Россиянь МВД-нь «Ичалковский» ММО-нь отделэв пшкадсь 47 иесэ ава, кона ёвтнесь манчемань тевде.
Сон пачтясь, аволь умок алужонзо марто ладост кольсь ды сынь явсть. Эрьва кодамо яволявтомань сайтстэ ловнось истят услугатнеде, кода орожиямот, сы шкадо ёвтамот, «вечкемань орожиямот». Сюлмавсь мартост. Тосо асодавикс тейтерьавась кунсолызе ды алтась лездамс мекев велявтомс вечкевиксэнзэ, алтась тень теемс натой 98 процентс. Орожиямонть питнесь стясь 18 тёжат целковойть. Ансяк вана ярмактнень кучомсто авась манявсь ды лепштявсь лия цифратнес, кучсь 112 тёжат целковойть. Сон пшкадсь энялдома марто велявтомс мекев ярмаконзо, ансяк орожиясь теде мейле костояк эзь муеве.
Авантень эзть учово алужоськак, ярмактнеяк ды сон пшкадсь полицияв.
Неень шкане следственной отделэсь панжсь мошенничествань коряс уголовной тев. Вешневи зыянонь теицясь.
МР-ва МВД-сь тагояк пшкади весенень, уледе састо, зярдо эряви тенк орожиямонь услугат, ванстынк ярмаконк. Илядо кеме орожиицянь ды экстрасенсэнь рекламань яволявтоматненень, конат вастовить телевидениясо ды интернетсэ. Тосо эрьва мезть тенк алтыть, ансяк учозенть таркас ёмавтсынк меельце ярмаконк.