, выставкат... Те весе паро. Течи ули меленек пачтямс лиядо, кода ванстовсть лелятнень, сазортнэнь ютксо ояксчись, вейке-вейкенень лездамось, улемс свал анококс само лездамо стака шкасто, вейсэ тешкстамс кенярксчитнень.



А мезть сёпомс, неень шкане семиятнесэ вастневить истят апаро тевть, косо лелят-патят аволь ансяк а яксить малавиксэст туртов инжекс, а гайневтнить телефононь вельдеяк. Тенень тувталтнэ ламо эрсить, сехте сеедьстэ – тетянь авань ули-паронть явомась ды мик судс те кевкстеманть коряс пшкалемась… Истямо тевдеяк аволь весть савкшнось марямс. Ансяк аволь весе семиятнесэ истя эрси, седеень оймавтомга свал мелезэнь ледни Покш Березникень райононь Шугурова велень ламо эйкакшонь триця Панькинтнэнь семиясь. Тиринь газетань лопатнесэ аволь пек умок минь ёвтнинек сынст покш тейтердест, «Лайшема» ООО-нь прявттонть Анастасия Николаевна Панькинадо, кие перьканзо пурнынзе весе малавикс ломанензэ. Течи ули меленек пачтямс сонзэ сазордонзо, те организациянь главной бухгалтердэнть Анна Бояркинадо.

Эйкакш пингень ледстнематне те шкас эзть стувтово

Васень варштавкс лангс, Анна Николаевнань эйкакш пингезэ аламо мейсэ явовсь ялгатнень эйстэ. Кассь сон ламо эйкакшонь триця семиясо. Ледстясынек, тетязо-авазо – Николай Николаевич ды Любовь Александровна, трясть-кастсть вете эйкакшт. Анна юткстост веженцесь.

Эйкакш пингень валдо ледстнемакс те шкас кадовсть Шугуровань средней школасо тонавтнемань иетне. Анна Панькина бажась аволь ансяк парсте тонавтнемс, ламо эрьва кодат мероприятиятнесэ ёрокчинзэ невтемс. Сон вечкелинзе спортонь коряс пелькстамотнень, сехте пек волейболсо налксематнень. Сеть шкатнестэ школасо тонавтницятнень марто ютавтовсть эрьва кодат военно-патриотической конкурст. Советской иетнестэ весень мельс тукшнось «Зарница» налксемась, ков мельспаросо якась ялганзо марто Аннаяк. Эште мелезэнзэ пек тукшнось туризмань кружокось, конань ветясь географиянь тонавтыцясь Виктор Николаевич Тизяев. Кодамо мазый таркас ансяк эзинзе ветне Шугуровань школань тонавтыцясь, эсь предметэнзэ алкукс вечкицясь ды парсте содыцясь!

– Ламо иетнень ютазьгак, мон седейшкава ды мельспаросо ледстнян минек классонь ветиенть Ольга Егоровна Семёновань. Минь ульнинек васенце классокс, конань сон саизе вузонь прядомадо мейле школасо важодеме ушодомсто, – ледстни Анна Николаевна. – Сон тенек ульнесь теке омбоце ава, свал эйсэнек чарькодсь, бути эрявсь, лездась кода валсо, истя тевсэяк. Те шкас эзь стувтово тенек сэрей, ёлганя рунго, мазый тейтерь-авась, конась маштсь мазыйстэ оршнемеяк, содамочинь максомояк.

Вузсо тонавтнемань иетне ютасть куроксто

Куроксто ютась эйкакш шкась, эрявсь кочкамс эрямонь тев. Школанзо парсте прядыцясь максынзе документэнзэ Н. П. Огарёв лемсэ МГУ-нь биологиянь факультетс. Экзаментнэнь кирдинзе парсте ды кармась тонавтнеме ды эрямо Саранскойсэ. Малав весе оймсема читнестэ ардтнесь тиринь велев тетянзо-аванзо туртов лездамо.

Вузонть прядомадо мейле сон арсесь улемс тонавтыцякс, содамочинь максыцякс. Ансяк се шкане састь вейксэньгеменце иетне, зярдо школасо лоткасть зарплатань пандомо. Самай сестэ, масторлангсонок тевтнень одс ладямонь шкастонть, сонензэ покш лезкс макссь патязо – Анастасия Панькина. Анастасия Николаевна мирдензэ марто панжсть кооператив карсемапелень стамонь коряс. Сазоронзо Анянь саизь мартост важодеме. Ней одтнэнь ютксто аламот, кить содыть, кодат шкат савсь печтямс тетяст-аваст туртов, зярдо аволь ансяк оршамот-карсемат, ярсамопельгак лавкатнесэ сатышка арасель. Ансяк весемесь цидярдовсь…
Шкань ютазь, «Лайшема» предприятиянть панжомадо мейле (васня те организациясь ульнесь муниципальной) Анна Николаевнань ютась тов важодеме. Мейле сон теевсь ООО-кс ды тевтне перьканзо ков седе ламолгадсть. Тешкстасынек, Анастасия Николаевна аволь ансяк сазоронзо саизе, Витя, Иван, Пётр ялаксосткак мартост зярыя шкань перть важодсть. Панькинтнэнь семиянь лия эйкакштнеяк вановтомо эзть кадово, малав весе тосо роботасть.

Бажи эрьванень ёвтамс
седеень оймавтыця валт

Эрьвась юткстонок содасынзе эсензэ важодемань таркань салавачитнень. Прявт бухгалтерэнь тевтнеде башка, Анна Бояркинанень эште свал эряви улемс паро психологокс.
Анна Николаевнань истямо важодемань тарказо, ков ломантне седе сеедьстэ сакшныть сельведь марто малавиксэст куломань коряс, лиясто эрси тенст мик пек апаро… Эрьвантень муема оймавтыця валт, лиясто лия лезкс максома. Сынст кабинетсэнть свал улить эрявикс надобият, давлениянь онкстамонь аппарат ды истя седе тов. Паро, «Лайшема» ООО-нь прявтонть Анастасия Николаевнань ули медицинской образованиязо, сынь вейсэ сазоронзо марто содыть, кода лездамс ломанентень стака шкасто.

Уцяскав семиясо

Анна Николаевна эсь шкасто лиссь мирденень эсест велень од цёра экшс. Вечкевиксэзэ Анатолий Бояркин истя жо ламо эйкакшонь триця семиясто. Тетязо-авазо, Григорий Николаевич ды Раиса Николаевна, трясть-кастсть сисем эйкакшт. Нама, аволь шожда ульнесь мирденть ды нинть туртов эйкакшост кастомсто, эрямонь виде ки лангс сынст ливтемстэ. Стакачитнень лангс апак вано, юткстост эрьвась кассь трудонь вечкицякс, эсест семиядост мелявтыцякс. Анатолий школанть парсте прядомадо мейле тонавтнесь Сабур-Мачкасонь училищасо, шкань ютазь арсесь поладомс тонавтнеманзо вузсо. Теде мейле саизь армияв масторонть икеле долгонзо топавтомо. Тосто самодо мейле сеске кундась важодеме… Истя тонавтнемась кадовсь удалов. Анна Николаевнань валонзо коряс, кодамо тевс аволь кунда мирдезэ, весе тензэ топавтовить. Нурькинестэ, куш мезень тееме машты! Бути эряви, кудояк путы, баняяк чапи.

Теске, Саранскойсэ, Анатолий ды Анна Бояркинтнэ путсть эстест вадря кудо. Кода мерсь Анна Николаевна: «Эсенек ниле кедтнесэ весементь теинек, кеменьшка иеть строинек, малаванзо эмеж пире теинек. Кода мерить, колмонест эрямонь кармавтоматнень топавтынек: кудо путынек, сад озавтынек, цёра кастынек. Сонензэ максынек покштянзо лементь. Гришань коряс, зярс эште вестькак визделгалемс эзь савкшно. Васня школасо, мейле вузсо тонавтнесь парсте. Н. П. Огарёв лемсэ МГУ-нь географической факультетэнть прядомадо мейле кочкась эстензэ вечкевикс тев, ютко шкасто жо лезды тетянстэнь. Анатолий Григорьевич бажи эрьва тевс тонавтомс цёранзо, штобу лисевель эйстэнзэ кедьчелькев, эрьва тевень топавтомо маштыця ломань».
Текенень эште поладсынек Анна Николаевна ды Анатолий Григорьевич пек вечкить тиринь кельсэ кортамо, парсте содасы эрзянь келенть цёраст Григорийгак. Ютко шкасто Анна Бояркина сёрмады стихотвореният эрзянь кельсэ. Течи минь макстано сонзэ валморонзо.

Сёксь

Сёксь, сёксь – таго сыть,
Экше вармасот пувить.
Менелесь сельведть правты,
Ойме ёжо калавты.
Эрьва ие монень сат,
Кинть эйсэ тон а стувтат.
Куроксто сёксь прядовт,
Учан чадыведень човт.
Мейле маней кизэсь сы,
Чипаесь лембенть макссы.
Пек вечкса мон кизэнь чинть,
Сёксь, стувтык монень кинть!


Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».