Сыре ломанень ковонть ушодовомсто минек редакцияв сась сёрма Республикань эйкакшонь ды од ломанень «Надежда» социальной приютсо важодицятнень пельде. Тосо эриця эйкакштне ды сынст тонавтыцятне, воспитательтне ёвтыть поздоровт эсест ветерантнэнень, кить, ловт, пингест алтызь те а шожда тевентень.

Эйкакшонь эрьва учреждениянть, кодамо бу сон аволь уле: покш эли вишкине, эйсэнзэ эрицятне свал полавтовить. Веенстнэ сыть, омбонстнэ туить тосто.

«Надежда» приютсо васенце прявтокс ульнесть Владимир Сергеевич Пискунов ды Фаина Сергеевна Пронькина, кить ульнесть ламо паро ды лезэв тевень ушодыцякс. Неень шкань важодицятне течи сыненст ёвтыть покштояк покш сюкпря се юронть путоманзо кисэ, конась ванстовсь течинь чинть самс.
Седе тов приютонть паролгавтоманзо поладызе Валентина Владимировна Лукина, кие истя жо ламо иень перть ульнесь те учреждениянть прявтсо.

Отделениянь прявттнэ – Валентина Ивановна Курмакова ды Людмила Леонидовна Втюрина – путсть ушодкс реабилитациянь тевентень. Сынь педе-пев ванкшнызь те учреждениянтень эрьва сыцянть кинзэ-янонзо ды весементь тейсть ансяк сонзэ лезэс.
Анна Семёновна Шнякина ульнесь воспитателекс, сон тонавтсь эйкакштнень Пазнэнь кемеме, стака шкасто пельдензэ вийтнень вешеме. Людмила Васильевна Синичкина педагогось-психологось тонавтсь культуранть чарькодеме ды вечкеме. Галия Ислямовна весе иетнестэ ды нейгак кадови сехте паро оякс эйкакштненень.
Иетнень лангс апак вано, Александра Митрофановна Буянкина те шкас важоди те учреждениясонть. Ней уш а лововияк зяро эйкакшт ютасть сонзэ кедьга, зяронень сон макссь превс путомат ды лездась муемс вечкевикс тев.

– Минь аштетяно покш каштанчисэ ды мельспаросо эйкакштненень уцяскав эрямонть каземанзо, сынст мелявксост чарькодемаст кисэ, – пачтить приютсо важодицятне. – Кадык аволь ансяк те ковстонть, конась алтазь тыненк, свал карми улеме кеме шумбрачинк, кадык тынк кенярдовтыть эйкакшонк, нуцьканк ды весе малавиксэнк. Ламо лембе ды маней чить ды свал паро ёжомарямо!


Валентина Юдина