Эрси, тееват содавиксэкс ломаненть марто, кортнят седе-тонадо ды те вастовомадонть мейле кадоват мельспаросо. Истя лисськак, зярдо минь вастовинек Орданьбуень райононь Кеченьбие велень (руз. Кечушево) Космодамианской церьковань настоятеленть, Орданьбуень епархиянь од ломанень тевтнень коряс отделэнь прявтонть о. Игорь (Леонтьев) протоиереенть марто. Те ломанесь – сэтьме, а покшкавтниця, прянь а шныця, эсензэ тевензэ пек парсте топавтыця.
Бакусто – Мордовияв
Игорь Леонтьев чачсь Азербайджансо Баку ошсо. Тетязо военноель, секскак семиясь полавтсь а вейке эрямо тарка. Службанзо ушодызе Кронштадтсо, седе тов ютась Одессав, мейле служась Бакусо. Авазо жо эрямонзо перть ветясь кудоютконь тевтнень ды важодсь мебелень реставраторокс. Советской шкасто те профессиясь ульнесь кочкавикс. Семиясонть эйкакштнеде чачсть кавто, о. Игорень ули Елена сазорозо.
Эряви меремс, Игорь Леонтьевень тетязо ульнесь сеть ломантнень эйстэ, конась а пек чарькодиль Пазнэнь кемицятнень. Бакунь мореходной военной училищасо тонавтыцянь тевденть башка, сон ульнесь морской флотсо замполитэкс, коммунизмань шкатнестэ те тевесь ламодо кортась. Теке марто, церанзо лемдеманзо каршо эзь аште. Церынесь лемдезель Пазонь Лемдема чистэ.
Авазо, мекевлангт, ульнесь Пазнэнь кемиця ломанекс. Ды эрьва недлячистэ сайнесь эйкакшонзо церьковав. Вишка Игорь недлянь перть училь се чисэнть, зярдо авазо ветясы Пазонь кудов, косо церынькась марясь прянзо уцяскавокс ды мельспаросо тонавтнесь молитватнень. Сонензэ сынь марявсть чарькодевиця смусть марто мазый морокс, конатне пештясть эйкакшонть седеензэ кеняркссо.
– Весть авань марто молинек церьковав, службанть прядовомадо мейле малазон сась батюшкась ды кувать дивсесь, мекс мон, советской шкань эйкакшось, мельспаросо яксян церьковав ды содан ламо молитват. Секе жо чистэнть тердимем морамо церковань хоров, – евтни батюшкась.
Школань прядомадо мейле Игорь Леонтьев кочкизе Ставрополень духовной училищанть, седе тов тонавтнесь Саратовань духовной семинариясо. Тонавтнеманть прядомадо мейле ялганзо марто састь Мордовияв, ков тердинзе неень шкасто Санкт-Петербургонь ды Ладожской митрополитэсь Варсонофий (сестэ сон ульнесь Саранской ды Мордовской митрополиянь владыкакс). Сонзэ кармавтоманзо коряс эрявсь кочкамс служамонь ды эрямонь туртов тарка. О. Игорень арасель мелезэ кадовомс ошсо, секскак кочкизе Орданьбуень райононь Кеченьбие велень церькованть.
– Зярдо сынь важодеме Кеченьбиев, икельксэнь церьковадонть кадовкшность ансяк стенат. Велень эрицятнень марто вейсэ ушодынек ознома кудонть строямонзо. Теке жо шкастонть теевинь содавиксэкс Татьяна нинь марто. Сон сестэ М.Е. Евсевьев лемсэ МГПИ-нь (ней университет) студенткаль, тонавтнесь логопед-дефектолог специальностень коряс. Мартонзо вастовинек поездсэ Кеченьбиев ардомсто. Тейтересь сеске тусь мелезэнь. Ардомань перть ламо кортынек, лиссь истя, сонгак Пазнэнь кемиця ломань. Велев пачкодинек чоподава, ильтия тейтеренть кудов. Ды те вастовомадонть мейле уш эзинек явокшно. Иень ютазь урьвакстынек-венчинек ды приминь семейно-священнической служения. Татьяна лездась тень куш мейсэ, сонтемензэ, арсян, эйстэдень аволь лисе истямо ломань, кодамоян ней. Улить кавто тейтерьканок – Злата ды Ариадна. Кавонест эрить Саранскойсэ, омбоцесь эште Н.П. Огарев лемсэ МГУ-нь студентка, – корты о. Игорь.
Батюшкась евтнесь, зярдо семияст пурнави весе вейсэ, кудосонть свал гайгить лембе валт ды музыка. Секс мекс семиясонть эрьвась вечки морамо, омбоце тейтерест истя жо вадрясто налкси седямонь инструментсэ. Истя, зярдо Ариадна налкси синтезаторсо эли гитарасо, о. Игорь моры романст, раськень ды военной морот. Татьяна матушкась жо юткошкасто сермады эрзянь ды рузонь кельсэ стихть.
Эряви меремс, Кеченьбие велесэ Леонтьевтнень семияст свал ашти вадря невтемакс – эрить ояксчисэ, важодемадо а пелить, лездыть, мезень коряс иля пшкаде.
Кеченьбие велень Космодамианской церьковань приходсо служамодо башка, о. Игорь вети службат Орданьбуень райононь Редкодубия велень психоневрологической интернатонь часовнясонть. Службатне тосо ютавтовить ковозонзо весть.
Покш тев – лездамс лиятненень
О. Игорь ломанесь кол эрьва тевсэ. Тедеде топодить 30 иеть, кода сон эри ды служи Кеченьбие велесэ. Сон а сепи, Орданьбуень районось умок уш кармась сонензэ тиринсекс. Секскак, эрьва эрицянть батюшкась лови малавиксэкс. А кода а лездамс малавикс ломанентень, бути сон понгсь зыянс? Истя о. Игорь секе тев лезды нужачисэ эриця семиятненень. Зярдо ушодови школасо тонавтнема иесь, батюшкась рамси неть семиятнесэ трявиця-кастовиця эйкакштненень тонавтнеманть туртов весе эрявиксэнть, а стувтни каземс казнеть Од иентеньгак. Теде башка, эйкакштнень эрьва ие сайнесынзе Санкт-Петербургов экскурсияв, косо вишкатнень свал учи сюпав культурной программа. Батюшканть марто вейсэ сынь яксить театрав, музеев ды церьковав. Те ардомадонть мейле эрьва эйкакшось кадови покш мельспаросо. О. Игорь а лови прянзо волонтерокс, ансяк сонзэ вадря тевдензэ содыть республиканть томбалеяк.
Ояксчисэ спортонть марто
Кода уш кортынек седе вере, батюшкась ламо иень перть важоди Орданьбуень епархиянть юрсо од ломанень тевтнень коряс отделэнь прявтокс ды малав кемень иеть вети «Ушаков» православной спортивной клубонть. Тозонь якить 67 од ломанть, конатне сакшныть Орозбие, Низовка, Жаренки велетнестэ ды Орданьбуень станциясто. Эйкакштнень марто важоди ероков тренерэсь, республикасонок содавикс ломанесь Евгений Володин. Клубонть юрсо эйкакштне тонавтнить рукопашной тюремантень. Эряви евтамс, «Ушаков» клубонь од ломантне региононь ды регионъютконь спортонь пелькстамотнень свалшкань участникть.
– Клубось ушодызе важодеманзо 2021 иестэ. Те теварсексэнть анокстыцязо – Ардатовань ды Атяшевань икелень епископось, иневанькс Вениамин владыкась. 2023 иестэ сон аравтозь Кронштадтонь епископокс, Санкт-Петербургонь епархиянь викариекс, Свято-Троицкой Александро-Невской Лаврань наместникекс. Ульнесть шкат, зярдо Вениамин владыкась ульнесь МР-нь Рукопашной тюремань федерациянь президентэкс, секскак сонензэ сась мель панжомс истямо секция Орданьбуесэяк. Те проектэнть райононь эрицятне вастызь мельспаросо. Вадря, мекс клубонть историязо иеде иес яла сюпалгады, – евтни о. Игорь.
Ансяк улезэ кемема…
Тагояк велявтано велень церьковантень. Кода евтнесь о. Игорь, церькованть сюпав историязо. Сон строязель 1904 иестэ, советской шкасто пекстазель, седе тов яжазель. Кода уш евтынек, зярдо батюшкась сась служамо Кеченьбие велев, храмонть таркасо аштесть ансяк стенат. Седе тов ушодовсь пси важодема, теке жо таркантень вейсэнь вийсэ стявтозель неень шкань церьковась. Ней тосо ветявить витнемань-петнемань тевть – вадрялгавтовить церьковапрясь ды ушоенксось. Весе неть роботатне ветявить мелень явиця ломантнень лезксэст вельде. Кода тешкстась о. Игорь, сынь а мерить евтнемс лемест, ансяк теить покш тев.
Храмсонть ванстовсть умонь пазаватне. Вейкесь эйстэст – «Знамение» Пазонь Авань пазавась. Сонензэ 150 ламо иеть. Кода евтнесь о. Игорь, сонзэ артыцянзо эрясть XVIII пингестэ, те ульнесть Пенза енксонь авань монастырень кавто сазортне. Революциянь шкатнестэ те пазавась кекшезель церьковань старостанть кудосо, конась пек мелявтсь те ули-паронть кисэ. Пазаванть мельга аволь весть сакшность рамицят, авась киненьгак эзизе мие. Салыцятнеде ванстомга жо старостась артызе пазаванть лаксо, теде мейле те ликесь емавтызе эсензэ оригинальностензэ ды кувать киненьгак эзь эрявкшно. Зярдо стявтозель неень шкань храмось, пазавась тагояк понгавтозель эсензэ таркас.
Храмсонть о. Игорде ды Татьяна матушкадонть башка важодить сисем ломанть – 6 моравтыцят ды вейке лездыця. Церькованть маласо ашти просфорань панема кудось, косо кавто иеде икеле важодсь недлячинь школа, ков якильть Кеченьбие велень школасо тонавтницятне. Недлячинь школась важодсь малав 27 иеть. Эйкакштне невтнесть эсь ерокчист республикань церковной фестивальтнесэ, концерт марто аволь весть ардтнесть Саранскоень духовной училищав. О. Игорь пурнакшнось эйкакшонь вадря хор. Ней уш сонськак а ледстясы, зяроксть церынетнень-тейтернетнень марто ардтнесь паломнической экскурсияв. А весть ульнесть Дивеевасо ды Сергиев Посадсо. Берянь, мекс те весемесь лиядсь ансяк ледстнемакс. Кеченьбиень школанть пекстызь, эйкакштнень ней усксить шабра велев. Велесэнть эрямось аламонь-аламонь лепами. Кенярдовты, зярдо недлячистэ ды кодамояк покшчистэ церьковась пешксе ломанде. Тей сыть кода одтнэ, истя велень сехте сыре эрицятнеяк.
– Дивавты, зярдо сыре ломантне сыть церьковав кавто палка марто, аштесызь службанть, кудов жо туить палкавтомо. Те корты седе: Пазнэнь кемемась леци весе сэредькстнэнь, ломанесь службадо мейле шумбралгады, – корты о. Игорь.
Батюшканть валонзо коряс сехте пек дивавты се, зярдо а кемицясь шкань ютазь ушоды Пазнэнь озномо, панжсы седеензэ молитватненень, чарькодьсы сынст смустест. Истятнень кисэ о. Игорь кавксть седе ламо озны.
Стака шкатнень ды эрямонь мелявкстнэнь лангс апак вано, батюшкась арси тенек эрямс, кемемс ды важодемс. Эдь стакачитне седеяк виевгавтыть.
Алена Артемьева
Фототне Егор Горинэнь.