Понедельник, августа 15, 2022
Важное

Ардатовань ды Атяшевань епархиянь епископонть Вениаминэнь ушодксонзо ды баславамонзо коряс свал ютавтневить од ломантнень ютксо эрьва кодат пелькстамот, вастовомат ды седейшкавань кортамот.
Нать, а стяко сон Мордовия Республикань Рукопашной тюремань коряс федерациянь президент. Январень 22-це чистэ сонзэ лемс призэнть лангс ютавтовсть пелькстамот Орданьбуень ФОК-сонть. Сынь алтавсть иневанькс Феодор Ушаковонь валдо лемензэ ледстямга.

Те пелькстамонтень сакшность минек республикань рукопашной тюремань коряс весе клубтнестэ. Истя жо ульнесть инжеть Саратовань, Нижегородской, Ульяновской ёнкстнэстэ ды Чувашия Республикасто.
Кенярксчинтень сыцятнень ютксо ульнесть ламо почётонь инжеть ды спортонь вечкицят.

Пурнавозтненень седейшкавань икельце вал марто пшкадсь Мордовия Республикань Рукопашной тюремань коряс федерациянь президентэсь Вениамин владыкась. Седе тов пелькстыцятнень лемс паронь арсемат ёвтасть Ардатовань муниципальной райононь прявтонь полавтыцясь Н. В. Ерёмина, МР-нь Правительствань Председателень полавтыцясь Р. М. Цыбизова, МР-ва МВД-нь Личной составонть марто важодемань управлениянь прявтось внутренней службань подполковникесь И. Е. Зубаров.

Пелькстыцятнень мельга ваномань президиумсонть ульнесть: Ардатова ошонь мэрэсь М. С. Карпов, Ардатовань райононь прокуроронь полавтыцясь А. Ф. Сульдин, Национальной гвардиянь Ардатовань отделениянь прявтось А. Е. Забелин, Ардатовской райононь МЧС-нь Управлениянь прявтось внутренней службань полковникесь А. В. Шепелев.
Лембе валтнэнь ёвтамодо мейле ульнесь концертэнь а покш программа, конань анокстызь Ардатовань райононь Культурань кудонь артисттнэ.

Теде мейле ушодовсть пелькстамотне. Од боецтнэ невтизь спортонь ёрокчист. Весе изницятненень максозельть казнеть Ардатовань епархиянь Правящей Архиереенть, МР-нь Рукопашной тюремань коряс федерациянь президентэнть Вениамин владыканть пельде.

В. ВЛАДИМИРОВА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».