Пятница, марта 29, 2024
Важное

2021 иень умарьковонь меельце чистэ тусь эрямосто писателесь, журналистэсь Пётр Андреевич Ключагин. Маряви, ансяк неть читнестэ сон гайневтнесь тенек редакцияв ды кортась мартонок… Ней арась ютксонок…

П.А. Ключагин чачсь 1936 иень аштемковонь 18-це чистэ (тедеде тензэ топодсть 85 иеть) Отяжбуень Кулязбуесэ. 1960 иестэ прядызе Мордовиянь государственной университетэнь филологиянь факультетэнть. Кармась важодеме «Эрзянь правда» газетасо. 1964 иестэ прядызе Ленинградонь высшей партийной школанть.

Васенце валморонзо лиснесть «Эрзянь правдасо», васенце ёвтнемазо – «Сурань толт» журналсо 1959 иестэ. П. Ключагин сёрмадсь пейдемань ды сатирань ёвтнемат, сценкат, эйкакштнень туртов произведеният. Сон нолдась зярыя пусмот: «Од пингес кить-янт», «Пирявкс», «Меельце кулят», «Ожо цецят», «Цёканька», «Апак прядо моро», «Аниськат», «Кочказь произведеният». Эйсэст ёвтнемат, новеллат, стихть, ледстнемат.

«Эрзянь правдасо» важодемстэ ламо сёрмадсь «Карязонь трокс» пшти рубрикантень. Се шкань фельетонтнэнь ютксо башка, весемеде неявикс таркасо аштить П. Ключагинэнь фельетононзо. Эсь произведениятнесэ сон лангс ливтсь сеть асатыкстнэнь, кодат ульнесть се шкасто велень эрямосонть, колхозонь производствасонть. Сон «каряз ланга» чавсь сеть ломантнень, кить эзть машто ладямо тевтнень, кинь чумост кувалма эзь паролгадо ды эзь сюпалгадо колхозонь эрямось, сялдсь ды кардась мельтемечинть, азортомочинть.

Пётр Андреевич – сёрмадей, конань творчестванзо а човорясак лиятнень марто. Сонзэ эсензэ сёрмадомань тешксэзэ ды лувозо, эрямонть лангс эсензэ вановтозо. Эсензэ произведениятнень туртов геройтненьгак сон эзь вешне костояк васолдо ды эзь сае сынст эсензэ превстэ-удемстэ, эзь сала кинь-бути лиянь кедьстэ. Сынь, неть геройтне, эрить перьканок, малаванок, вакссонок. Эряви ансяк маштомс редямост, сынст обуцяст чарькодеме ды невтеме. Ключагин маштсь тень тееме. Секс произведениянзояк шождасто ловновикст ды чарькодевикст.

1983 иестэ идизе «Особенности формирования мордовской литературы (1917-1941)» теманть коряс кандидатонь диссертациянть, кармась важодеме Н.П. Огарёв лемсэ МГУ-нь журналистикань кафедрань доцентэкс. Сон ламо иень перть тонавтсь од ломантнень. Эрьва студентэзэ нейгак ледстни сонзэ ансяк паро валсо.

П.А. Ключагин казезь СССР-нь Министрань Советсэ Печатень коряс комитетэнь «Отличник печати» значоксо, сон – Мордовия Республикань культурань заслуженной роботник (1994), Россиянь Писателень союзонь член (1991).

Пётр Андреевичень лемензэ свал кармить мельсэ кирдеме тонавтницянзо.

Весе малавиксэнзэ туртов ёвтатано седеймарямонь валт.

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».