Тедеде Орданьбуень райононь эрзянь Пиксяська велесь тешксты эсь теевемань 350 иетнень. Велень эрицятне те кенярксчинть арсить тешкстамс келейстэ, ламо инже марто.
Неть читнестэ минь содавтынек те веленть ды вастовинек Пиксяськань администрациянь прявтонть Владимир Николаевич Громов ды тесэнь эрицятнень марто. Владимир Николаевич ёвтнесь веленть течинь эрямодонзо, тесэ эриця ломантнеде, талновтыця тевтнеде-мелявкстнэде ды покш кенярксчинтень анокстамотнеде.
– Эрьва ломаненть туртов сехте малавикс, мельстуиця ды вадря тиринь ёнксось – те се, косо сон чачсь-кассь, теинзе васенце эскельксэнзэ, ёвтызе васенце валонзо. Монь туртов истямокс ашти Пиксяська велесь. Сонзэ марто сюлмавозь весе монь эрямом эйкакшпорасто саезь течинь чис, – ёвтни Владимир Громов. – Мон сонзэ эзия полавто ошонть лангс институтонть прядомадо мейлеяк. Велявтынь мекев. Васень шкастонть роботынь «Пиксясинский» СХПК-со. Важодинь строямонь бригадасояк, ульнинь бригадирэкскак. Ней жо, меельце вете иетнень перть, топавтан велень администрациянь прявтонь тевенть.
Велень эрицятнень валост коряс, эсь тевенть Владимир Николаевич топавты кода эряви, эсь веледенть мелявтозь ды ломантнеде арсезь. Сон сонсь теи ламот тевтнень, конат сюлмавозь веленть вадрялгавтоманзо марто. Улезэ те китнень витнемась, администрациянть ды чавосто аштиця кудотнень перька касыця тикшенть-куракштнень леднемась. Эрьва тунда порксни эенть велень эрькенть лангсто. Эдь бути тень а теемс, тунда ведь алов саевить маласо аштиця кудотне. Ды апак покшкавтне лезды эрьва пшкадицянтень.
Течинь чине Пиксяськасо эрить малав 300 ломанть. Улить од семият. Кенярдовты, улить эйкакшт. Кода мельспаросо тешкстызе Владимир Николаевич, тедеде васенце классос молить ниле эйкакшт. Неень шкане те пек паро.
– Пек берянь, эсенек велесэ школанть пекстызь зярыя иеде икеле, – корты Владимир Громов. – Эйкакштнень усксить Низовкав. Тосонь школав тонавтыцякс саизь эсенек школань зярыя роботыцятненьгак.
Школань зданиясонть жо ней аштить велень весе учреждениятне. Тесэ администрациясь, ФАП-сь, библиотекась, почтась, Культурань кудось. Важоди минек велесэ «Ардатов» МАПО-сь, конась ашти важодема таркань максыцякс ды велень весе тевтнесэ васень лездыцякс. Телень шкасто урядыть китнень ловонть эйстэ, кизна лездыть сынст витнемасо. Лездыть лия пшкадематнень коряскак.
2018 иестэ «Безопасные и качественные автомобильные дороги» национальной проектэнть коряс Пиксяськасо теезель од киланго велепестэнть саезь куншкакуронть видьс. Аламонь-аламонь китне витневить лия куротнесэяк. Кода мерсь Владимир Николаевич, нацпроектэнть коряс эштё вейке од киланго арсеви теемс МТФ-нть видьс. Кемить, те тевесь топавтови сы иестэ.
– Нама, велесэ свал улить кодаткак мелявкст, конатнень кодаяк решамат, – корты Пиксяськань администрациянь прявтось. – Кода мон ансяк ушодынь важодеме, ульнесь кевкстема велень куротнень валдомтоманть коряс. Светэнть кисэ пандоматне ульнесть пек покшт, аволь минек ярмактнень коряс. Арсинек, кода улема? Раминек энергиянь ванстыця лампочкат. Варчамонь туртов васня понгавтынек кавто, ванынек, кода пряст невтить. Лиссь истя, пандоматне алкукс седе вишкалгадсть.
Седе тов ули меленек кармамс эштё кодамояк нацпроектэнь участникекс. Те лезды теемс седе парокс минек веленть, вадрялгавтомс тесэнь эрямонть.
Покш мель Пиксяська велесэ явови культурной эрямонтень. Тесэ бажить а менстямс вейкеяк кенярксчинь мероприятия ды свал анокстыть эрицятнень туртов кодамояк концерт. Вадря мероприятият анокставить Од иентень, Авань раськеютконь чинтень, Сыре ломантненень алтазь чинтень. Эсест коест Пиксяськань эрицятнень ули Инечинть тешкстамстояк. Весе эрицятне, седе пек од ломантне, веленть маласо аштиця Катяпандонть прясто нолдтнить кирвазтезь чарыть. Те коесь тесэ кеместэ ванстови уш ламо иеть.
– Нама, коронавирусонь кезовонть шкасто весе мероприятиятнень ды кенярксчитнень савсь лоткавтомс, – тешксты Владимир Громов. – Весе те теевсь минек эрицятнень шумбрачист ды эрямост ванстомга. Ды, эряви меремс, те лездась. Сэредицянок малав овсе арасельть. Ней тевтне седе вадрялгадсть, секскак арсинек велень 350 иетнень тешкстамга пурнамс кенярксчи. Весемесь тееви эпидемиологиянь вешематнень кирдезь. Эсенек Культурань кудонь важодицятне арсесть уш культурной программа. Инжекс учовить шабра Кельвяднестэ «Валскень зоря», Куцян велестэ «Лейне» ансамблятне, сыть Орданьбуень Культурань кудонь морыцятне. Арсетяно тердемс Саранск ошстояк кодамояк ансамбля.
А кодат мазыйть тесэнь таркатне! Веленть маласо аштиця пандонть прясто Пиксяськась, мерят, теке кедеть лангсо ашти. Пандонть лия пеле пиче ды лия чувто марто касыця вирь. Коштось истямо ванькс-ванькс! Тесэ жо, пандонть прясо, ули лисьмапря, конась зярыя иеде икеле светязель Иневанькстнэнь Петрань ды Павелэнь лемсэ. Покш кенярксчистэ ломантнеде тесэ пурнавкшныть ламо. Улить арсемат пандонть теемс телень шкане оймсема таркакс. Арсеви, неть бажамотне топавтовить. Эдь веледенть кармить содамо седе ламо ломанть, паряк, тень коряс эрицятнеяк седе ламолгадыть.
Тердема!
Пиксяська веленть 350 иетнень тешкстамо инжекс учотано минек веленть марто сюлмавозь весе ломантнень, конат тесэ чачсть-кассть, эрясть сынсь ды малавиксэст, конат ловить сонзэ тиринь ёнксокс ды эсь седейпельксэкс. Покш мельсэ учотано лиятненьгак, кинь ули мелезэ явомс минек марто те кенярксчинть.
Велень чинтень алтазь кенярксчись ютавтови аштемковонь 19-це чистэ велень куншкакуросо, администрациянть маласо. Торжественной пельксэсь ушодови 12 чассто 30 минутасто. Садо! Покш мельсэ учотано весень!
Пиксяська велень
администрациянь прявтось
В.Н. Громов
Юлия Еремина