Анастасия Васильевна Денисова Отяжелень райононь Сабанцелень почтань отделениянь прявтокс важоди кемнилее иеть. Теде икеле зярыя иень перть роботась почтальонокс. Ды весе те шканть перть кочказенть коряс эзь янксе, стакачитнень лангс эзь пеняця.

А эдь эрьвась соды, почтань важодицятнень тевест пек а шожда. Уш рана валске почтань отделениятнесэ роботась лаказь лаки. Весемесь ушодови сортировкастонть. Тесэ весе газетатне, журналтнэ, сёрматне ды посылкатне явшевить башка-башка. Сабанцелень почтань отделениянть юрс совить колмо велеть: Сабанцелесь, Пумбрась, Таразбуесь. Тесэ пштистэ ванома, зяро ды кодат газетат, журналт састь те эли тона велентень, улить-арасть сёрмат, посылкат. Весе роботантькак топавтома эрязасто, штобу ловныцятненень шкасто пачтямс газетатнень ды журналтнэнь, кулянь учицятненень – сёрматнень.

Од шкава Анастасия Денисова почтальонокс важодемадонть эзь арсекшнеяк, истят мельть превезэнзэ эзть сакшнояк. Школанть прядомадо мейле тонавтнесь Орданьбуесэ бухгалтерэнь тевентень. Училищанть прядомадо мейле сась тиринь Сабанцелев ды кармась важодеме кассирэкс «Путь Ильича» колхозсонть, мейле ульнесь учётчицакс МТФ-сэ. Шкань ютазь жо арсизе-ладизе ды тусь почтав. Кармась почтальонокс.

– Нама, информационной технологиятнень шкасто почтань важодицятнень тевест аволь истямо, кода кеменьшка иеде икеле. Ледстневи, икеле весементь кедьсэ сёрмадынек. Важодема таркасо чинзэ перть а кенерят, кудов пешксе сумка конёвт савсь кандомс. Кудосояк роботат. Ней компьютертнэнь марто тевесь аламодо седе шождалгадсь. Ансяк ломантне истя жо сёрмадстыть газетат, журналт, кучнить сёрмат. Меельце иетнестэ савсь кандтнемс пек ламо официальной сёрмат: банксто, налоговойстэ, судсто ды лия ведомстватнестэ, – ёвтни Анастасия Денисова.

Анастасия Васильевна тешксты важодема лувонть полавтоманзояк. Корты, ней газетань ды журналонь ловныцятнеде кармасть седе аламо, сёрмат жо вейке-вейкенень малав овсе а кучнить.

– Минек весень полонс саимизь Интернетэсь ды телефонтнэ. Ней апак мелявто гайневтть ков мелеть. Бути жо неевлик ломаненть, лездыть компьютерэсь ды скайпесь. Кие арсекшнесь истямодо? Икеле эрьва почтальононть сумказо акепедевишка ульнесь. Эрьва кудосо сёрмадстыльть зярыя газетат ды журналт. А зяро сёрмат савкшнось кандтнемс! Эрьвась учось сынст, учось кулят роднянзо-раськензэ пельде, – корты почтань прявтось.

Анастасия Васильевна топавты аволь ансяк прявтонь тевенть, сеедьстэ савкшны улемс почтальонокскак: явшемс кудова почтанть ды пенсиятнень. Сабанцелень почтань отделениясонть, сондензэ башка, важодить эштё колмо почтальонт. Кавтотне роботыть Сабанцелень ды Пумбрань эрицятнень марто, вейкесь – Таразбуень.

Кемнилее иень перть почтальонокс тесэ важоди Лидия Николаевна Суняйкина. Авась ламо иень перть ульнесь колхозсо дояркакс. Тевесь а шождатнестэ, эрявить ламо вийтькак, шумбрачияк. Марясь, эсест велень почтасо чамсь тарка. Истя кармась почтальонокс.

– Нама, тесэяк роботась аволь шождатнестэ, истя жо ответственнойгак. Кудова кандтнетяно аволь ансяк газетатнень, журналтнэнь ды сёрматнень, пенсиятненьгак кудос пачтятано, – ёвтни Лидия Николаевна. – Эдь пенсиясотне седе ламот сыре ломанть, почтас пачкодемс тенст стака. Аволь аламо истяткак, конат эрить ськамост, малавиксэст арасть. Сынь минек эйсэ покш мельсэ учить, теке сехте паро ялганть. Кортнить мартонок, кевкстнить кулятнень. Сеедьстэ кармавтыть мезеяк рамамс. Ламо иетнень перть ладявсь истя, што минь сынст марто эрятано ве эрямосо. Мон содасынь эрьванть мелявксонзо ды кенярксонзо. Сынст туртов минь, почтальонтнэ, мерят, малавикс ломанть: потмоёжост тенек панжсызь, семиядост ёвтнить, эсь орматнеде. Арсян, сыре ломантненень эряви покш седейлембе, ёвтнемаст кунсолома, эдь сыненст пек а сатыть ломань марто кортамотне. Минь весе свал ков-бути эрязкалетяно ды малавиксэнек туртов а явтано сатышка мель.

Лидия Николаевнань участказо аволь вишкине: кавто покш курот ды эштё вейке седе вишкине. Эрицятнеде ламо, малав эрьва кудосо сёрмадстыть газетат, журналт, лиясто сакшныть сёрматкак. Важодемадонть, кода тешксты Л.Н. Суняйкина, сатышка.
Эсь кортамосост почтань важодицятне кавонест покш сюкпря ёвтасть «Сабанчеевское» ООО-нь прявтонтень Дмитрий Николаевич Игушкиннэнь ды тешкстызь, сынст велесь эри сонзэ паро тевензэ кувалма.

Юлия Еремина