Православной ломантнень туртов юты Ине постось. Священнослужительтне сонзэ лемдить Инечинть тешкстамонтень духовно-нравственной анокстамонь шкакс. Кода сонзэ пингстэ ветямс прянть, те эрьванть эсензэ кочкамозо. Эрямось жо невти, те шкастонть Пазнэнь кемицятнень ютксто седе ламот бажить а менстямс церьковасо ютавтовиця недлячинь ды покшчинь службатнень. Истя жо сеедьстэ редятано седеймарямонь тевть кажос понгозтнень ды нужасо эрицятнень туртов.
Пек паро, зярдо те шкане ломантне бажить лездамс вейкест-вейкест туртов, а невтнемс кежест, улемс седеймарицякс. Те шкась алтазь пежетькс тевтнень а нолдамонтень ды Пазонть марто кортнемантень. Бути тенень вишка пингестэ карматано тонавтомо эйкакшонок ды нуцьканок, кемеви, сынь эрямосост кармить тееме седе ламо паро тевть, касыть кунсолыцякс ды лиятненень лездамо бажицякс!
Ледстневи, кеветеешка иеде икеле, Ине постонь шкасто теевинь содавиксэкс Саранск ошонь Юго-Западонь районсо эриця ламо эйкакшонь триця Новгородовтнень семиянть марто. Сеске евтаса, кудазорось отец Сергий – священнослужитель.
Виде, сестэ эйкакшост эште вишкинельть, кементнень туртов колмо комнатасо квартирась марявсь эйдень кужокс. Кавто ярусонь кшнинь вете удома таркатнень лангс ванозь, теке мерят поездэнь вагонс совить. Седе, што тесэ эри ламо эйкакшонь триця семия, кортасть поровт лангсо видестэ рядсек ладсезь эйкакшонь карсемапельтнеяк.
Маласост эрицятне сестэ тенек пачтясть, батюшкась покш мель яви эрямонь шумбра лувонтень, эйкакштнень марто сеедьстэ лисни ушов зарядкань тееме, ушосо налксеме.
Мезесь се шкастонть саезь кадовсь а стувтовиксэкс, эйкакштне тетяст-аваст лангс ванозь истя жо кирдсть пост аволь ансяк ярсамопелень коряс (куш тенень сынст кияк эзь кармавто) ламо лия тевсэяк. Невтемакс, постонь читнестэ арасель мелест ваномс телевизор. Те шкастонть ловность духовной литература ды эрьвась юткстост седе ламо шка явсь вечкевикс тевензэ туртов: церынетне якасть спортонь секциятнес, тейтерькатне – седе домкасто тонавтнесть музыкальной предметтнэнь. Сынь тонавтнесть музыкальной школа-интернатсо.
Квартирасонть весемева неявсь арасьчи ды кажовчи, тень лангс апак вано, церынетнень туртов ульнесь шумбрачинь виевгавтомга эрьва кодамо спортонь инвентарь, тейтерькатненень – пианино.
Аволь умок Рузаевкань районсо Параскево-Вознесенской тейтерь-авань монастырьстэ отец Сергиень вастомсто (сон тосо служи) пшкадинь тензэ евтнемс эйкакштнеде, кинь кодамо уцясказо, эрямонь кизэ, эдь меельце вастовомадонть мейле ютась пек ламо шка .
Содавиксэкс теевсть храмсо
Священнослужителесь Сергей Новгородов чачсь Уфасо, эйкакш пингезэ ютась Тольятти ошсо. Эрямонь китне эште одсто пачтизь Мордовияв. Низэ, Мария Александровна, Отяжелень Дюрькина эрзянь велестэ. Сон одсто пек ормалгадокшнось. Зярдо тензэ ульнесть 24 иеть, тетязо ды авазо ускизь Саранскоев причастямо. Пазонь Авань Успениянь храмсо од тейтеренть редизе отец Иоанн (Генералов). Матушканть марто вейсэ сынь састь ве мельс саемс Мариянь эсест кудос. Сынь якасть мельганзо, макссть эсь седей лембест ды эрьва чистэ сайнесть храмов.
Шкань ютазь тейтеренть витевсь шумбрачизэ ды сон кармась моравтомо клироссо. Храмсо теевсь содавиксэкс отец Сергий марто. Аволь пек кувать вастневемадо мейле, одтнэ венчасть-урьвакстсть ды кармасть покш семиянь трямо-кастомо.
1995-1996 иетнестэ Новгородовтнень семиясо мельга-мельцек чачсть Иван цераст ды Ксения тейтерест. Эсест эрямо таркаст арасель, аламос эрясть сиведезь квартирасо.
Семияст аламонь-аламонь кармась касомо, чачтсть эште колмо тейтерть: Ольга (1998), Людмила (1999), Александра (2001). Котоцекс чачсь церынест Серафим. Те ульнесь 2002 иестэ, самай сестэ государствась тенст явсь ярмакт эрямо таркань рамамс. Вешематнень коряс сонзэ покшолмазо улезэ 100 кв. метрадо а седе аламо. А евтавияк кодамо покш кенярксчисэ ульнесь ламо эйкакшонь триця семиясь, зярдо кармась улеме эсест эрямо таркаст.
Шкань ютазь чачсть эште ниле эйкакшост: тейтерест Екатерина ды колмо церынест – Николай, Валерий, Семен.
Тонавтомс
Пазонть вечкеме, весенень паронь арсеме
Неть превс путоматнень евтынзе отец Сергий, зярдо кевкстинек сонзэ эйкакшонь кастомань салавачитнеде.
– Икеле, зярдо матушканть марто эште арасельть эйкакшонок, минь содынек кемень лувт, конатнень коряс эрявить сынст кастомс. Зярдо жо чачсь кеменце эйкакшонок, чарькодинек, вейкеськак эйстэст а роботы. Койсэнек, седе покш лезэ эрси сестэ, зярдо эйкакшонтень весемесь максови аламонь-аламонь, вейкетьстэ, бути а кунсолы – чумондома, теи видестэ – шнама, – мерсь Сергей Валерьевич. – Кудоютконь тевтнень топавтомсто эрьвась содасы эсензэ тевензэ, минек кухнясо свал ули дежурствань график. Виде, бути се шкастонть, кода весе сынь ульнесть вишкинеть, улевельгак велесэ моданок-кудонок, минь седе ламос сынст тонавтовлинек. Весемесь тенст маштоволь эрямосонть. Койсэнь, эйкакшонть вишка пингестэ саезь эряви тонавтомс Пазонть вечкеме, духовной литературань ловномо ды сонзэ чарькодеме, пертьпельксэнь мазычинть редямо, паронть беряненть эйстэ явомо.
Эрьвась муизе эрямонь кинзэ
Новгородовтнень сехте покш цераст Иван армиясо служамодо мейле Мордовиясо прядсь вуз ды тусь важодеме Московов. Сонензэ колоньгемень иеть. Важодемань тевекс кочкизе вишка бизнесэнть, панжсь эстензэ тев. Покш тейтерест Ксения лиссь мирденень, ули тейтерьказо, эри а васоло тетянзо-аванзо эйстэ.
Лия тейтертне – Ксения, Ольга, Людмила ды Александра, тонавтнесть музыкальной школасо-интернатсо, мейле прядызь Леонтий Кирюков лемсэ Саранскоень музыкальной училищанть. Ольга неень шкане эри Крымсэ, мусь эстензэ вечкевикс тев.
Людмила сермадстсь контракт РФ-нь Оборонань министерстванть марто ды служи Преображенской отдельной комендантонь полксо духовой оркестрасо. Сон лиссь мирденень.
Александра Саранскойсэ тонавтнемадо мейле истя жо тусь Московов, вейке таркасо важодемадо башка эште вети бизнес кондитерэнь тевенть коряс.
Кода вере евтынек, Александрань мельга чачсь Серафим. Сон тонавтни М. Е. Евсевьев лемсэ государственной педагогической университетсэ.
Тейтерест Екатерина прядсь электромеханической колледж, косо ней тонавтни Николай цёраст, Валерий ды Семен зярс якить школав.
Ламо иень арсемаст топавтовсь!
Новгородовтне пек вечкить оймсеме пертьпельксэнь мазыйчитнень ютксо. Умок уш рамасть зярыя палаткат ды свал яксить походс. Косо ансяк эзть ульне: Мокша, Сура лейтнень чиресэ, Инерка эрькенть маласо..
Ледстневи, кеветее иеде икеле, кода ульнинь те семиясонть, отец Сергий евтакшнось истямо мель, умок арсить эсест моданть коряс, косо пароль бу стявтомс кудо…
Ютазь иестэ те арсемась топавтовсь! РФ-нь Президентэсь Владимир Путин ламо эйкакшонь триця авантень Мария Новгородованень максызе «Мать–героиня» почетонь лементь. Кода содатано, те казненть марто государстванть пельде максови ярмаконь лезкс. Мирдть-нить сынст лангс рамасть велестэ кудо.
Виде, эйкакштне ней кассть, ламотне муизь эрямонь эсь кист. Ансяк косо бу сынь авольть эря, свал бажить самс тиринь кудов, тетяст-аваст содавтомо, сюкпрянь валонь евтамо. Те семиясонть касозь эйкакштне содасызь эрьва целковоенть питнензэ, эдь зярдо ломанесь эсь вийсэ сонзэ добовасы, теде мельпароськак ков седе покш ды варма мельгаяк сонзэ а нолдасы, ютавтсы лезэвстэ.
Превс путомат Ине постонь шкастонть
Отец Сергиень туртов постонь шкась аламо мейсэ явови лия читнень эйстэ, бути ансяк седе кувака службатнесэ. Сон, кода свал, ламо ловны духовной литература, Иневанькстнэнь сермадовксост, Евангелиянть. Тень тееме свал кармавты эйкакшонзо, истямо превс путома максы миненекак, православной ломантненень. Тень коряс сон ледстизе Иневанькс Николай Сербскиень, кинь пачтямосто карматано содамо, мик мирской газетатнень ловномстояк сы тенек духовной лезкс, бути карматано сонзэ ловномо кемиця ломанень сельмсэ ды Библиянть мельсэ кирдезь.
Пазнэнь озномсто кадомат ве енов лия тевтнень, арсема седе, кодамо вешема марто минь сонензэ пшкадтяно ды весе тень теема аволь мельде-валдо – седейшкава. Марят прят чумокс Пазонть икеле, сеске энялдт тензэ пежетьксэть нолдамост коряс.
Валентина Юдина