Эйкакштнень-од ломантнень ютксо закононь коламотне – неень шкань обществасонть сехте мелявтовтыцят. Зыянчись ашти сеньсэ, самай те шкастонть од ломаненть кемекставить сонзэ мировоззрениянь прявт енкстнэ. Кемгавксово иеде седе вишкине преступниктне стакасто ютыть тонавтомантень ды сеедьстэ зыянов енксонть кочкить покшсто касозьгак.
2024 иень невтематнень коряс регионсонть 30,4 % (92–120) кассть закононь коламотне, конатнень теизь кемгавксово иеде седе вишкинетне.
Мейсэ тувталось ды кодамо важодема ветяви те енкссонть, минек газетань ловныцятненень пачти Мордовия Республикава Россиянь МВД-нь полициянь участковой уполномоченнойтнень ды кемгавксово иеде седе вишкинетнень тевест ладямонь коряс отделэнь прявтонь полавтыцясь полициянь майорось Алексей Владимирович Саврушкин.
– Алексей Владимирович, мезе марто сюлмавозь кемгавксово иеде седе вишкинетнень ютксо закононь коламотнень касомась?
– Истят эйкакштнень ламолгадомань прявт тувталось ашти тетятнень-аватнень эйстэ, конатнень асатыкс содамочист ды сынь аволь видестэ трить эсь эйкакштнень, истя жо тешкстама сынст юткошкань арасьчинть, мелень аявоманть, семиясо севноматнень, авторитарной воспитаниянть, зярдо тетятнень-аватнень ендо моли покш контроль ды куш мейсэ амеремат.
Самай те весемесь ветияк зыянонтень. Сеедьстэ тетятне-аватне а содыть, кие марто ды кода эйкакшост ютавтыть эсь шкаст.
Эште вейке тувталось – эйкакштнень арась вечкевикс тевест. Сыненст а косо ютавтома эсь юткошканть. Стака эйкакштне сеедьстэ вастневить аволь парсте эриця семиятнесэ. Тетятнень-аватнень эйстэ кие-бути сими, кие-бути а роботы. Эйкакшонть мельга арась ванома. Истят эйкакштне а эрявить тетятненень-аватненень.
Весемесэнть истя жо эряви тешкстамс СМИ-тнень ды массовой культуранть путовксост. Од ломантнень кумирэкс сеедьстэ эрсить блогертнэ, музыканттнэ эли актертнэ, ведущейтне ды сетне, кие невти аволь видестэ прянь ветямонть.
Закононь коламотнень ламочинть касоманть лангс апак вано, а эряви кортамс регионсонть од ломантнень ютксо криминальной активностенть виевгадомадонть. Вете иетнень перть ванкшноматне невтизь, ютазь иень 12 ковтнестэ ванновсть малав 130 тевть. Оперативной тевтнень стакалгавтызь Сыре Шайговань райононь эрицятнень вийсэ 8 закононь коламотне (ванновить РФ-нь УК-нь 207 ст.).
– Сеедьстэ од ломантне муить важодема, конань алтыть мессенджерсэ асодавикстнэ, эли редясызь сонзэ специализированной сайттнэсэ. Истямо важодемась сеедьстэ сюлмавозь криминалонть марто (телефононь манчицятнень курьерт, наркотиктнень закладс путыцят ды натой террористической енксонь тевть). Зяро истят тевть ульнесть Мордовиясо? Ды мекс эйкакштне явить мель истят тевтненень?
– Манчицятне ульнесть весе шкатнестэ. Аферисттнэ свал арсить эрицятнень манчемань од енкст, мезень коряс сынст кедьс понгить эрьва кодамо иесэ ды куш кодамо таркасо важодиця ломантне. Информационной технологиятнень шкасто манчицятненень понгомс ков седе шожда. Неень шкане Интернетэсь кеместэ совась ломантнень эрямос, теке марто эйкакштненьгак. Од ломантнень туртов сон кармась шкань ютавтомань аявовикс пельксэкс. Секс информационной безопасностень кевкстемась пек пшти. Истя, Интернетэнть вельде, од ломантнень коряс, конатне эрить республикасонть, те иестэнть лиссь 11 манчемань тев.
– Евтнеде примерт закононь истят коламотнеде ды мезе тень кисэ учи од ломантнень?
– Судс максозь уголовной тев кемгавксово иеде седе вишкине «курьертнэнь» коряс, конатне чумондовить манчемань 16 тевтнесэ, конатне лиссть 2022 иень декабрясто ды 2023 иень январьстэ. Республикань сыре ломантнень манчесть «малавиксэнк понгсь ДТП-с» схеманть коряс. Манчемань тевтнень коряс, конасонть чумондовить вере евтазтне, зыянс понгозтне емавтсть 2,5 млн ламо целковойть. Неть ярмактнестэ седе покш пельксэнть чумондовицятне кучнесть эсь «важодема таркань максыцятненень», пельксэнть – кадсть эстест топавтозь тевенть кисэ. Кемгавксово иеде седе вишкинетнень группанть закононь коламотне лоткавтозельть УУР-нь важодицятнень вийсэ.
– Эйкакштне ды иредстиця симемапельтне. Кода аштить тевтне республикасонть од ломантнень копордамонть коряс?
– Полицейскойтне тешкстасть 493 административной правань коламот, конатнень теизь кемгавксово иеде седе вишкинетне. Тесэ 306 тевтне сюлмавозь иредстиця семемапельтнень симнеманть марто, общественной таркав иредьстэ самонть марто, 29 – наркотической средстватнень микшнеманть марто.
Иредстиця симемапельтнень симнемась пек зыянов од ломантнень туртов, ансяк теде содыть аволь весе. Алкоголесь колы шумбрачинть, беряньстэ невтеви социальной ды культурной касомасонть. Эсь шкасто образованиянь апак получа, физически ды духовна апак касо, од ломанесь куроксто пры отьмас.
Малав эрьва ветеце закононь коламонть кемгавксово иеде седе вишкинетне теить иредьстэ улемстэ.
– Ледстясынек, кодамо иесэ мереви рамамс иредстиця симемапельть лавкатнесэ, клубтнесэ ды веселгалемань лия таркатнесэ.
– Профилактикань енкстнэнь приминзе государствась: Россиясо а мереви микшнемс иредстиця симемапельть 18 иеде седе вишкинетненень. Ули уголовной ответственность кемгавксово иеде седе вишкинетнень иредстиця симемапельтнес тонавтоманть кисэ.
Ансяк профилактикань тевтне аволь свал максыть эрявиксэнть. Алкоголесь кадови рамавицякс эсь тевентень мельде-валдо кандовиця предпринимательтнень ды микшницятнень вельде, ды покштненьгак, конатне од ломантнень кармавтомаст коряс рамить тенст симемапельтнень.
– Алексей Владимирович, кодат енкст кочкить полициянь важодицятне кемгавксово иеде седе вишкине закононь колыцятнень коряс?
– Правовой пропаганданть лувсо полициянь важодицятне ютавтсть 3551 профилактической лекция эйкакшонь тонавтнема ды шумбрачинь витема заведениятнесэ (сынст эйстэ 762 – тетятнень-аватнень марто).
Внутренней тевень органтнэс профилактической учетс путозь 448 кемгавксово иеде седе вишкине закононь колыцят, 332 «аволь благополучной тетят-ават» ды 62 од ломанень группат.
– Мезе истямось внутренней тевень органтнэс профилактической учетс путомась?
– Полициясо кемгавксово иеде седе вишкинетнень учетось, конат понгсть прянь а ванстомань зонас. Советской шкатнестэ эште ульнесь истямо чарькодема, кода «учет в детской комнате милиции».
Учетно-профилактической карточкань панжомась од ломаненть сеске теи мелень явома объектэкс кода полициянь ды опекань органтнэнь, истя школанть ендояк. Полициясо учетс кемгавксово иеде седе вишкиненть путомась кода эсензэ од ломаненть, истя тетятнень-аватнень туртов – тевесь аволь вадрятнестэ. Васняяк, те аволь парсте эрямонь тешкс семиянть ды эйкакшонть туртов. Омбоцекс, куш кодамо тевстэ сынь теевить оперативно-розыскной мероприятиятнень участникекс, бути районсонть лиссть истят жо закононь коламот. Колмоцекс, бути од ломаненть коряс улить тевть, конатне кемекстазь РФ-нь УК-нь 91 статьясонть, семиянть эрьва ковсто кармить содавтомо ПДН-нь ды опекань важодицятне.
Се енксось, што ломанесь ульнесь учетсо полициянь эйкакшонь комнатасо, карми ванновомо мейлеяк, зярдо карточканть аннулировасызь. Седе тов «стака» эйкакшонть туртов пекстави кадровой офицерэкс теевемань кись. Сонзэ а сайсызь службас правоохранительной органтнэс, МЧС-в ды пожарной дружинав.
Истя жо те тевесь кирдеви мельсэ вузов тонавтнеме молемстэяк. Бути специальностесь сюлмавозь финансонь эли банконь енкссо важодеманть марто, масторонь обороноспособностенть марто.
– Алексей Владимирович, мезе теема, штобу эйкакшось касоволь эрьва ендо шумбракс?
– Тетятненень-аватненень эряви кортнемс эсь эйкакшонть марто, явома мель сонзэ мельежонтень. Эли жо эйкакшось ламо шка карми ютавтомо Интернетсэ, кирдеме ояксчи виртуальной ялгатнень марто.
Мелявтовты се, преступлениятнень ды закононь коламотнень теезь, истякак эйкакштне ды од ломантне вешить мелень явома.
Иредьстэ од ломантне, седе сеедьстэ тейтертне, шождасто понгить преступниктнень кедьс. Бути эйкакшонк сась кудов иредьстэ, ванкшнынк, эзь лисе мартонзо кодамояк зыян. Ковгак а тееват кортамодонтькак, сонензэ эряви анокстамс. Тетятнень-аватнень прявт тевесь – кемекстамс эйкакшонтень, што сон канды ответственность эсь тевтнень кисэ.
Ламо иень перть службань шкастонть Алексей Владимирович Саврушкиннэнь тевтнеде, конат сюлмавозь эйкакштнень а шожда эрямонть марто, савсь кирдемс аволь аламо. Самай кирдемс, эдь мелявксов семиятнень, стака обуця марто эйкакштнень марто важодемась – те аволь ансяк служба, те эрямо лув. Эдь кода явсак эсеть шкат ды важодеманть, зярдо тевесь эйкакштнень уцяскасо. Сыненст куш кодамо шкасто эряви лезкс, ды сон свал анок тенень.
Юлия Еремина
Фотось МР-ва Россиянь
МВД-нь пресс-службанть.