Неть читнестэ Мордовия Республикань пресс-центрасо ютавтовсь «кругловой столь», конась алтавсь пертьпельксэнть шукшпрятнеде ванстомантень, те кевкстеманть коряс стакачитнень витемантень. Сонензэ ушодкс путсть региононь ОНФ-нь активисттнэ.
Кортамось мольсь шукшонь пурнамодо, контейнертнэнь туртов таркатнень муемадо, сынст ванськавтомадо ды те тевенть кисэ пандомадо. Истя жо токавсть велетнева берянь китне ды сынст парсте кирдемась.
Талновтыця кевкстеманть толковамо, Общероссийской народной фронтонь представительтнеде башка, пурнавкшность профильной министерстватнесэ, Саранск ошонь округонь Администрациясо важодицятне.
ОНФ-нь активистэсь Игорь Кабанов башка мель явсь республикань кой-кона велетнева китнень а маштовиксчинтень, калгодо вельтявксонть арасьчинтень. Самай те тувталонть кувалма велень аволь весе ульцятнева путовить шукштнень пурнамонь контейнертнэ эли сынь аштить пек васоло эрямо кудотнень эйстэ. Те асатыксэнть лангс апак вано, кудазортнэнь ялатеке кармавтыть пандомо тарифень коряс. Ютазь иестэ Россиянь Президентэнть марто «виде линиянть» ветямсто Покш Игнатбуень ды Ицялонь районтнэнь Кергуды ды Резоватова велетнень эрицятне пеняцясть те асатыксэнть лангс.
Истямо стакачинть витемга Народной фронтонтень совицятне мерсть велень поселениятненень ютамс шукштнень кескавс пурнамонтень, конатнень цётазь чистэ ды шкасто кармить пурнамо специальной грузовой автомашинат.
Пурнавозтне тешкстызь, алкукскак, республикань кой-кона велетнесэ эрявить муемс башка таркат шукштнень пурнамонть туртов. Республикань тарифтнень коряс службань прявтось Алексей Рязанов макссь толковамот питнетнень коряс. Пачтязель законодательстванть од ёнкстнэде. Истя, те иень мартсто саезь контейнерэнь площадкатне эрямо кудотнестэ аштест 20 метрадо а седе маласо ды 100 метрадо а седе васоло. Неень шкань вешематнень коряс, вейке таркасо башка явозь шукшонь контейнертнэде улест 12 а седе ламо.
Республикань Роспотребнадзоронь прявтонь полавтыцясь Наталья Фадеева мерсь, контейнертнэнь аравтомань тарканть теема калгодо вельтявкс марто ды пиземень, ловонь соламодо мейлень веденть ве ёнов нолдамонть мельс саезь.
Саранск ошонь Б. Хмельницкоень куронь 59 № кудонь комитетэнь прявтось Татьяна Курбакова пачтясь, шукшонь пурнамонь контейнертнэ, конат аштить эйкакшонь налксемань таркатнестэ а васоло, вестькак апак ванськавто. Лембенть самонзо марто апаро чинесь ламолгады.
Те кевкстеманть коряс истя жо толковамот макссь Наталья Фадеева. Сонзэ валонзо коряс, контейнертнэнь ды перькаст уликс тарканть ванськавтоманть топавтома муниципалитетэнтень. А вана кудотнесэ мусоропроводтнэнь ванськавтоманть кисэ ответственность кандыть управляющей компаниятне. Од вешематнень коряс тень теема ковозонзо весть.
Шукштнень пурнамост ды кирдемаст коряс кевкстемась кепедевсь шкастонзо. Ушосо тундо, ловось солась, весе рудазтнэ лиссть лангс. Шкастонзо шукштнеде олякстомтомась ванстсы пертьпельксэнек ваньксчинзэ.
Валентина Юдина