Оксана Макушкина чачсь Мордовиясо. Сонзэ эйкакш пингезэ ютась Покш Березникбуень Аловелесэ. Школанть прядомадо мейле мольсь тонавтнеме Н.П. Огарев лемсэ МГУ-нь филологиянь факультетэв. Седе тов лиссь мирденень. Семиянзо марто тусть эрямо ве енов – Иркутской областев. Вейке омбоце мельга чачсть колмо эйкакшост. Колмоце эйдест, учовикс церынест, чачсь лавшо шумбрачи марто. Мезе савсь тенст печтямс, кода цидярдомс, муемс вийть эрямс? Теде тенек евтнесь сонсь Оксана Дмитриевна, кона важоди Мордовиянь «Наши дети» эйкакштнень-инвалидтнэнь марто семиятненень лездамонь центрань АНО-со.
– Минек Ванюшка чачсь седеень клапанонь колавкс марто (порок сердца). Врачтне кортасть, кувать а карми эрямо. Зярыя чинь ютазь тейсть тензэ операция. Рентгенсэ неявсь, чачтомсто сивсь ключицазо, ульнесть лия томбавомат. Сынек кудов, карминек ютамо реабилитация, массажт. Кото ковонзо топодемадо мейле таго молинек шумбрачинзэ ванкшновтомо. Врачтне кортыть, нолдынк чумонок, васенце операциясонть эзинек тее сень, мезе эрявсь, эряви эште вейке операция. Кото ковсо таго тейсть седейс операция. Видькстан, пек ризнынь. Те операциядонть мейле эйкакшось лоткась касомо… Топодсь Ванянень ие, сталмозо аламо, кавто операцият ильведькс марто, ды кияк эзь кунда витеме. Карминь сермалеме эрьва кодамо кардиоцентрава. Кияк эзимизь сае. Истя сюлмавинь Германиянь врачтнень марто. Тосо мерсть: эряви седе куроксто теемс операция, а менстямс шканть. Ушодынек ярмаконь пурнамо, лездась вейке благотворительной фондось, – евтни Оксана Дмитриевна.
Шкань апак таргсе, зярдо пурнавсть ярмактне, авась сыргась кавто иесэ Ванюшка марто Берлинэв. Больницясонть лецявсть эйкакшт эрьва кодамо масторсто. Сынст врачост рузоль, секскак кодаткак стакачить келенть коряс арасельть. Реанимацияв нолдасть весе малавикстнэнь. Оксанаяк совсесь церынензэ ваксс. Операциядо мейле эйкакштнень шумбрачист мельга пштистэ вансть зярыя врачт. Те ульнесь 2013 иестэ. Россиясояк кармасть тейнеме истят операцият 2019 иестэ саезь. Ваня стамбарнэ совась лувс. Васня тонадсь озадо аштеме, мейле кумажа лангсо комадо якамо. Якамо сыргась кото иесэ. Ней уш тензэ 13 иеть. Сон а корты, ансяк весементь чарькоди. Ванянь ДЦП ды лия стака ормат. Вакссонзо свал улезэ ломань. Оксана Дмитриевна весе седейстэ евты сюкпря семиянзо туртов. Мирдезэ, Александр – кеме неже, свал муи оймавтыця валт, а кады нусмакалеме. Нолдасак прят – емат. Тесэ нусмакалемс а кона шкане. ДЦП марто эйкакштненень секе-тев эряви ютамс реабилитацият, эрьва кодат занятият. Весе сынь питнейть. Сибирьсэ маласост истят реабилитационной центрат арасельть. Секскак Макушкинтнэ 2014 иестэ велявтсть Мордовияв.
Васенце тейтерест Таисия прядызе М.Е. Евсевьев лемсэ МГПИ-нть (ней – МГПУ). Тонавтнесь логопедэкс-дефектологокс. Теде башка, ютась зярыя эрьва кодат курсат, касты квалификациянзо, нейгак тонавтни.
– Минек семиясо ули эйкакш-инвалид, Таисия эсь сельмесэ неи, кода ды мезе. Монень маряви, сон седеяк парсте чарькоди истят эйдетнень. Кавксть-колмоксть варшты эйкакшонть лангс ды соды, мейстэ ушодомс, кода лездамс тенст. Бути мон Ванянь мейсэяк жалян, сон, мекевлангт, кармавты Ванянь кепедемс празенть, мезентькак саемс эсензэ кедьс. Тая ней тонавтни «Дом Совы» сенсорно-моторной интеграциянь технологиянтень. Истят специалистт регионсонок арасть, арсян, те покш эскелькс республиканок туртов. Таисия истя жо роботы «Наши дети» центрасонок. Нина, омбоце тейтеренек, сиянь медаль марто прядызе школанзо. Ней арси, ков молемс тонавтнеме, мелезэнзэ тукшны геологиясь.
«Наши дети» эйкакштнень-инвалидтнэнь марто семиятненень лездамонь центрась Саранскойсэ панжовсь 2020 иестэ. Ней сонзэ прявтокс важоди Михаил Иванович Баймеев, сонгак касты эйкакш-инвалид. Оксана Дмитриевна – волонтер-организатор. Сондензэ башка, тесэ эште 8 волонтерт-организаторт. Центранть кувать арасель эсензэ кудозо. Савкшнось сиведемс косояк таркинеть. Мейле сынь тетятнень-аватнень марто пшкадсть энялдома марто ошонь Администрацияв. Ды тосо лездасть. Макссть Сущинскиень куросо тарка. Эрявсь сонзэ витнемс-петнемс. Теньсэ парсте лездасть спонсортнэ, теде башка, «Терентич Тим» организациясь, конась важоди ментальной колавкс марто эйдетнень коряс. Тейсть динамической зал, улить занятиянь ютавтомань кабинетт. Покш лезкс макссь ды максы Покш Березникбуень «Искра» ООО-нь прявтось Геннадий Афанасьевич Беспалов. «Седе ламо бу улевельть истят чевте седей ломанть. А септано, свал эряви тенек лезкс. Свал вешнетяно спонсорт», – мерсь О.Д. Макушкина.
Оксана Дмитриевна ды лия кавксо коллеганзо тердтнить эрьва кодамо ошсто специалистт: остеопатт, адаптивно-физической культурань, бобат-терапиянь, Анат-Баниэль методонь специалистт. Тей сакшныть лавшо шумбрачи марто эйдетне, эйкакштне-инвалидтнэ, кинь ули ДЦП, кие кувать а ушоды кортамо ды седе тов. Весе занятиятне ютыть питневтеме. Центрасонть важодить логопед-дефектолог (Т.А. Макушкина), музыкальной терапевт (Е.А. Пожарова). Сочи ошсто сакшны музыкальной терапевтэсь Александра Гудимова. Эрьва эйкакшонтень кочкави башка музыка, се, кона тензэ вечкеви. Улить музыкальной инструментэст – гуслят, вибрационной музыкальной чаша, пианина. Эйкакштненень пек вечкеви музыкась.
2024 иестэ «Наши дети» центрась изнясь Президентэнь грантонь фондсто грант. «Курс на ПРОдвижение» проектэнтень явозельть 1 млн 800 тежат целковойть. Сонзэ лангс рамазель оборудования ды ютавтозельть занятият. Оксана Дмитриевна мельспаросо пачтясь, те иестэяк сынь изнясть эште вейке грант. Покшолмазо – 3 миллионт целковойть. Те – «Мелодия ПРОдвижения» проектэсь. Сонзэ вельде ютавтовить неврологической музыкальной терапиянь ды адаптивно-физической культурань вейсэнь занятият. Тердевить весе, кинень эряви лезкс!
Те центрасонть лездыть тетятнень-аватнень туртовгак. Эдь весе сизезь, аволь эрьванть улить ярмаконзо питней занятиятнес. Истя, ульнесь «Мама в балансе» проектэсь, аватнень марто роботась психолог. Ютавтозельть вейсэнь фотосессият, мастер-класст. Од грантонть вельде тееви массаж тетятнень-аватнень туртов.
Оксана Дмитриевнанень сеедьстэ пшкалить семиятне, кить кастыть эйкакш-инвалид. Сынь вешить превс путома: мезе теемс, ков молемс, косто муемс лезкс. Эрьванть эряви оймавтомс, муемс кель-вал.
Велявттано Ванюшканень. Седейс операциядонть башка, Ванянень Московсо тейсть стака операция пищеводс, кармасть содамо, ули ловсонь белоконтень аллергия. Эрьва недля иень перть ардтнесть Московов процедуратнес. Зяро савсь цидярдомс вишка эйдентень! Ваня, кода весе лия эйкакштне, вечки ламбамодо ярсамо, машинынесэ-тракторсо налксеме, вечки техниканть. Велесэ улемстэ чоп анок ваномс луганаронь ледиця триммертнэнь, ардыця мотоблоктнень лангс. Натой соды, ков лепштямс мотоблоконть сыргавтомсто.
– Сюкпря евтавлинь весе врачтнень туртов, эсенек республикань педиатратненень. Эрьва мезе савсь неемс, эрьва кодат валт марямс: седеень кельмевтицят ды эждицят. Минь весе ломанть, эрьванть эсензэ обуцязо, ежозо. Весть мерсть: «Варштак церынеть сельметнес! Кода сон бажи эрямо! Тонгак бажат стявтомс пильге лангс. Минь весементь тейсынек, иля мелявто!» Теде мейле теке селмот касыть кутьмересэть. Пандоськак аволь пандо, стенаськак шаштови. Нать, истя Пазонтень эрявсь. Бути Ваня а улевель, арази содавлинь лиянь стакачитнень, арази кармавлинь лиянень лездамо ды роботамо те сферасонть? – корты Оксана Дмитриевна.
Татьяна Маторкина