Аволь умок покш чить ютавтовсть Орданьбуень моданть лангсо. Тенень ульнесть кенярксов кавто тевть: кемень иеть топодсть Ардатовань епархиянтень ды истянь зняро жо Ардатовань ды Атяшевань епископонть, иневанькс Вениамин владыкань од епархиянь управляющеекс Архиереень тевентень аравтомань чистэнть саезь.
Кода пачти владыкась, Мордовиясо церьковатнень вельмевтемась, духовной питнейчитнень одкстомтомась ушодовсть вейксэньгеменце иетнестэ. Се шкастонть минек республикасо ульнесть ниленьгеменде ламо храмт, малав зняро жо священнослужительть, арасель вейкеяк монастырь. Самай сеть стака шкатнестэ кемекстазель Саранскоень епархиясь, сон явозель Пензань епархиясто, управляющеекс ладязель Варсонофий епископось. Сонзэ прявтсо ды пазнэнь кемицятнень бажамост вельде минек республикасо пек седе ламолгадсть церьковатне, сындест кармасть кавтосядто ламо, вельмевтевсть кемнилее монастырть, панжовсь Саранскоень духовной училищась, кармасть лиснеме православной газетат.
Московонь ды весе Русень Кирилл Патриархонть баславамонзо коряс 2011 иень маень 30-це чистэ теезель Ардатовань ды Атяшевань епархиясь, сонзэ прявтокс аравтозель Саранской епархиянь клирикесь, Чуфаровань цёрань монастырень наместникесь, игуменэсь Вениамин (Кириллов). Теке жо иень октябрясто Ардатовань ды Атяшевань епархиясь совавтозель Мордовиянь Митрополияс. 2011 иень сёксестэнть, Покровонь кенярксчистэнть, Московсо, Христа Спасителень Храмсо ютавтозель хиротониясь Вениамин архимандритэнть коряс.
Се шкастонть саезь сон ушодсь важодеме минек республикань кото районтнэсэ: Орданьбуень, Отяжелень, Чаунзань, Покш Березникень, Дубёнкань, Покш Игнатовань.
Кемень иень перть владыканть бажамонзо ды пазнэнь кемицятнень лезксэст вельде Ардатовань ды Атяшевань епархиясо одс стявтозельть ды вельмевтезельть-витнезельть вейксэньгемень церьковат ды вейке монастырь, косо кандыть службаст сизьгеменде ламо священнослужительть. Кодашка кеняркс кандсь Отяжеле ёнксонь пазнэнь кемицятненень ды мазычи те райононь весе эрицятненень Андрей Первозванный лемсэ од церьковась.
Ардатовасо теезь епархиянь управлениянь од зданиясь, косо ванстовить церковно-исторической документт, епархиянь музей, паломниктнень туртов гостиница ды те епархиясо служицятненень важодема таркат.
Владыкась ламо теи Мордовиянь эрицятнень духовной сюпавчист кастомга, православиянь теманть седе домкасто содамга. Сон телевидениясо вети передачат, кода рузонь, истя тиринь кельтнесэ, баславамонзо вельде анокставить публикацият райононь ды республикань газетатнесэ.
Н. П. Огарёв лемсэ Мордовской госуниверситетэнь студенттнэнень ловны лекцият культурология предметэнть коряс.
Сонзэ ушодксонзо вельде од ломантнень ютксо ютавтневить ламо покш пелькстамот спортонь коряс. Эрьва иестэ пазнэнь кемицятнень марто вейсэ якить иневанькс таркатнева, конат васоло Иерусалимсэ ды весе Россиянь келес. Епархиянть юрсо свал ютавтневить образовательной ловномат, конат алтавить Симферополень ды Крымень иневанькс Лука просветителенть лемс. Тосо ванкшновить од ломантнень патриотизмань лувсо кастомадо ды нравственной ёнксонь кевкстематне. Сон кеме сюлмот кирди тонавтыцятнень, врачтнень, экологтнень марто, ютавтнить вейсэнь ламо тевть ды вастовомат эйкакштнень видестэ кастомга.
Од ломантнень ютксо ютавтовить эрьва кодат пелькстамот: шахматонь, волейболонь, футболонь, хоккеень коряс ды ламо лият.
Те сонзэ ушодксонзо коряс од ломантнень ютксо пурназель «Доброволец» православиянь вейсэндявксось, Ардатовань медицинань колледженть юрсо теезь «Милосердие», «Волонтерт-медикть» группатне.
Покш мель явови социальной лезксэнь максомантень нужасо эрицятненень ды эрямонь стакачитнень марто вастовицятненень. Васень таркасот тетявтомо-ававтомо касыцятне, стака ормасо сэредицятне, кудовтомотне, ламо эйкакшонь трицятне ды истя седе тов.
Епархиясо важодицятне сеедьстэ якить сыре ломанень кудотнес, интернаттнэс, косо сынст свал учить. Тосо эрицятненень максыть аволь ансяк казнеть, васняяк ёвтыть лембе, седеень оймавтыця валт.
Епархиянь управлениянь зданиясонть ды Чаунзань Михайло-Архангельской храмонть юрсо теезь гуманитарной лезксэнь складт нужасо эрицятнень туртов. Истя жо анокстазь проект сеть семиятненень лездамга, конат вастовить апак учонь стакачитнень марто.
Покш мель явови од ломантнень ютксо православиянть кемекстамонтень, штобу сынь седе ламо содавольть сеть ломантнень пельде, кинень малавикс те темась.
А кадовить вановттомо правань ванстыця органонь важодицятне. Васняяк сеть, кить службаст кандыть «пси таркатнесэ». Истя жо мель явови масторонть икеле долгонь топавтомо армияв служамо туицятненень.
Эрьва ков кенери оймамонь а содыця владыкась, эрьва чистэ сонзэ учить ламо тевть, конатнень вельде сон служи Пазонтень ды весе сетненень, кить пельдензэ свал учить лембе валт, оймавтыця превс путомат неень а шожда шкастонть.
Те иень сёксня Покш Березникень Шугурова велесэ Ардатовань ды Атяшевань епископонть Вениамин владыканть баславамонзо коряс ушодовсь вадря тев: од церьковань стявтомась.
Теде икеле се таркасонть, косо карми аштеме Храмось, паро тевень ушодоманть коряс ютавтозель моравтома. Молебенэнть прявтсоль Ардатовань епархиянь иневанькстнэнь канонизацияст коряс отделэнь руководителесь, иеромонахось Тихон (Воронов).
Те Пазонь кудось тееви иневанькс Павел Ягодинскоень лемс. Сон эрясь те велесэнть ды ветясь службат колоньгеменце иетнестэ. Кемеви, муевить ломанть, кить кармить лездамо те паро ушодксонть теемстэ.
Мельвановикс владыка!
«Эрзянь правда» газетань коллективесь ёвты Тыненк поздоровт 10 иень перть седейшкавань служамонть, ине тевенть топавтоманзо кувалма. Вейсэндяви весе паро валтнэс, конат ёвтавить неть читнестэ Тынк лемс. Арси, васняяк, кеме шумбрачи Тынк ды весе малавиксэнк туртов. Кадык икелепелевгак пастырень валонк ды тевенк кармить улеме валдот, лезэнь кандыцят, ёжонь кепедицят ды апаро тевтнеде идицят!
Валентина ЮДИНА.
Фототне саезь Ардатовань епархиянь сайтстэ.