Пятница, марта 29, 2024
Важное

РОМОДАНОВАНЬ МУНИЦИПАЛЬНОЙ РАЙОНСО УЛЬНИНЕК ИНЕ ИЗНЯМОНЬ КЕНЯРКСЧИДЕНТЬ ИКЕЛЕ. ТЕ ЁНКССОНТЬ ЭРИЦЯТНЕ СЕ ШКАНЕ ЭРЯЗАСТО АНОКСТАСТЬ ТЕ ПОКШ ЧИНТЕНЬ: ВАНСЬКАВТСТЬ КУРОТНЕНЬ, МАЗЫЛГАВТСТЬ КУДОИКЕЛЬКСТНЭНЬ...

НУРЬКА ШКАС САВСЬ ТЕНЕК ВАСТОВОМС РОМОДАНОВА ВЕЛЕНЬ ПОСЕЛЕНИЯНЬ ПРЯВТОНТЬ ТАТЬЯНА ВИКТОРОВНА КОЛМАКОВА МАРТО. ВЕСЕМЕВА НЕЯВСЬ, НЕТЬ ЛОМАНТНЕ ЭСЕСТ ТАРКАСОСТ, СОДАСЫЗЬ, КОДА ВЕТЯМС ТЕВТНЕНЬ НЕЕНЬ А ШОЖДА ШКАСТОНТЬ.

Татьяна Колмакова чачсь-кассь Восточно-Казахстанской областень Самарское велесэ. Школанзо парсте прядомадо мейле тонавтнесь строительно-дорожной институтсо. Важодеманзо ушодызе Усть-Каменогорск ошсо «АлтайЭнергоспецремонт» ОБЦ-сэ мастерэкс.
Ютазь пингень вейксэньгеменце иетнестэ сась Мордовияв, эрямо таркакс кочкизе Ромоданова посёлканть. 1997-2002 иетнестэ важодсь «Ромодановжилсервиссэ» инженерной коммуникациятнень коряс инженерэкс. Самай тосо сон невтизе прянзо ломантнень марто важодеме маштыцякс, эрьва тевенть педе-пев парсте топавтыцякс, икелев ваномо ды весе лезэвенть аволь ансяк редямо, истя жо шкастонзо тевс нолдамо. 2005 иестэ неть обуцянь ёнкстнэ лездасть тензэ Ромодановань сестэнь ошонь поселениянь прявтонь тевентень кундамосо. Те таркасонть сон истя жо парсте топавтсь весе кармавтоматнень ды седейшкава бажась паролгавтомс райононь куншкакуронть. Теке шкастонть зярдояк эзь стувтне ве ёно эрицятнень мелявкстост. Нать, а стяко 2011 иестэ сон кармась Ромодановань ошонь поселениянь прявтокс.

Татьяна Викторовнань пшти вановт ало те посёлкань социально-экономической весе сфератне. Сонзэ виев важодемась редяви эрьва тевсэ: эрямос совавтовить государствань национальной проекттнэ, одкстомтови посёлкась, ламо тееви ломантнень оймсемаст паролгавтоманть коряс. Нурькинестэ, тееви весемесь, штобу эрьва эрицясь маряволь прянзо зыянов тевтнеде ванстозекс ды уцяскавокс.
Кевейкее иень перть, самай истямо шка сон важоди Ромодановань велень поселениянь прявтокс (ней сон истя лемдеви). Эрицятнень марто вейсэнь важодемасо виевгавтовить социально-экономической невтевкстнэ.

Эрьва тевсэ тензэ лезды сонзэ полавтыцясь, республикасонок содавикс журналистэсь Василий Николаевич Инчин.
Истя, велень поселениянь ярмактнень вельде одкстомтовсь ды паролгавтовсь Филатов лемсэ культурань ды оймсемань паркось, тосо теезь кизэнь эстрадась ды эйдень куншкакурось. Нейгак тевтне поладовить.

Меельце шкастонть Ромодановасо озавтозь ламо чувтот ды куракшт. Сынь пижелгавтыть посёлкань куротнень ды парконть. Те сонзэ пингстэ одс теевить ды витневить китне, ялго ютамо таркатне ацазь асфальтсо, ютавтовить капитальной витнемань тевть ламо квартирас кудотнесэ, кудотнес ветяви ведь ды истя седе тов.
Нать, а стяко 2019 иестэ республикань «Лучший муниципальный служащий Республики Мордовия» конкурсонь «Муниципальное хозяйство, благоустройство населённых пунктов, системы жизнеобеспечения» номинациянть коряс сонензэ максозь васенце таркась. Теде башка, Татьяна Викторовнанень кавксть макссть МР-нь Прявтонь Сюкпрянь сёрмат, 2018 иестэ мик РФ-нь Президентэнть пельде. Вана те иестэ казезь «За заслуги перед Республикой Мордовия» медальсэ. Неень шкане Ромодановасо колмо средней школат, вейке зданиясь эйстэст ашти посёлканть куншкакуросо. Сон неяви пек васов ды кенярдовты сельмть мазый артовкссонзо. Потмозояк неень шкантень ладиця, косо ули весемесь домка содамочинь саемга ды мелень витемга. Тосо ули профессиональной училища, ламо лия районтнэсэ умок уш пекставсть.

Эрьва чистэ вастыть вишка эйкакштнень эйдень колмо кужотне, ули библиотека, центральной райбольниця, поликлиника, историянь-краеведениянь музей, райононь Культурань кудо.
Ромодановав сыцятнень васты неявикс таркасо аштиця мазый церьковась. Ледстневи, сонзэ панжомстонзо чанстямонзо сакшнось Московонь ды весе Русень Патриархось Кирилл.

Ламо иень перть покш важодема ветявсь Филатов лемсэ парконть одкстомтомга-мазылгавтомга. Те иень тунда поладозель од чувтынетнень озавтомась. Сындест путозь сядодо ламо.
Ютазь иестэ витнезельть автомобильной китне истят куротнева, кода Полежаев, Киров, Филатов лемсэ ды Дорожная ульцяванть. Весемезэ ютавтозь 32636,7 тёжат целковойть.

2021 иестэ ламо теезель куротнень паролгавтомга, оймсема таркатнень одкстомтомга. Невтемакс, сеть ульцятнева, косо чувтотне кассть кудотнеде сэрейстэ ды сынь пек мешасть электрической уськетненень, сынь керязельть. Неть тевтне топавтовсть Ленин, Есенин, Бибина, Маяковский, Миронов, Касаткин, Полежаев лемсэ ульцятнесэ ды лиятнесэяк.

Музыкальной кавто школатнесэ капитальной витнемань тевтнень ютавтомадо мейле мазылгавтозь перькаст таркаськак, ускозь тов мода, ков путсть цецят-мезть.
Кода кортыть, райононь куншкакурось – те сонзэ чачозо. Центральной площадесь – кенярксчинь ютавтома тарка, ков свал пурнавкшныть ламо ломанть аволь ансяк Ромодановань районсто, истя жо покш читнестэ сакшныть инжеть Саранскойстэ ды Мордовиянь томбальде. Тень ловозь, арсезель сценанть икеле паролгавтомс тарканть, Ромодановань велень поселениянть вийсэ сон ацазель брусчаткасо.
Чарькодеви, аволь ансяк куншкакуронть коряс эряви мелявтомс, эдь косо бу ломанесь аволь эря, сонензэ свал эрявить паро условият. Истя, Южной куронь эрицятне пшкадекшнесть тенст общественной лисьманть ванськавтомадо. Те тевесь топавтозель нурька шкас.
Теде башка, Ромодановань кемгавксово куротнева, косо китне эрявсть витнемс, почодозь асфальтонь паморькссэ.

Калмолангось – те истямо тарка, конань ваньксстэ кирдемазо ашти аволь ансяк велень эли ошонь поселениянь администрациятнеде. Виде, улить истят велеть минек республикасо, косо те мелявксонть саить эсест лангс сеть ломантне, кить бажить теемс паро тевть эсест оймест идемга, малавиксэст лемест а стувтомга. Ромодановасо жо истямо таркасонть администрациясь кшнинь пирявкст тейсь Касаткин лемсэ ды Лазурная ульцятнень ёндо.

Ломантнень эрямост ванстомга, килангонь зыянов тевтнень а нолдамга, меельце шкастонть витнезельть колмо сэдть. Сынь аштить Ленин лемсэ, Луговой ды Пионерской куротнесэ.
Кода мерсь Татьяна Викторовна, иень эрьва кодамо шкасто эрьва кодат тевть савкшны топавтомс. Невтемакс, тельня ванськавтыть ульцятнень ловонь шушмотнеде, анокстыть Од иень тешкстамонтень, тунда ванськавтыть покш ведень ютамо таркатнень ды дренажной трубатнень, ванкшныть сеть таркатнень, ков пурнавкшны ламо ведь.
Неть читнестэ анокстасть Ине Изнямонь покш чинтень. Кизэнь перть кармить леднеме зыянов тикшенть ды топавтомо сеть тевтнень, конат эрявить теемс иень те шкастонть.

«Формирование современной городской среды» программанть коряс парсте витнезь Ромоданова посёлкань Анна Лусс лемсэ куронь ламо квартирас кудонь икельксэсь. Сонзэ паролгавтомантень ютавтозельть 1,7 млн целковойть. Вете иень перть, зярс тевс нолдави те программась, витнезельть МКД-нь 13 кудоикелькст.
2021 иестэ Эрямонь-коммунальной хозяйствань министерствасо общественной территориянь коряс идезель проект, конань коряс макссть тенст субсидият 7 млн целковоень покшолмасо.
Виде, аволь аламо тевть учить икелепелевгак. 2022 иестэ кармить тевс нолдамо Филатов лемсэ культурань ды оймсемань парконть мазылгавтоманзо-паролгавтоманзо коряс проектэнть. Тосо теевить оймсемань, спортонь ды эйкакштнень туртов налксемань мазый куншкакурот.

«Комплексное развитие сельских территорий» государственной программанть тевс нолдамонзо вельде ушодовсь Ромоданова посёлкань Восточной ульцяванть кинть теемась, конань питнезэ 17 млн целковойть, покшолмазо вайгельбеде седе ламо.
Вана истя чистэ чис, иестэ иес теевить ламо паро тевть ломантнень эрямост кувалгавтомга, тиринь таркатнень паролгавтомга.


Ромодановась – те робочей посёлка, косо 114 куротне таргавить 64 вайгельбень покшолмасо, малав пелест эйстэст вельтязь асфальтсо.
Неень шкане тосо эрить эрьва кодамо раськень ломанть. Ютксост, нама, сехте ламо рузт, татарт, эрзят ды мокшот. Весемезэ 8986 ломанть. Сынь важодить истят промышленной предприятиятнесэ, кода «Ромодановосахар», «АПО Элеком» ОАО-тнесэ, «ВагоноРемонтнаяКомпания» ЗАО-со. Эштё Ромодановась содавикс Красный Узел чугункань кинь покш станциянть, «Европак» ООО-нть коряс.

Валентина ЮДИНА
Фототне Э.Ретунский

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».